ប្រធានាធិបតីចិន លោក ស៊ី ជីនពីង បានឱ្យដឹងថា ប្រទេសរបស់ខ្លួនបានត្រៀមរួចជាស្រេចក្នុងការដោះស្រាយការខ្វែងគំនិតគ្នាឱ្យបានត្រឹមត្រូវជាមួយសហរដ្ឋអាមេរិក មុនពេលជំនួបពិភាក្សាតាមរយៈប្រព័ន្ធវីដេអូជាមួយប្រធានាធិបតីអាមេរិក លោក ចូ បៃឌិន ដែលនឹងធ្វើឡើងនៅក្នុងពេលឆាប់ៗខាងមុខនេះ។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់លោក ស៊ី ជីនពីង នៅក្នុងលិខិតមួយដែលអានដោយឯកអគ្គរដ្ឋទូតរបស់ចិនប្រចាំនៅសហរដ្ឋអាមេរិក លោក Qin Gang កាលពីថ្ងៃអង្គារថា ប្រទេសចិនបានត្រៀមខ្លួនរួចជាស្រេច ដើម្បីធ្វើកិច្ចសហប្រតិបត្តិការជាមួយសហរដ្ឋអាមេរិកលើបញ្ហានានាក្នុងតំបន់និងពិភពលោក។
ទោះជាយ៉ាងណា កាលបរិច្ឆេទច្បាស់លាស់នៃការជួបពិភាក្សាគ្នារវាងមេដឹកនាំនៃប្រទេសមហាអំណាចទាំងពីរនេះនៅមិនត្រូវបានប្រកាសជាផ្លូវការនៅឡើយទេ។
ប៉ុន្តែយោងតាមប្រភពមួយបានបញ្ជាក់ថា ជំនួបពិភាក្សាដែលធ្វើឡើងតាមរយៈប្រព័ន្ធវីដេអូនេះត្រូវបានរំពឹងថា នឹងកើតឡើងនៅក្នុងសប្ដាហ៍ក្រោយ។
គួរបញ្ជាក់ថា លោក ចូ បៃឌិន និងលោក ស៊ី ជីនពីង កាលពីខែកញ្ញាកន្លងទៅ ក៏ធ្លាប់បានជួបពិភាក្សាគ្នាតាមរយៈទូរសព្ទផងដែរ ខណៈដែលកិច្ចពិភាក្សានៅពេលនោះផ្ដោតសំខាន់អំពីតម្រូវការដើម្បីធានាឱ្យបានថា ការប្រកួតប្រជែងរបស់ប្រទេសទាំងពីរមិនធ្លាក់ចូលទៅក្នុងជម្លោះ៕