ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃអង្គារ បានអំពាវនាវឱ្យក្រុមតាលីបង់ផ្លាស់ប្ដូរគោលនយោបាយដែលផ្ដោតលើស្ត្រី និងកុមារី នៅក្នុងប្រទេសអាហ្វហ្កានីស្ថាន ដោយព្រមានចំពោះការរំលោភសិទ្ធិមនុស្សកាន់តែអាក្រក់នៅក្នុងប្រទេសនេះ។ នេះបើយោងតាមការចេញផ្សាយរបស់ទីភ្នាក់សារព័ត៌មាន CNA នៅថ្ងៃទី២៨ ខែធ្នូ ឆ្នាំ២០២២ នេះ។
នៅក្នុងការរំលោភបំពានចុងក្រោយបំផុតចំពោះសិទ្ធិស្ត្រីនៅក្នុងប្រទេសអាហ្វហ្កានីស្ថាន ចាប់តាំងពីក្រុមតាលីបង់ដណ្ដើមអំណាចកាលពីឆ្នាំមុន កាលពីថ្ងៃសៅរ៍ មេដឹកនាំអ៊ីស្លាមបានហាមឃាត់ស្ត្រីមិនឱ្យធ្វើការនៅក្នុងអង្គការក្រៅរដ្ឋាភិបាល (NGO) ដែលបង្កឱ្យមានការជំទាស់ជាខ្លាំងពីសហគមន៍អន្តរជាតិ។
ក្រុមតាលីបង់ បានហាមមិនឱ្យស្ត្រី និងកុមារី ចូលរៀននៅសាកលវិទ្យាល័យ និងអនុវិទ្យាល័យ។
ក្រុមប្រឹក្សាសន្តិសុខអង្គការសហប្រជាជាតិ ដែលមានសមាជិក ១៥ប្រទេស បាននិយាយនៅក្នុងសេចក្ដីថ្លែងការណ៍មួយថា «ខ្លួនមានការព្រួយបារម្ភយ៉ាងខ្លាំង» ចំពោះការរឹតត្បិតកាន់តែខ្លាំងឡើងលើការអប់រំរបស់ស្ត្រី ដោយអំពាវនាវឱ្យមានការចូលរួមពេញលេញ និងដោយស្មើភាពពីស្ត្រី និងកុមារី នៅក្នុងប្រទេសអាហ្វហ្កានីស្ថាន។
ក្រុមប្រឹក្សានេះបានជំរុញឱ្យក្រុមតាលីបង់ «បើកសាលារៀនឡើងវិញ ហើយផ្លាស់ប្តូរគោលនយោបាយ និងការអនុវត្តឱ្យបានឆាប់ ដែលរំលោភលើសិទ្ធិមនុស្ស និងសេរីភាពជាមូលដ្ឋានធ្ងន់ធ្ងរ»។
នៅក្នុងសេចក្ដីថ្លែងការណ៍របស់ខ្លួន ក្រុមប្រឹក្សាក៏បានថ្កោលទោសចំពោះការហាមប្រាមស្ត្រីមិនឱ្យធ្វើការនៅអង្គការក្រៅរដ្ឋាភិបាល (NGO) ដោយលើកឡើងពីផលប៉ះពាល់ធ្ងន់ធ្ងរលើប្រតិបត្តិការជំនួយនៅក្នុងប្រទេសដែលមនុស្សរាប់លាននាក់ពឹងផ្អែកលើជំនួយទាំងនោះ។
ក្រុមប្រឹក្សាបាននិយាយថា «ការរឹតត្បិតទាំងនេះផ្ទុយនឹងការប្តេជ្ញាចិត្តរបស់ក្រុមតាលីបង់ចំពោះប្រជាជនអាហ្វហ្កានីស្ថាន ក៏ដូចជាការរំពឹងទុករបស់សហគមន៍អន្តរជាតិ»។
សហគមន៍អន្តរជាតិបានដាក់ការគោរពសិទ្ធិស្រ្តីជាចំណុចស្នូលក្នុងការចរចាជាមួយរដ្ឋាភិបាលតាលីបង់ ដើម្បីទទួលបានការទទួលស្គាល់ និងការទទួលបានជំនួយឡើងវិញ។
បណ្តាអង្គការជំនួយបរទេសជាច្រើនបានប្រកាសកាលពីថ្ងៃអាទិត្យថា ពួកគេបានផ្អាកប្រតិបត្តិការនៅក្នុងប្រទេសអាហ្វហ្កានីស្ថាន។
សូមរម្លឹកថា ជំនួយអន្តរជាតិសម្រាប់អាហ្វហ្កានីស្ថានមានចំនួនរាប់រយលានដុល្លារ។ អង្គការសហប្រជាជាតិ និងភ្នាក់ងាររបស់ខ្លួន ក៏បានឱ្យដឹងថា ប្រជាពលរដ្ឋអាហ្វហ្កានីស្ថាន ៣៨លាននាក់ ត្រូវការជំនួយមនុស្សធម៌ចាំបាច់សម្រាប់ឆ្លងកាត់រដូវរងានេះ។
នៅប្រទេសអាហ្វហ្កានីស្ថាន ចាប់តាំងពីពួកតាលីបង់ឡើងកាន់អំណាចជាថ្មីនៅខែតុលា ឆ្នាំ២០២១ បញ្ហាសិទ្ធិមនុស្ស ពិសេសសិទ្ធិស្ត្រី និងកុមារី បានធ្លាក់ចុះដុបដាបខ្លាំង។ ស្រ្តីមួយចំនួនដែលមានលទ្ធភាព បានសម្រេចចិត្តចាកចេញពីប្រទេសជាបន្តបន្ទាប់៕
