សមត្ថកិច្ចសន្និដ្ឋានបឋមថា រឿងឃាតកម្មលើមន្ត្រីរដ្ឋបាលព្រៃឈើស្រុកវាលវែង ខេត្តពោធិ៍សាត់ ជាករណីសម្លាប់ប្លន់យកទ្រព្យ ហើយជនប្រព្រឹត្តអាចជាក្មេងប្រុសម្នាក់ដែលជនរងគ្រោះឱ្យស្នាក់នៅជាមួយ។
កាលពីថ្ងៃទី០៩ ខែវិច្ឆិកា មន្ត្រីរដ្ឋបាលព្រៃឈើស្រុកវាលវែង ឈ្មោះ សេង វិសាល អាយុ៥២ឆ្នាំ ត្រូវបានឃាតករប្លន់សម្លាប់ដោយកាប់៧កាំបិត រួចយកសម្ភារមួយចំនួនធំដូចជា ម៉ូតូឌ្រីមស៊េរី២០១៩ ពណ៌ខ្មៅមួយគ្រឿង ទូរសព្ទដៃអាយហ្វូន៣គ្រឿង និងចិញ្ចៀនពេជ្រ១វង់ ហើយគេចខ្លួនបាត់។
ស្នងការនគរបាលខេត្តពោធិ៍សាត់ លោកឧត្តមសេនីយ៍ទោ ស ថេង ប្រាប់ វីអូឌី នៅថ្ងៃសុក្រនេះថា ក្រោយកើតហេតុ សមត្ថកិច្ចបានចុះស្រាវជ្រាវនិងសន្និដ្ឋានជាបឋមថា ករណីឃាតកម្មទៅលើជនរងគ្រោះឈ្មោះ សេង វិសាល នេះ ជនសង្ស័យអាចជាក្មេងប្រុសម្នាក់អាយុ១៥ទៅ១៦ឆ្នាំ ដែលជនរងគ្រោះហៅឱ្យមកស្នាក់នៅជាមួយគ្រាន់ជំនួសការងារផ្ទះដូចជាដាំបាយជាដើម។
លោកបន្តថា៖ «រឿងហេតុហ្នឹងវាពិតប្រាកដហើយ! អ្នកដែលនៅជាមួយគាត់ហ្នឹង គាត់ចង់បានទ្រព្យសម្បត្តិមន្ត្រីរដ្ឋបាលព្រៃឈើហ្នឹង។ អ៊ីចឹងទៅ គាត់បាន [សម្លាប់] ហើយរត់គេចខ្លួន។ ឥលូវ [សមត្ថកិច្ច] បានតម្រុយហើយ កំពុងតែតាមប្រមាញ់»។
ស្នងការរូបនេះបន្ថែមថា ការសន្និដ្ឋានរបស់សមត្ថកិច្ចបែបនេះ ដោយសារតែក្មេងប្រុសម្នាក់នោះបានបាត់ខ្លួន ស្របពេលដែលមន្ត្រីរដ្ឋបាលព្រៃឈើបាត់បង់ជីវិត។
ស្នងការនគរបាលខេត្តពោធិ៍សាត់ ថាលោកមិនទាន់អាចវាយតម្លៃករណីឃាតកម្មនេះថាជាករណីគំនុំ ឬយ៉ាងណានោះទេ។ យ៉ាងណា លោកថា ជនសង្ស័យអាចគ្រាន់តែចង់បានលុយកាក់ ដើម្បីបំពេញតម្រូវការរបស់ខ្លួន ទើបឈានដល់ករណីសម្លាប់នេះ។
មន្ត្រីអធិការដ្ឋាននគរបាលស្រុកវាលវែង លោក សូឡី មេសា ឱ្យដឹងថា សមត្ថកិច្ចបានឃើញសាកសពជនរងគ្រោះ នៅថ្ងៃទី១០ ខែវិច្ឆិកា ២០២១ វេលាម៉ោង ២០ៈ៣១នាទីយប់។
លោក សូឡី មេសា ប្រាប់ថា៖ «បន្ទប់គាត់ស្នាក់នៅតែម្នាក់ឯងទេ! គាត់ស្លាប់នៅលើគ្រែរបស់គាត់ក្នុងបន្ទប់របស់គាត់ ឯស្នាក់ការមេព្រៃ កន្លែងគាត់ធ្វើការនៅហ្នឹងបណ្តោះអាសន្ន។ គេយកកាំបិទផ្គាក់កាប់គាត់ ពេលកំពុងសម្រាន្តក្នុងបន្ទប់របស់គាត់ពេលយប់»។
លោកថា តំបន់នោះក៏ជាប្រជុំជនដែរ តែមិនសូវមានប្រជាជនចាប់អារម្មណ៍ថា មានករណីឃាតកម្មកើតឡើងបែបនេះទេ ខណៈកន្លងមកទីនោះមិនធ្លាប់មានបញ្ហាអ្វីកើតឡើង។
ចំណែកមន្ត្រីសម្របសម្រួលអង្គការលីកាដូប្រចាំខេត្តពោធិ៍សាត់ លោកស្រី មិន សាមួន បានអំពាវនាវឱ្យអាជ្ញាធរពន្លឿនការស៊ើបអង្កេត ដើម្បីស្វែងរកចាប់ជនប្រព្រឹត្តមកផ្ដន្ទាទោសតាមច្បាប់។
លោកស្រីនិយាយថា៖ «ពេលគាត់ស្ថិតនៅក្នុងការសង្ស័យ យើងគ្រាន់តែគិតទេថាតើក្មេង [វ័យ] ប៉ុណ្ណឹង មានការគិតបានប៉ុណ្ណា? អាហ្នឹងយើងគ្រាន់តែគិតទេ។ តែខ្ញុំមិនទាន់ច្បាស់ទេ ថាការផ្ដល់ព័ត៌មាន [សន្និដ្ឋាន] របស់សមត្ថកិច្ច វាជាការពិតឬវាម៉េចទេ! យើងអត់ទាន់ច្បាស់ទេ! ព្រោះដំណាក់កាលនេះ វាស្ថិតក្នុងដំណាក់កាលស៊ើបអង្កេតទេ មិនអ៊ីចឹង?»៕
