ប្រជាសហគមន៍អះអាងថា ព្រៃឈើប្រមាណ១៥ហិកតារបស់សហគមន៍ព្រៃឈើក្បាលអូរធ្នង់ ស្ថិតឃុំដងកាំបិត ស្រុកសណ្ដាន់ ខេត្តកំពង់ធំ រងការកាប់បំផ្លាញជាបន្តបន្ទាប់ ខណៈអាជ្ញាធរបញ្ជាក់ថាខ្លួនកំពុងស៊ើបរកជនល្មើស។
ប្រធានសហគមន៍ព្រៃឈើក្បាលអូរធ្នង់ លោក ប៊ុត បាន ប្រាប់ វីអូឌី នៅថ្ងៃចន្ទនេះថា ព្រៃឈើក្នុងសហគមន៍ក្បាលអូរធ្នង់ ត្រូវបានជនមិនស្គាល់មុខចូលទន្ទ្រាននិងកាប់បំផ្លាញជាបន្តបន្ទាប់រយៈពេល៤ខែហើយ។ លោកថា លោកបានរាយការណ៍ករណីនេះទៅរដ្ឋបាលព្រៃឈើ និងអាជ្ញាធរឃុំ ឱ្យជួបទប់ស្កាត់ដែរ ប៉ុន្តែអាជ្ញាធរទាំងនោះហាក់មិនសកម្មក្នុងការចូលរួមទប់ស្កាត់ឡើយ។
ប្រធានសហគមន៍រូបនេះបារម្ភពីការបាត់បង់ដីនិងព្រៃឈើសហគមន៍មួយនេះឆាប់រហ័ស ប្រសិនបើពុំមានការចូលរួមទប់ស្កាត់ពីអាជ្ញាធរពាក់ព័ន្ធទាន់ពេលវេលា ខណៈសហគមន៍ក៏ជួបបញ្ហាខ្វះខាតថវិកាសម្រាប់ការចំណាយផ្សេងៗលើការធ្វើដំណើរចុះល្បាតព្រៃសហគមន៍នេះផងដែរ។
លោកបន្ថែមថា៖ «ពួកខ្ញុំបារម្ភពីការបាត់ព្រៃឈើយ៉ាងឆាប់រហ័សហ្នឹងហើយ បានជារាល់ថ្ងៃហ្នឹងខិតខំការពារ ដើម្បីទុកសម្រាប់កូនចៅជំនាន់ក្រោយ។ អ្នកដែលហ៊ានកាប់ ភាគច្រើនមានតែអ្នកមានអំណាច អ្នកក្រីក្រមិនសូវហ៊ានប៉ុន្មានទេ។ រដ្ឋបាលព្រៃឈើ គាត់មិនសូវសកម្មប៉ុន្មានទេក្នុងការចុះល្បាត គាត់តែងយកព័ត៌មានពីយើងដែរ ប៉ុន្តែយើងរាល់ថ្ងៃហ្នឹងខ្វះថវិកាសម្រាប់ការធ្វើដំណើរចុះល្បាតដែរ អ៊ីចឹងហើយបានយើងមិនសូវបានចុះល្បាត ហើយជនល្មើសចេះតែលួចកាប់»។
សមាជិកសហគមន៍នេះ លោក សុខ ប្លោក បានដាក់ការសង្ស័យថា ករណីកាប់បំផ្លាញព្រៃឈើក្នុងសហគមន៍ក្បាលអូរធ្នង់ អាចមានជាប់ពាក់ព័ន្ធរវាងជនល្មើសនិងអាជ្ញាធរផ្នែកណាមួយ ព្រោះពេលសហគមន៍រាយការណ៍អំពីបញ្ហានេះ ខាងអាជ្ញាធរមិនបានចុះទប់ស្កាត់ឱ្យបានទាន់ពេលវេលា និងកោះហៅអ្នកពាក់ព័ន្ធមកធ្វើកិច្ចសន្យាបញ្ឈប់សកម្មភាពឡើយ។
លោកបន្តថា បើសិនព្រៃសហគមន៍មួយនេះត្រូវបាត់បង់ នោះនឹងធ្វើឱ្យប៉ះពាល់ដល់មុខរបរមួយចំនួនរបស់ប្រជាសហគមន៍ ដូចជា បោចវល្លិ រកឃ្មុំ ដកផ្សិត និងរកផ្លែឈើព្រៃ ជាដើម។
លោកបន្ថែមថា៖ «អាជ្ញាធរភូមិឃុំយើងធ្លាប់រាយការណ៍ទៅគាត់ [រដ្ឋបាលព្រៃឈើ] ដែរ ប៉ុន្តែពួកគាត់មិនព្យាយាមរកជនល្មើសជាមួយយើងជាប្រជាសហគមន៍ទេ។ អ្វីដែលជាការព្រួយបារម្ភរបស់ខ្ញុំ គឺព្រៃឈើវាមានសារៈសំខាន់សម្រាប់ពួកខ្ញុំដែលរស់នៅជាប់នឹងព្រៃ។ ពួកខ្ញុំចូលទៅដកអនុផលពីព្រៃហ្នឹងទៅតាមរដូវកាល ដូចជា រដូវកាលដកផ្សិត រដូវកាលបេះផ្លែឈើ រដូវកាលរកឃ្មុំ និងរកអីផ្សេងៗទៀត។ ប៉ុន្តែបើសិនជាបាត់បង់ព្រៃទៅ ទី១ គឺបាត់បង់អត្តសញ្ញាណមុនគេ និងទី២ បាត់បង់មុខរបរដូចខ្ញុំលើកឡើង»។
