មន្ត្រីជាន់ខ្ពស់អតីតគណបក្សសង្គ្រោះជាតិ (CNRP) បញ្ជាក់ជំហរថា ខ្លួននឹងយកទីតាំងស្នាក់ការអតីតគណបក្សដែលតុលាការដាក់លក់ដោយបង្ខំមកប្រើប្រាស់វិញ នៅពេលណាលោក សម រង្ស៊ី បានចូលទៅប្រទេសកម្ពុជា។
ដីការបស់តុលាការដែលដាក់លក់ដោយបង្ខំនូវស្នាក់ការកណ្ដាលគណបក្សសង្គ្រោះជាតិ ត្រូវបានមន្រ្តីនគរបាលយុត្តិធម៌យកទៅបិទនៅទីស្នាក់ការបក្ស នៅសង្កាត់ចាក់អង្រែលើ រាជធានីភ្នំពេញ នៅព្រឹកថ្ងៃទី១៥ ខែវិច្ឆិកា ឆ្នាំ២០២១ ដោយក្នុងដីកាបញ្ជាក់ថា ថវិកាដែលលក់បានដោយបង្ខំនេះនឹងត្រូវបង្វិលឱ្យទៅម្ចាស់បំណុលដែលជាភាគីដើមបណ្ដឹងក្នុងទំហំទឹកប្រាក់រាប់ម៉ឺនដុល្លារអាមេរិក។
មន្រ្តីដែលស្និទ្ធនឹងលោក សម រង្ស៊ី គឺលោក ម៉ែន សុថាវរិន្ទ្រ អតីតតំណាងរាស្រ្តគណបក្សសង្រ្គោះជាតិ ប្រចាំមណ្ឌលសៀមរាប ប្រតិកម្មតបទៅនឹងដីកានេះ ដោយចោទរដ្ឋាភិបាលរបស់លោកនាយករដ្ឋមន្រ្តី ហ៊ុន សែន ថាភ័យខ្លាចចំពោះទណ្ឌកម្មអន្តរជាតិ ក្នុងនោះមានទាំងសហរដ្ឋអាមេរិកនិងអឺរ៉ុប ទើបធ្វើឱ្យលោកនាយករដ្ឋមន្រ្តីបានចេញបញ្ជាបែបនេះ។
លើសពីនេះទៅទៀត លោក ម៉ែន សុថាវរិន្រ្ទ អះអាងថា បើទោះជានៅពេលនេះ ទីស្នាក់ការកណ្ដាលរបស់អតីតគណបក្សត្រូវបានដាក់លក់ ហើយពិតជាមានអ្នកហ៊ានទិញមែននោះ ក៏វាគ្មានន័យអ្វីឡើយសម្រាប់ទិញ។ បើតាមអតីតតំណាងរាស្រ្តរូបនេះ នៅពេលណាលោក សម រង្ស៊ី បានវិលចូលប្រទេសកម្ពុជាពេលណា លោកនឹងប្រើប្រាស់សិទ្ធិរបស់លោកក្នុងនាមជាម្ចាស់កម្មសិទ្ធិអចលនទ្រព្យទាមទារយកមកវិញ។
លោកបន្តថា៖ «អ្នកណាទិញឱ្យគេទិញទៅ អ្នកណាហ៊ានទិញក៏ទិញទៅ។ ប៉ុន្តែបើលោក សម រង្ស៊ី គាត់ត្រលប់ទៅវិញ គាត់នឹងយកមកវិញហើយ ព្រោះជាផ្ទះរបស់គាត់។ គាត់មានប្លង់រឹងប្លង់អីត្រឹមត្រូវ ក្រែងប្រទេសមានច្បាប់»។
ចៅក្រមអនុវត្តសាលាដំបូងរាជធានីភ្នំពេញ លោក អ៊ឹម វណ្ណៈ បានចេញដីកាដែលពុំឃើញមានកាលបរិច្ឆេទ បញ្ជាក់ថា ម្ចាស់បំណុលនៃសំណុំរឿងនេះ រួមមាន លោកនាយករដ្ឋមន្រ្តី ហ៊ុន សែន, លោក ហេង សំរិន ប្រធានរដ្ឋសភា, លោក ស ខេង រដ្ឋមន្រ្តីក្រសួងមហាផ្ទៃ និងរដ្ឋាភិបាល។ ដោយឡែក កូនបំណុល រួមមាន លោក សម រង្ស៊ី អតីតប្រធានគណបក្សសង្រ្គោះជាតិ និងសហកូនបំណុលម្នាក់ទៀត លោកស្រី ជូឡុង សូមូរ៉ា ដែលជាភរិយារបស់លោក សម រង្ស៊ី។
បើតាមកម្មវត្ថុក្នុងដីកាដដែលនេះ សុំឱ្យអនុវត្តតាមវិធានបង្ខំដោយផ្ទាល់ លក់ដោយបង្ខំនូវអចលនវត្ថុមានបណ្ណសំគាល់សិទ្ធិកាន់កាប់អចលនវត្ថុ ចេញដោយមន្ទីររៀបចំដែនដី នគរូបនីយកម្ម និងសំណង់ មានទីតាំងស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ ដែលជាកម្មសិទ្ធិរបស់កូនបំណុល គឺលោក សម រង្ស៊ី ដើម្បីទទួលបានការសង តាមអំណាចសាលដីកាស្ថាពររបស់តុលាការកំពូល។
