លោកនាយករដ្ឋមន្ត្រី ហ៊ុន សែន ក្រើនរម្លឹកក្រសួងរៀបចំដែនដី នគរូបនីយកម្ម និងសំណង់ ត្រូវបន្តដោះស្រាយជម្លោះដីធ្លីដែលនៅសេសសល់ និងការចេញបណ្ណកម្មសិទ្ធិដីធ្លីជូនប្រជាពលរដ្ឋ ព្រមទាំងដោះស្រាយបញ្ហាដីសង្គមកិច្ច ហើយរាល់ការដោះស្រាយត្រូវមានសុចរិតភាព។
ក្នុងពិធីសម្ពោធដាក់ឱ្យប្រើប្រាស់អគារក្រសួងរៀបចំដែនដី នគរូបនីយកម្ម និងសំណង់ នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានថ្លែងដោយណែនាំទៅក្រសួងមួយនេះបន្តខិតខំដោះស្រាយការចេញបណ្ណកម្មសិទ្ធិ និងដោះស្រាយបញ្ហាជម្លោះដីធ្លីដែលនៅសេសសល់ជូនប្រជាពលរដ្ឋ ក្នុងនោះអាចប្រើយន្តការសម្របសម្រួលដោះស្រាយក្រៅប្រព័ន្ធតុលាការ។
លោកបន្តថា៖ «ហើយត្រូវមានសុចរិតភាពទៅលើការដោះស្រាយ [ជម្លោះដីធ្លី] បើសិនជាមានសុចរិតភាព យើងនឹងដោះស្រាយបាននូវបញ្ហា»។
លោកនាយករដ្ឋមន្ត្រី ហ៊ុន សែន ក៏បានណែនាំដល់ក្រសួងរៀបចំដែនដី ខិតខំដោះស្រាយបញ្ហាដីសង្គមកិច្ចផងដែរ ដោយលោកបានចាត់ទុកកិច្ចការដីសម្បទានសង្គមកិច្ចនេះ ថាជាការងារអាទិភាពរបស់រដ្ឋាភិបាល។
លោកបានរម្លឹកដែរថា ប្រវត្តិនៃការអភិវឌ្ឍប្រទេសជាតិ តែងតែធ្វើឱ្យដីឡើងថ្លៃ ហើយនៅពេលដីឡើងថ្លៃ ក៏តែងនាំឱ្យមានបញ្ហាទំនាស់ដីធ្លី តួយ៉ាងដូចនៅសម័យសង្គមរាស្ត្រនិយម ដោយសារតែដីឡើងថ្លៃ ក៏មានមន្ត្រីមួយចំនួនបាននាំគ្នាសម្រុកស្នើសុំដីធ្លីសម្រាប់ទុកជាកម្មសិទ្ធិឯកជនផ្ទាល់ខ្លួន ដែលនាំឱ្យមានអំពើពុករលួយយកដីរបស់ប្រជាពលរដ្ឋនៅតំបន់ខ្លះ និងបង្កបញ្ហាជាច្រើនដល់រដ្ឋាភិបាលនិងប្រជាពលរដ្ឋ៕