សកម្មជនសង្គមម្នាក់ទៀត លោក មួង សុភ័ក្រ ត្រូវបានអាជ្ញាធរកម្ពុជាដោះលែងចេញពីពន្ធនាគារនៅប្រមាណជាម៉ោង១១ព្រឹក ថ្ងៃព្រហស្បតិ៍ ទី១១ ខែវិច្ឆិកានេះ បន្ទាប់ពីជាប់ពន្ធនាគារអស់រយៈពេល១៤ខែ។
តុលាការក្រុងភ្នំពេញ កាលពីថ្ងៃទី២៦ ខែតុលា បានកាត់ទោសយុវជន មួង សុភ័ក្រ សមាជិកសមាគមនិស្សិតបញ្ញវន្តខ្មែរ និងសកម្មជនសង្គមចំនួន១៤នាក់ផ្សេងទៀត ឱ្យជាប់ពន្ធនាគារ២០ខែ និងពិន័យជាប្រាក់ម្នាក់ៗចំនួន២ ០០០ ០០០រៀល ពីបទ «ញុះញង់» តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា។ ប៉ុន្តែតុលាការបានបង្គាប់ឱ្យអនុវត្តទោសតែ១៤ខែប៉ុណ្ណោះ ខណៈទោសដែលនៅសល់ត្រូវព្យួរសាកល្បងរយៈពេល២ឆ្នាំ។
បន្ទាប់ពីចេញពីពន្ធនាគារ យុវជន មួង សុភ័ក្រ បានអះអាងថា រូបគេប្ដេជ្ញាបន្តធ្វើសកម្មភាពការងារសង្គមបន្តទៀត ដោយមិនភ័យខ្លាចចំពោះការចាប់ចងទៀតនោះឡើយ។
លោក មួង សុភ័ក្រ បន្តថា៖ «ខ្ញុំនៅតែប្ដេជ្ញាចិត្តថា ខ្ញុំនៅតែបន្តបញ្ហាការងាររបស់ខ្ញុំទៅមុខទៀត»។
ចាប់ពីដើមខែវិច្ឆិកាមក តុលាការកម្ពុជាបានដោះលែងសកម្មជនសង្គម បរិស្ថាន និងនយោបាយជាបន្តបន្ទាប់ ក្រោយពីពួកគេត្រូវបានតុលាការកាត់តម្រឹមទោសនិងព្យួរទោសសាកល្បងជាបន្តបន្ទាប់។
ទោះជាយ៉ាងនេះក្ដី អ្នកជំនាញផ្នែកសិទ្ធិមនុស្សនៃអង្គការសហប្រជាជាតិ (UN) ចំនួន៣រូប បានអំពាវនាវកាលពីថ្ងៃទី២ ខែវិច្ឆិកា ឆ្នាំ២០២១ ឱ្យរដ្ឋាភិបាលកម្ពុជាបញ្ឈប់ជាបន្ទាន់នូវការប្រើប្រាស់ប្រព័ន្ធតុលាការកាត់ទោសលើអ្នកហ៊ានក្រោកឈរ ដើម្បីសិទ្ធិមនុស្ស និងសេរីភាពបញ្ចេញមតិនៅកម្ពុជា៕
