អាជ្ញាធរកម្ពុជាបានដោះលែងក្មេងប្រុស កាក់ សុវណ្ណច្ឆ័យ កូនអតីតសកម្មជនបក្សសង្គ្រោះជាតិ ចេញពីពន្ធនាគារ នៅព្រឹកមិញនេះ បន្ទាប់ពីរូបគេជាប់ពន្ធនាគារអស់រយៈពេល៤ខែនិង១៥ថ្ងៃ។
កាលពីថ្ងៃទី៨ ខែវិច្ឆិកា ម្ដាយរបស់ក្មេងប្រុស កាក់ សុវណ្ណច្ឆ័យ គឺអ្នកស្រី ព្រំ ចាន់ថា បានសម្ដែងការខកចិត្តជាខ្លាំង ដែលអាជ្ញាធរមិនទាន់ដោះលែងក្មេងប្រុសរូបនេះ ដោយបានពន្យាររហូតដល់ថ្ងៃទី១០ ខែវិច្ឆិកានេះ បើទោះបីជាសេចក្ដីប្រកាសព័ត៌មានរបស់អ្នកនាំពាក្យសាលាដំបូងរាជធានីភ្នំពេញ បានបញ្ជាក់ថា ក្មេងប្រុស កាក់ សុវណ្ណច្ឆ័យ នឹងដោះលែងនៅថ្ងៃទី៨ ខែវិច្ឆិកាក្ដី។
សាលាដំបូងរាជធានីភ្នំពេញ កាលពីថ្ងៃទី១ ខែវិច្ឆិកា ឆ្នាំ២០២១ បានកាត់ទោសក្មេងប្រុស កាក់ សុវណ្ណច្ឆ័យ វ័យ១៦ឆ្នាំ ដាក់ពន្ធនាគាររយៈពេល៨ខែ ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ «ប្រមាថចំពោះអ្នករាជការសាធារណៈ»។ ប៉ុន្តែតុលាការបានបង្គាប់ឱ្យអនុវត្តទោសក្នុងពន្ធនាគាររយៈពេល៤ខែនិង១៥ថ្ងៃ ចំណែកទោសដែលនៅសល់ត្រូវព្យួរសាកល្បងរយៈពេល២ឆ្នាំ។
អ្នកជំនាញសិទ្ធិមនុស្សអង្គការសហប្រជាជាតិ ៣រូប បានថ្កោលទោសចំពោះការកាត់ទោសអនីតិជនវ័យ១៦ឆ្នាំរូបនេះ ដោយបានចាត់ទុកថា ការផ្តន្ទាទោសលើអនីតិជនដែលមានបញ្ហាស្មារតីមិនប្រក្រតីដោយជំងឺអូទីហ្សឹមនេះ គឺជារូបភាពដ៏អាក្រក់នៃយុទ្ធនាការជាបន្តបន្ទាប់របស់អាជ្ញាធរ ក្នុងការបំភិតបំភ័យនិងការប្រើប្រាស់ហិង្សាប្រឆាំងនឹងសង្គមស៊ីវិល និងសកម្មជនបក្សជំទាស់ ព្រមទាំងសមាជិករបស់ក្រុមទាំងនេះ។ អ្នកជំនាញផ្នែកសិទ្ធិមនុស្ស បានអំពាវនាវឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា៕