គណបក្សកែទម្រង់កម្ពុជារបស់លោក អ៊ូ ច័ន្ទរ័ត្ន និងលោក ប៉ុល ហំម នឹងធ្វើសមាជនៅថ្ងៃទី២២ ខែមករា ឆ្នាំ២០២២ខាងមុខនេះ បើគ្មានការប្រែប្រួលទេនោះ។
គណបក្សនេះធ្លាប់បានលើកពេលធ្វើសមាជរបស់ខ្លួនម្ដងរួចហើយ កាលពីថ្ងៃទី២៣ ខែតុលា ឆ្នាំ២០២១ ដែលត្រូវនឹងខួបលើកទី៣០ នៃកិច្ចព្រមព្រៀងសន្តិភាពទីក្រុងប៉ារីស។
ស្ថាបនិកគណបក្សកែទម្រង់កម្ពុជា លោក អ៊ូ ច័ន្ទរ័ត្ន បានប្រាប់ វីអូឌី នៅថ្ងៃទី២៤ ខែវិច្ឆិកា ថាការកំណត់យកថ្ងៃទី២២ ខែមករា ឆ្នាំ២០២២ ជាថ្ងៃធ្វើសមាជគណបក្ស គឺមិនមែនជាថ្ងៃពិសេសអ្វីនោះទេ។ ក៏ប៉ុន្តែលោកគូសបញ្ជាក់ថា ជាពេលវេលាដើម្បីងាយស្រួលក្នុងការធ្វើសមាជ ដែលមានការចូលរួមពីសមាជិកទាំងក្នុងនិងក្រៅប្រទេស និងងាយស្រួលក្នុងការបញ្ជូនសារនយោបាយទៅកាន់ប្រជាពលរដ្ឋ ព្រោះជាពេលវេលាខិតជិតការបោះឆ្នោតឃុំ-សង្កាត់ផង និងដើម្បីរៀបចំបញ្ជីឈ្មោះបេក្ខជនឈរឈ្មោះបោះឆ្នោតឃុំ-សង្កាត់ផង។
គណបក្សកែទម្រង់កម្ពុជា បង្កើតឡើងដោយអតីតមន្ត្រីជាន់ខ្ពស់គណបក្សប្រឆាំង ដែលរួមមាន លោក អ៊ូ ច័ន្ទរ័ត្ន អតីតតំណាងរាស្ត្រ និងលោក ប៉ុល ហំម អតីតតំណាងរាស្ត្រ និងជាអតីតអនុប្រធានគណបក្សសង្គ្រោះជាតិ។ គណបក្សកែទម្រង់កម្ពុជា ត្រូវបានក្រសួងមហាផ្ទៃទទួលចុះបញ្ជីជាគណបក្សនយោបាយ កាលពីថ្ងៃទី១៥ ខែកញ្ញា ឆ្នាំ២០២១៕
