ក្រសួងសុខាភិបាលវៀតណាម បានឱ្យដឹងនៅថ្ងៃពុធនេះថា ប្រទេសខ្លួនបានសម្រេចអនុញ្ញាតឱ្យប្រើប្រាស់វ៉ាក់សាំងបង្ការជំងឺកូវីដ-១៩ ឈ្មោះ Covaxin របស់មន្ទីរពិសោធន៍ឥណ្ឌាមួយ ក្នុងលក្ខខណ្ឌបន្ទាន់។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
នេះជាប្រភេទវ៉ាក់សាំងទី៩ហើយដែលត្រូវបានអនុញ្ញាតឱ្យប្រើប្រាស់នៅក្នុងប្រទេសនេះ។
រដ្ឋាភិបាលវៀតណាម កាលពីខែកក្កដាកន្លងទៅ ក៏ធ្លាប់បានលើកឡើងពីគោលបំណងក្នុងការទទួលបានវ៉ាក់សាំង Covaxin ដែលផលិតដោយមន្ទីរពិសោធន៍ឥណ្ឌា Bharat Biotech នេះ ចំនួន១៥លានដូសផងដែរ។
គិតរហូតមកដល់ពេលនេះ ប្រទេសវៀតណាមមានការឆ្លងវីរុសកូវីដ-១៩ សរុបនៅក្នុងប្រទេសចំនួនជាង៩៨ម៉ឺនករណី និងអ្នកស្លាប់បាត់បង់ជីវិតជាង២ម៉ឺននាក់ ខណៈដែលប្រជាជនរបស់ប្រទេសនេះជាង៤០ភាគរយហើយដែលទទួលបានការចាក់វ៉ាក់សាំងការពារជំងឺកូវីដ-១៩៕