ក្រុមប្រឹក្សាមួយរបស់រដ្ឋាភិបាលម៉ាឡេស៊ី បានឱ្យដឹងនៅថ្ងៃព្រហស្បតិ៍នេះថា ប្រទេសរបស់ខ្លួនគ្រោងនឹងបើកច្រកព្រំដែនឡើងវិញ សម្រាប់ទទួលភ្ញៀវអន្តរជាតិនៅដើមខែមករាឆ្នាំក្រោយ ដើម្បីស្ដារវិស័យទេសចរណ៍ដែលរងផលប៉ះពាល់ដោយជំងឺរាតត្បាតឡើងវិញ។
ប្រទេសនៅក្នុងតំបន់អាស៊ីអាគ្នេយ៍មួយនេះបានចាប់ផ្ដើមបើកសេដ្ឋកិច្ចរបស់ខ្លួនឡើងវិញជាបណ្ដើរៗហើយក្នុងរយៈពេលប៉ុន្មានសប្ដាហ៍ថ្មីៗនេះ ខណៈដែលអត្រាឆ្លងមេរោគកូវីដ-១៩នៅក្នុងប្រទេសថយចុះ ស្របពេលដែលកម្មវិធីចាក់វ៉ាក់សាំងកំពុងកើនឡើង។
យោងតាមស្ថិតិរបស់រដ្ឋាភិបាលបង្ហាញថា ក្នុងចំណោមប្រជាជនចំនួន៣២លាននាក់របស់ប្រទេសម៉ាឡេស៊ី ក្នុងនោះមានជាង ៧០% ហើយដែលទទួលបានការចាក់វ៉ាក់សាំងការពារជំងឺកូវីដ-១៩។
ទីភ្នាក់ងារសារព័ត៌មាន Reuters បានស្រង់សម្ដីអតីតនាយករដ្ឋមន្ត្រីម៉ាឡេស៊ី លោក មូយីដឌីន យ៉ាស៊ីន (Muhyiddin Yassin) និងបច្ចុប្បនជាប្រធានក្រុមប្រឹក្សាមានភារកិច្ចដឹកនាំកម្មវិធីស្ដារសេដ្ឋកិច្ចរបស់ប្រទេសម៉ាឡេស៊ី មកផ្សព្វផ្សាយថា ឧស្សាហកម្មទេសចរណ៍ងើបឡើងវិញយឺត ដោយសារតែគ្មានវត្តមានជនបរទេស ហើយប្រតិបត្តិករនានាត្រូវការពេលវេលាបន្ថែមទៀតក្នុងការបន្តអាជីវកម្មឡើងវិញ។
ជាមួយគ្នានេះ លោកបន្តថា វិធានការត្រួតពិនិត្យមួយចំនួនដូចជា ការធ្វើតេស្តរកវីរុសកូវីដ-១៩លើអ្នកដំណើរដែលចូលមកកាន់ប្រទេស នឹងនៅតែត្រូវអនុវត្តដដែល ដោយផ្អែកលើស្ថានភាពជំងឺកូវីដ-១៩នៅក្នុងប្រទេសដើមរបស់ពួកគេទាំងនោះ និងកត្តាផ្សេងៗទៀត។
ទោះជាយ៉ាងណា ប្រធានក្រុមប្រឹក្សារូបនេះមិនបានបញ្ជាក់ពីកាលបរិច្ឆេទច្បាស់លាស់នៃការប្រកាសសម្រាប់ការបើកដំណើរការឡើងវិញនោះទេ ខណៈដែលលោកលើកឡើងថា ការសម្រេចចិត្តកំពុងតែស្ថិតនៅក្រោមការពិភាក្សាយ៉ាងលម្អិតនៅឡើយ ដោយភ្នាក់ងារសុខភាពនិងសន្តិសុខនានា។
គិតរហូតមកដល់ពេលនេះ ប្រទេសម៉ាឡេស៊ីមានករណីឆ្លងវីរុសកូវីដ-១៩សរុបនៅក្នុងប្រទេសចំនួនជាង២លានករណី និងអ្នកស្លាប់បាត់បង់ជីវិតមានជាង២ម៉ឺននាក់៕
