ប្រមុខរដ្ឋាភិបាលបានព្រមានដកយកកម្មសិទ្ធិដីធ្លីរបស់ក្រុមប្រឆាំង ដោយថា ដើម្បីឆ្លើយតបទៅនឹងការរិះគន់រឿងបញ្ហាជម្លោះដីធ្លីនាពេលកម្លងមក។
ក្នុងពិធីសម្ពោធអគារទីស្ដីការក្រសួងរៀបចំដែនដី នគរូបនីយកម្ម និងសំណង់ថ្មី នៅថ្ងៃទី៨ ខែវិច្ឆិកាឆ្នាំ២០២១នេះ លោកនាយករដ្ឋមន្ត្រី ហ៊ុន សែន មានប្រសាសន៍ថា កន្លងមក ក្រុមប្រឆាំងតែងតែនិយាយរិះគន់រដ្ឋាភិបាលលើគម្រោងអភិវឌ្ឍន៍ដែលធ្វើឱ្យប៉ះពាល់ដីធ្លីរបស់ប្រជាពលរដ្ឋនិងតំបន់ការពារ។ លោកថា រាល់ការអភិវឌ្ឍនៅលើពិភពលោក គេចមិនផុសពីផលប៉ះពាល់បរិស្ថាននិងដីធ្លីរបស់ប្រជាពលរដ្ឋនោះឡើយ។
លោកមានប្រសាសន៍ថា៖ «អាខ្លះអ្នកប្រឆាំង ប៉ុន្តែវាមកទិញដីនៅកន្លែងហ្នឹងដែរ វាមានដីនៅហ្នឹងដែរ! បើអ៊ីចឹង ដើម្បីកុំឱ្យវាមានដី ទាល់តែដកកម្មសិទ្ធិវា! ហ្អែងពូកែទិតៀន អញដកកម្មសិទ្ធិហ្ហែងគ្រវាត់ចោល យកដីហ្អែងហ្មង! ប៉ុន្តែបើយកដីវា វាថាឯងដណ្ដើមដីវាទៀត»។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍ថា លោកមិនចាប់អារម្មណ៍នឹងការព្រមានរបស់លោកនាយករដ្ឋមន្ត្រីនេះទេ។ លោកថា កន្លងមក ពលរដ្ឋធម្មតាដែលប៉ះពាល់កម្មសិទ្ធិដីធ្លីដោយគម្រោងអភិវឌ្ឍន៍នានា ក៏រដ្ឋាភិបាលដកហូតដោយមិនបានដោះស្រាយសំណងត្រឹមត្រូវតាមផ្លូវច្បាប់ដែរ។
លោកបន្ថែមថា៖ «យើងមិនមែនទើបឃើញនាយករដ្ឋមន្ត្រីគាត់ប្រកាសឥលូវនេះទេ ឃើញដកហូតជាហូរមកហើយ មិនមែនថាជាដីបក្សប្រឆាំង មិនប្រឆាំងទេ។ កន្លែងណាត្រូវអភិវឌ្ឍ កន្លែងណាដីថ្លៃ ដូចជានៅដីក្រហម បឹងកក់ កោះពេជ្រ គាត់ដកហូតជាហូរហែហើយហ្នឹង យើងមិនមានអីភ្ញាក់ផ្អើលទេ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត បានបង្ហាញការសោកស្ដាយចំពោះការព្រមានដកកម្មសិទ្ធិដីធ្លីរបស់ក្រុមប្រឆាំងពីសំណាក់ប្រមុខរដ្ឋាភិបាល។ លោកថា តាមគោលការណ៍ច្បាប់ គឺពលរដ្ឋគ្រប់រូបមានសិទ្ធិស្មើភាពគ្នានៅចំពោះមុខច្បាប់ដោយគ្មានរើសអើងឡើយ។
មន្ត្រីសិទ្ធិរូបនេះបន្តថា ការរិះគន់មួយចំនួនមិនមែនជាការផ្ចាញ់ផ្ចាល ឬបន្ដុះបង្អាប់រដ្ឋាភិបាលនោះទេ តែ ផ្ទុយទៅវិញ មតិរិះគន់ទាំងនោះបានជួយឱ្យរដ្ឋាភិបាលពិចារណាលើការអភិវឌ្ឍ ដែលមិនធ្វើឱ្យប៉ះពាល់ធ្ងន់ធ្ងរដល់បរិស្ថាន និងផលប្រយោជន៍របស់ប្រជាពលរដ្ឋប៉ុណ្ណោះ។
លោកបន្ថែមថា៖ «យើងឃើញហើយថា រហូតមកដល់បច្ចុប្បន្ននេះ ច្បាប់របស់យើងគឺមិនបានបែងចែកថាពលរដ្ឋខាងបក្សប្រឆាំង និងមិនប្រឆាំងទេ។ សំខាន់ច្បាប់ គឺត្រូវតែអនុវត្តឱ្យបានស្មើភាពគ្នា។ ប្រជាពលរដ្ឋទាំងអស់មានសិទ្ធិស្មើភាពគ្នានៅចំពោះមុខច្បាប់។ អ៊ីចឹងសរុបសេចក្ដីទៅ ប្រសិនបើមានសញ្ញាណនៃការដកហូតដីអីហ្នឹង អាហ្នឹងវាជាការមួយដែលគួរឱ្យសោកស្ដាយ។ រដ្ឋាភិបាលយើងគួរតែអនុវត្តតាមច្បាប់ដែលមានស្រាប់ ជាពិសេសរដ្ឋធម្មនុញ្ញនៃព្រះរាជាណាចក្រកម្ពុជាយើង»៕
