ប្រធានាធិបតីចិន លោក ស៊ី ជីនពីង បានថ្លែងប្រាប់មេដឹកនាំនៃសមាគមប្រជាជាតិអាស៊ីអាគ្នេយ៍ (អាស៊ាន) ទាំង១០ប្រទេស នៅក្នុងកិច្ចប្រជុំកំពូលមួយនៅថ្ងៃចន្ទនេះថា ចិននឹងមិនធ្វើទុក្ខបុកម្នេញលើប្រទេសជិតខាងតូចៗក្នុងតំបន់របស់ខ្លួននោះទេ ស្របពេលដែលភាពតានតឹងនៃសមុទ្រចិនខាងត្បូងកើនឡើង។ នេះបើតាមការផ្សព្វផ្សាយរបស់ទីភ្នាក់ងារសារព័ត៌មាន Reuters។
ការទាមទារទឹកដីរបស់ចិនក្នុងសមុទ្រចិនខាងត្បូង បានបង្កើតឱ្យមានជាការប៉ះទង្គិចគ្នាជាមួយបណ្ដាប្រទេសអាស៊ីអាគ្នេយ៍មួយចំនួន ខណៈករណីនេះក៏បានបង្កឱ្យមានជាការព្រួយបារម្ភពីសំណាក់សហរដ្ឋអាមេរិក និងជប៉ុនផងដែរ។
ទោះជាយ៉ាងណា លោក ស៊ី ជីនពីង បានថ្លែងថា ចិននឹងមិនស្វែងរកអនុត្តរភាព ឬទាញយកផលប្រយោជន៍ពីទំហំអំណាចរបស់ខ្លួន ដើម្បីបង្ខិតបង្ខំប្រទេសតូចៗនោះទេ ហើយខ្លួននឹងធ្វើការជាមួយអាស៊ាន ដើម្បីលុបបំបាត់ «ការជ្រៀតជ្រែកកិច្ចការផ្ទៃក្នុង»។
ប្រព័ន្ធផ្សព្វផ្សាយរដ្ឋចិនបានស្រង់សម្ដីប្រធានាធិបតីរូបនេះដែលបានលើកឡើងថា៖ «ប្រទេសចិន នឹងតែងតែជាអ្នកជិតខាងល្អ មិត្តល្អ និងជាដៃគូដ៏ល្អរបស់អាស៊ានជានិច្ច»។
គួរបញ្ជាក់ថា អាមេរិកបានថ្កោលទោសម្ដងហើយម្ដងទៀតចំពោះទង្វើរបស់ចិនក្នុងការទាមទារទឹកដីនៅក្នុងសមុទ្រចិនខាងត្បូង ដែលពាក់ព័ន្ធជាមួយប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់ និងវៀតណាម៕