សហរដ្ឋអាមេរិកបានដាក់ទណ្ឌកម្មបង្កកទ្រព្យសម្បត្តិ និងរឹតត្បិតទិដ្ឋាការចូលទឹកដីសហរដ្ឋអាមេរិក លើមន្ត្រីយោធាកំពូលៗកម្ពុជា២រូបទៀត ពាក់ព័ន្ធនឹងការប្រព្រឹត្តអំពើពុករលួយ ខណៈមន្ត្រីរដ្ឋាភិបាលបានចាត់ទុកថាជារឿងអយុត្តិធម៌។
ក្រសួងរតនាគារជាតិអាមេរិក ចេញសេចក្ដីប្រកាសព័ត៌មានមួយកាលពីថ្ងៃទី១០ ខែវិច្ឆិកា ថាមន្ត្រីយោធាជាន់ខ្ពស់កម្ពុជា ២រូប រួមមាន លោកនាយឧត្ដមសេនីយ៍ ចៅ ភិរុណ អគ្គនាយកនៃនាយកដ្ឋានសម្ភារបច្ចេកទេសនៃក្រសួងការពារជាតិ និងលោកនាយឧត្ដមនាវី ទៀ វិញ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងទឹក បានប្រើប្រាស់តួនាទីរបស់ខ្លួនប្រព្រឹត្តអំពើពុករលួយ ពាក់ព័ន្ធនឹងគម្រោងសាងសង់និងកែលម្អកំពង់ផែកងទ័ពជើងទឹករាម នៅក្រុងព្រះសីហនុ។
បើតាមក្រសួងរតនាគារជាតិអាមេរិក ចាប់ពីឆ្នាំ២០២០ ដល់ឆ្នាំ២០២១ លោក ចៅ ភិរុណ បានរួមគំនិតកេងចំណេញពីសកម្មភាពពាក់ព័ន្ធនឹងការសាងសង់និងកែលម្អបរិវេណនិងអាគារនៅកំពង់ផែកងទ័ពជើងទឹករាម។ បន្ថែមលើនេះទៀត លោក ចៅ ភិរុណ លោក ទៀ វិញ និងមន្ត្រីរដ្ឋាភិបាលកម្ពុជាដទៃទៀត ក៏ទំនងជាបានរួមគំនិតគ្នាបំប៉ោងថ្លៃដើមនៃការសាងសង់និងកែលម្អបរិវេណនិងអគារនៅកំពង់ផែកងទ័ពជើងទឹករាម ហើយពួកគេបានទទួលផលប្រយោជន៍ដោយផ្ទាល់ពីគម្រោងទាំងនោះ។
នៅមិនទាន់មានប្រតិកម្មពីមន្ត្រីជាន់ខ្ពស់យោធាកម្ពុជាទាំងពីរនាក់នៅឡើយទេ។
ក៏ប៉ុន្តែប្រធានអង្គភាពអ្នកនាំពាក្យរដ្ឋាភិបាលកម្ពុជា លោក ផៃ ស៊ីផាន បានច្រានចោលនិងចាត់ទុកករណីនេះថាជារឿងអយុត្តិធម៌។
លោកបានថ្លែងថា៖ «ការដាក់ទណ្ឌកម្មហ្នឹងជាការដាក់ទណ្ឌកម្មអយុត្តិធម៌ ដែលការសម្រេចហ្នឹងជាការសម្រេចមួយដែលមិនឆ្លើយតបនូវភាពជាក់ស្ដែងនៃមន្ត្រីទាំងអស់នោះប្រព្រឹត្តនោះទេ អានេះជាជំហររបស់កម្ពុជា។ ក៏ប៉ុន្តែការដាក់ទណ្ឌកម្មអ្វីៗហ្នឹង គឺជាអធិបតេយ្យរបស់សហរដ្ឋអាមេរិក ក៏ប៉ុន្តែកម្ពុជាមិនទទួលស្គាល់ការដាក់ទណ្ឌកម្មហ្នឹងទេ»។
យោងតាមទណ្ឌកម្មនេះ នឹងបង្កកទ្រព្យសម្បត្តិដែលមន្ត្រីយោធាជាន់ខ្ពស់ទាំង២រូបនេះអាចមាននៅសហរដ្ឋអាមេរិក និងការរឹតត្បិតទិដ្ឋាការមិនឱ្យពួកគេនិងសមាជិកក្រុមគ្រួសារសាច់ញាតិរបស់ពួកគេធ្វើដំណើរចូលទឹកដីសហរដ្ឋអាមេរិកឡើយ។ ទណ្ឌកម្មនេះក៏ហាមឃាត់មិនឱ្យជនជាតិឬក្រុមហ៊ុនអាមេរិកាំងទាំងអស់រកស៊ីឬធ្វើប្រតិបត្តិការសាច់ប្រាក់ ពាក់ព័ន្ធដោយផ្ទាល់ឬប្រយោលជាមួយមន្ត្រីយោធាជាន់ខ្ពស់ទាំងពីររូបនេះដែរ។ ការដាក់ទណ្ឌកម្មនេះធ្វើឡើងដោយផ្អែកតាមច្បាប់ ក្លូប៊ល ម៉ាកនីតស្គី (Global Magnitsky Act) របស់សហរដ្ឋអាមេរិក ប្រឆាំងនឹងជនទាំងឡាយណាដែលបានរំលោភបំពានសិទ្ធិមនុស្សធ្ងន់ធ្ងរនិងប្រព្រឹត្តអំពើពុករលួយនៅទូទាំងសាកលលោក។
គិតត្រឹមខែវិច្ឆិកា ឆ្នាំ២០២១នេះ មន្ត្រីជាន់ខ្ពស់យោធាកម្ពុជា ៤រូប និងឧកញ៉ាម្នាក់ ត្រូវបានសហរដ្ឋអាមេរិកដាក់ទណ្ឌកម្មក្រោមច្បាប់ Global Magnitsky Act បង្កកទ្រព្យសម្បត្តិ និងរឹតត្បិតទិដ្ឋាការមិនឱ្យចូលទឹកដីសហរដ្ឋអាមេរិក ក្នុងនោះរួមមាន លោកនាយឧត្ដមសេនីយ៍ ហ៊ីង ប៊ុនហៀង មេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្សរបស់លោកនាយករដ្ឋមន្ត្រី ហ៊ុន សែន, លោកនាយឧត្ដមសេនីយ៍ គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងលោកឧកញ៉ា ទ្រី ភាព។
ក្រៅពីនេះ សហរដ្ឋអាមេរិកក៏បានដាក់ទណ្ឌកម្មលើក្រុមហ៊ុនរដ្ឋចិន UDG នៅខេត្តកោះកុង និងចុងក្រោយនេះគឺការដាក់ទណ្ឌកម្មលើលោកនាយឧត្ដមសេនីយ៍ ចៅ ភិរុណ និងលោកនាយឧត្ដមនាវី ទៀ វិញ មេបញ្ជាការកងទ័ពជើងទឹក៕