ក្នុងដីកានីមួយៗបានបញ្ជាក់នូវទឹកប្រាក់ដែលម្ចាស់បំណុលនីមួយៗទាមទារពីកូនបំណុល ក្នុងនោះ លោក ហេង សំរិន បានទាមទារនូវទឹកប្រាក់ជាង៦ម៉ឺន២ពាន់ដុល្លារអាមេរិក, លោកនាយករដ្ឋមន្ត្រី ហ៊ុន សែន ប្រមាណ១លានដុល្លារ, រដ្ឋាភិបាលប្រមាណ៤៥ម៉ឺនដុល្លារ និងលោក ស ខេង ប្រមាណ៥០ម៉ឺនដុល្លារ។
សម្រាប់លោក គឹម សុខ អ្នកវិភាគនយោបាយ យល់ឃើញថា នេះមិនមែនជាការអនុវត្តតាមនីតិវិធីច្បាប់ទេ ផ្ទុយទៅវិញ ជាការរំលោភទាំងស្រុងទៅនឹងបទដ្ឋាននានា និងជារឿងអយុត្តិធម៌មួយសម្រាប់ អតីតគណបក្សប្រឆាំង។ អ្នកវិភាគរូបនេះបន្ថែមថា នេះជាយុទ្ធសាស្រ្តបំផ្លាញអតីតគណបក្សប្រឆាំងឱ្យដល់ទីបំផុត ហើយរដ្ឋាភិបាលក៏ចង់បង្ហាញសារទៅសហគមន៍អន្តរជាតិ ជាពិសេសសហរដ្ឋអាមេរិក ពីភាពខ្លាំងរបស់ខ្លួនផងដែរ។
បើតាមលោក គឹម សុខ នេះជាផែនការដ៏មុតស្រួចក្នុងរូបមន្តបំបែកអតីតគណបក្សប្រឆាំងដ៏មានប្រសិទ្ធភាពថែមទៀតផង។
លោកបន្តថា៖ «ដូច្នេះ គេគ្មានគោលដៅឯណាក្នុងការពង្រឹងប្រជាធិបតេយ្យទេ ម៉្លោះហើយអ្វីដែលជាមូលដ្ឋានសំខាន់របស់អ្នកប្រជាធិបតេយ្យ មានតែហ៊ានតវ៉ាជាចំហតែប៉ុណ្ណោះ! ប្រសិនបើនៅស្ងៀមទៀត គឺលោក ហ៊ុន សែន នឹងកម្ទេចទាល់តែវាលតែម្ដង»។
បើតាមលោក គឹម សុខ នេះជាឱកាសល្អទៅវិញទេ ដែលក្រុមអតីតគណបក្សប្រឆាំងហ៊ានងើបតវ៉ា នៅអំឡុងពេលនៃកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះ។ ក្នុងន័យនេះ លោកថា ប្រសិនបើសំឡេងតស៊ូមតិកើតឡើង មានន័យថា វេទិកាអាស៊ាននឹងក្លាយទៅជាវេទិកាសួរដេញដោលពីសហគមន៍អន្តរជាតិអំពីវិបត្តិនយោបាយនៅកម្ពុជា។
សាលាដំបូងរាជធានីភ្នំពេញ កាលពីថ្ងៃទី០១ ខែមីនា ឆ្នាំ២០២១ បានប្រកាសសាលក្រមកំបាំងមុខដាក់ទោសលោក សម រង្ស៊ី ឱ្យជាប់ពន្ធនាគាររយៈពេល២៥ឆ្នាំ ហាមមិនឱ្យបោះឆ្នោតនិងឈរឈ្មោះ ក្រោមបទចោទ «ប៉ុនប៉ងធ្វើរដ្ឋប្រហារផ្ដួលរំលំរដ្ឋាភិបាល»។
ក្រៅពីលោក សម រង្ស៊ី សាលក្រមនៅពេលនោះក៏បានសម្រេចដាក់ទោសលោកស្រី មូរ សុខហួរ និងលោក អេង ឆៃអ៊ាង ឱ្យជាប់ពន្ធនាគារម្នាក់ៗចំនួន២២ឆ្នាំ។ ដោយឡែក លោកស្រី ជូឡុង សូមូរ៉ា, លោក ម៉ែន សុថាវរិន្ទ្រ, លោក អ៊ូ ច័ន្ទឫទ្ធិ, លោក ហូរ វ៉ាន់, លោក ឡុង រី និងលោក នុត រំដួល ផ្ដន្ទាទោសដាក់ពន្ធនាគារក្នុងម្នាក់ៗចំនួន២០ឆ្នាំ។
តែយ៉ាងណា ការប្រកាសសាលក្រមនៅពេលនេះ ជំរុញឱ្យមានប្រតិកម្មពីស្ថានទូតលោកសេរីប្រចាំនៅកម្ពុជា ក្នុងនោះមានទាំងសហរដ្ឋអាមេរិក សហភាពអឺរ៉ុប និងអាល្លឺម៉ង់ផងដែរ ដោយពួកគេចាត់ទុកវិធានការនោះថា ជាការព្រួយបារម្ភអំពីការកាត់ទោសក្រុមមេដឹកនាំអតីតគណបក្សប្រឆាំងនៅកម្ពុជា ដែល «ធ្វើឡើងក្រោមដំណើរការនីតិវិធីខ្វះភាពត្រឹមត្រូវ» និងជំរុញឱ្យបើកលំហនយោបាយឡើងវិញ៕
