អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចេញសេចក្ដីថ្លែងការណ៍នៅថ្ងៃនេះ ដោយអំពាវនាវឱ្យអាជ្ញាធរកម្ពុជាទម្លាក់ចោលការចោទប្រកាន់និងដោះលែងសកម្មជននយោបាយ២នាក់វិញ ដោយឥតលក្ខខណ្ឌ។
នៅក្នុងសេចក្ដីថ្លែងការណ៍មួយពីទីក្រុងបាងកកប្រទេសថៃ អង្គការឃ្លាំមើលសិទ្ធិមនុស្សអន្តរជាតិ (Human Rights Watch) បានចាត់ទុកការចាប់បញ្ជូនជនភៀសខ្លួននយោបាយពីរនាក់ គឺលោក វឿន វាសនា ហៅ ក្រញូងព្រៃឡង់ និងលោក វឿង សំណាង ដោយអាជ្ញាធរថៃមកកាន់ប្រទេសកម្ពុជា កាលពីថ្ងៃទី៩ ខែវិច្ឆិកា ថាជាការដាក់ពួកគេឱ្យប្រឈមនឹងហានិភ័យខ្ពស់នៃការកាត់ទោសដោយអយុត្តិធម៌នៅក្នុងប្រទេសកម្ពុជា។ អង្គការនេះបានអំពាវនាវឱ្យអាជ្ញាធរកម្ពុជា គួរតែទម្លាក់ចោលការចោទប្រកាន់តាមបែបនយោបាយនិងដោះលែងពួកគេវិញដោយឥតលក្ខខណ្ឌ។
លោក វឿន វាសនា និងលោក វឿង សំណាង ជាសកម្មជនអតីតគណបក្សសង្គ្រោះជាតិ បច្ចុប្បន្នត្រូវបានគេដឹងថា កំពុងស្ថិតនៅក្រោមការឃុំខ្លួនបណ្ដោះអាសន្ននៅពន្ធនាគារព្រៃសរ (ម១) បន្ទាប់ពីពួកគេត្រូវបានអាជ្ញាធរថៃចាប់ខ្លួនកាលពីល្ងាចថ្ងៃទី៨ ខែវិច្ឆិកា និងបានបញ្ជូនខ្លួនមកឱ្យអាជ្ញាធរកម្ពុជា កាលពីថ្ងៃទី៩ ខែវិច្ឆិកា ឆ្នាំ២០២១។
បើតាមអង្គការឃ្លាំមើលសិទ្ធិមនុស្សអន្តរជាតិ លោក វឿង សំណាង បានរត់ភៀសខ្លួនទៅកាន់ប្រទេសថៃ នៅឆ្នាំ២០២០ បន្ទាប់ពីតុលាការបានចោទប្រកាន់លោកពីបទ «ញុះញង់ និងប្រព្រឹត្តបទឧក្រិដ្ឋជាអាទិ៍» កាលពីខែកញ្ញា ឆ្នាំ២០១៩។
ចំណែកលោក វឿន វាសនា ហៅ ក្រញូងព្រៃឡង់ បានភៀសខ្លួនទៅកាន់ប្រទេសថៃ នៅដើមឆ្នាំ២០២០ បន្ទាប់ពីមានការបង្ក្រាបលើអ្នកនយោបាយអតីតបក្សប្រឆាំង។ នៅខែមេសា ឆ្នាំ២០២១ លោកត្រូវបានអាជ្ញាធរកម្ពុជាចោទប្រកាន់ពីបទ «ញុះញង់ឱ្យវឹកវរដល់សន្តិសុខសង្គម» តាមមាត្រា៤៩៤ និងមាត្រា៤៩៥ នៃក្រមព្រហ្មទណ្ឌកម្ពុជា និងមាត្រា១១ នៃច្បាប់ស្ដីពីការប្រយុទ្ធប្រឆាំងនឹងជំងឺកូវីដ-១៩។
កាលពីថ្ងៃទី៩ ខែតុលា ឆ្នាំ២០២១ លោក វឿន វាសនា បានប្រើគណនីហ្វេសប៊ុកឈ្មោះ «ព្រៃឡង់ ក្រញូង» ចូលទៅបញ្ចេញមតិរិះគន់លោកនាយករដ្ឋមន្ត្រី ហ៊ុន សែន ថាបានដឹកនាំប្រទេសឱ្យមានវិនាសកម្មព្រៃឈើ ការកែច្បាប់រដ្ឋធម្មនុញ្ញ និងការអនុវត្តច្បាប់មិនត្រឹមត្រូវនៅកម្ពុជា រហូតធ្វើឱ្យលោកនាយករដ្ឋមន្ត្រីខឹងសម្បារ និងបានបញ្ជារឱ្យតាមរកចាប់ខ្លួនលោក វឿន វាសនា៕