រដ្ឋសភាគ្រោងបើកសម័យប្រជុំរបស់ខ្លួននៅថ្ងៃព្រហស្បតិ៍សប្ដាហ៍នេះ ដើម្បីបោះឆ្នោតជ្រើសតាំងលោក ជៀម យៀប ជាអនុប្រធានទី១ថ្មីនៃរដ្ឋសភា និងការតែងតាំងនិងដោះដូរតួនាទីសមាជិកខ្លះនៃគណៈកម្មការមួយចំនួនរបស់រដ្ឋសភា។
នៅព្រឹកថ្ងៃចន្ទនេះ គណៈកម្មាធិការអចិន្ត្រៃយ៍រដ្ឋសភាបានបើកកិច្ចប្រជុំ ដោយពិភាក្សានិងអនុម័តលើរបៀបវារៈមួយចំនួន។
ក្រោយកិច្ចប្រជុំនោះ រដ្ឋសភាបានចេញសេចក្ដីប្រកាសព័ត៌មានមួយជុំវិញលទ្ធផលនៃកិច្ចប្រជុំគណៈកម្មការអចិន្ត្រៃយ៍នោះ ដោយអង្គប្រជុំបានអនុម័តទទួលស្គាល់លោក អ៊ុន ប៊ុនហាន ជាតំណាងរាស្ត្រថ្មីមណ្ឌលខេត្តកំពង់ធំ ជំនួយលោក ងួន ញ៉ិល ដែលបានទទួលមរណភាព និងសម្រេចលើសំណើសុំជ្រើសតាំងតំណាងរាស្ត្រនៃគណបក្សប្រជាជនកម្ពុជា លោក ជាម យៀប ជាអនុប្រធានទី១រដ្ឋសភា ដើម្បីដាក់ជូនសម័យប្រជុំរដ្ឋសភានាពេលខាងមុខ បោះឆ្នោតផ្ដល់សេចក្តីទុកចិត្ត។
ក្រៅពីនោះ អង្គប្រជុំគណៈកម្មាធិការអចិន្ត្រៃយ៍រដ្ឋសភា ក៏បានអនុម័តសំណើសុំជ្រើសតាំងតំណាងរាស្ត្រនៃគណបក្សប្រជាជនកម្ពុជា រួមមាន លោក ឈាង វុន ជាសមាជិកគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា និងលោក ជៀប ស៊ីវន ជាសមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភា រួមនឹងដាក់បញ្ចូលសេចក្ដីព្រាងច្បាប់មួយចំនួនក្នុងរបៀបវារៈសម័យប្រជុំរដ្ឋសភានាពេលខាងមុខផងដែរ។
បើតាមសេចក្ដីប្រកាសព័ត៌មាន អង្គប្រជុំបានអនុម័តកាលបរិច្ឆេទបន្តសម័យប្រជុំរដ្ឋសភាលើកទី៦ នីតិកាលទី៦ នៅព្រឹកថ្ងៃទី២៥ ខែវិច្ឆិកា ឆ្នាំ២០២១ ដើម្បីសម្រេចសុពលភាពអ្នកតំណាងរាស្ត្រថ្មីនៅមណ្ឌលកំពង់ធំ ការបោះឆ្នោតជ្រើសតាំងអនុប្រធានទី១ថ្មីនៃរដ្ឋសភា ការជ្រើសតាំងសមាជិកគណៈកម្មការចំនួន២ខាងលើ និងការពិភាក្សានិងអនុម័តលើសេចក្ដីព្រាងច្បាប់មួយចំនួនទៀត៕