នាយសង្កាត់រដ្ឋបាលព្រៃឈើស្រុកសណ្ដាន់ លោក តាន់ ផាន់នី ទទួលស្គាល់ថា មានករណីកាប់ព្រៃឈើក្នុងសហគមន៍ក្បាលអូរធ្នង់នេះពិតមែន។ លោកថា ករណីនេះ លោកកំពុងស្រាវជ្រាវរកជនល្មើស និងបានដាក់ពាក្យបណ្ដឹងទៅតុលាការរួចហើយដែរ។
នាយសង្កាត់រដ្ឋបាលព្រៃឈើរូបនេះ បន្តថា រូបលោកនិងអាជ្ញាធរពាក់ព័ន្ធតែងតែចុះអន្តរាគមន៍ភ្លាមៗនៅពេលដែលសហគមន៍រាយការណ៍ ជុំវិញការទន្ទ្រាននិងការកាប់ព្រៃសហគមន៍នេះ។ លោក តាន់ ផាន់នី ស្នើដល់សហគមន៍បន្តជួយស្រាវជ្រាវរកមុខជនល្មើស និងរាយការណ៍ជូនរដ្ឋបាលព្រៃឈើ ហើយក៏ស្នើដល់ប្រជាពលរដ្ឋឱ្យបញ្ឈប់ការរុករានទន្ទ្រានយកដីនិងកាប់បំផ្លាញព្រៃសហគមន៍នេះបន្តទៀតផងដែរ។
លោកបន្ថែមថា៖ «ខ្ញុំបានត្រៀមស្លាករួចជាស្រេចទៀត ដើម្បីសហគមន៍គាត់យកទៅវាយ[ដាក់]កន្លែងកាប់ហ្នឹងថា ព្រៃហ្នឹងយើងបានប្ដឹងទៅតុលាការរួចហើយ ដើម្បីឱ្យអាអ្នកលួចកាប់វាដឹង។ ហើយខ្ញុំនឹងឱ្យមន្ត្រីខ្ញុំចុះពិនិត្យមើលថា វាកាប់រាលដល់ណាទៀត ពីព្រោះកាលខ្ញុំចុះទៅលើកមុន វាកាប់អស់ប្រហែលជាង៩ហិកតាទេ»។
មន្ត្រីគម្រោងតស៊ូមតិនៃគម្រោងអ្នកការពារព្រៃឈើ នៃសមាគមបណ្ដាញយុវជនកម្ពុជា លោក សាន់ ម៉ាឡា មានប្រសាសន៍ថា សហគមន៍ព្រៃឈើជាច្រើននៅកម្ពុជាបានរងការកាប់បំផ្លាញនិងទន្ទ្រានយកធ្វើកម្មសិទ្ធិពីសំណាក់ប្រជាពលរដ្ឋនៅក្រៅខេត្តនិងក្នុងខេត្ត។ លោកថា បញ្ហានេះកើតឡើងដោយសារកម្សោយនៃការអនុវត្តច្បាប់របស់អាជ្ញាធរពាក់ព័ន្ធ។
លោកបន្ថែមថា៖ «ដូច្នេះ ក្នុងនាមយើងជាអ្នកធ្វើការងារលើបញ្ហាបរិស្ថាននិងព្រៃឈើ យើងបានទទូចនិងស្នើម្ដងហើយម្ដងទៀតឱ្យអាជ្ញាធរមេត្តាយកចិត្តទុកដាក់ការពារដីព្រៃសហគមន៍ដែលកំពុងតែរងការកាប់បំផ្លាញពីមួយថ្ងៃទៅមួយថ្ងៃនេះ។ បើសិនជាអាជ្ញាធរមិនយកចិត្តទុកដាក់ការពារទេ មិនលើកកម្ពស់ការចូលរួមរបស់សហគមន៍ឬផ្ដល់តម្លៃដល់អ្នកការពារទេ ថ្ងៃអនាគត កម្ពុជាយើងនឹងរងវិបត្តិយ៉ាងច្រើនពីការបាត់បង់ព្រៃឈើដ៏ធ្ងន់ធ្ងរនេះ»។
បើតាមប្រធានសហគមន៍នេះ «សហគមន៍ព្រៃឈើក្បាលអូរធ្នង់» បានចុះបញ្ជីទទួលស្គាល់ដោយរដ្ឋាភិបាល កាលពីឆ្នាំ២០១០ ដែលមានផ្ទៃដី២ ៨៩១,៣៣ហិកតា មានប្រជាពលរដ្ឋចំនួន២ភូមិ នៃឃុំដងកាំបិត ដែលបានចូលអាស្រ័យផលពីសហគមន៍មួយនេះ៕