មន្ត្រីជាន់ខ្ពស់នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បានឱ្យដឹងថា ក្នុងរយៈពេល១០ខែ ឆ្នាំ២០២១នេះ មន្ត្រីជំនាញបានបង្ក្រាប និងបំផ្លាញចោលនូវទំនិញក្លែងក្លាយនិងខូចគុណភាពសរុបចំនួនជាង៤១តោន និងអាល់កុលក្លែងក្លាយឬមេតាណុលជាង១៧៦តោន។
ប្រតិភូរាជរដ្ឋាភិបាលទទួលបន្ទុកអគ្គនាយក នៃអគ្គនាយកដ្ឋាន ក.ប.ប លោក ផាន អូន បានឱ្យដឹងនៅថ្ងៃទី០៨ ខែវិច្ឆិកា ឆ្នាំ២០២១ ថាទំនិញក្លែងក្លាយនិងខូចគុណភាពដែលមន្ត្រីជំនាញបង្រ្កាបបាននៅតាមបណ្ដាផ្សារនិងឃ្លាំងទំនិញនានាទូទាំងប្រទេសនោះ មានដូចជា ផលិតផលម្ហូបអាហារ និងភេសជ្ជៈ មានចំនួនសរុប៤១តោននិង៨៤២គីឡូក្រាម និងអាល់កុលក្លែងក្លាយឬមេតាណុលចំនួន១៧៦តោននិង៧៩៧លីត្រ។
លោកបានបន្តថា ផលិតផលទាំងនេះត្រូវបានរឹបអូសមកកម្ទេចចោល ព្រមទាំងបានធ្វើការពិន័យអន្តរការណ៍ ស្របតាមច្បាប់ស្ដីពី«កិច្ចការពារអ្នកប្រើប្រាស់»ផងដែរ។
លោក ផាន អូន បន្ថែមថា អគ្គនាយកដ្ឋាន ក.ប.ប នឹងបង្កើនសកម្មភាពត្រួតនិត្យនិងស្រាវជ្រាវរកប្រភព និងទីតាំងស្ដុក និងចែកចាយនូវផលិតផលដែលមានភាពមិនអនុលោមតាមច្បាប់ទាំងនេះ ឱ្យបានខ្លាំងក្លាថែមទៀត ដោយគួបផ្សំជាមួយសកម្មភាពអប់រំនិងផ្សព្វផ្សាយ ការយល់ដឹងអំពីច្បាប់ ឯកសារគតិយុត្តិ និងបទដ្ឋានបច្ចេកទេសនានា ដល់អាជីវករ ពាណិជ្ជករ ផលិតករ និងប្រជាជន ដើម្បីរួមគ្នាលើកកម្ពស់គុណភាពផលិតផលដែលចរាចរនៅលើទីផ្សារកម្ពុជា៕
