ក្រោយដំណឹងយាងសោយទិវង្គតរបស់សម្ដេចក្រុមព្រះ នរោត្ដម រណឬទ្ធិ ត្រូវបានផ្សព្វផ្សាយជាផ្លូវការ ឥស្សរជននយោបាយសំខាន់ៗនៅកម្ពុជាបានផ្ញើសាររំលែកព្រះមរណទុក្ខនេះភ្លាមៗ ដោយបានសម្ដែងភាពក្ដុកក្ដួល និងសោកស្ដាយជាពន់ប្រមាណ និងចាត់ទុកការយាងពិលាល័យរបស់ព្រះអង្គថា ជាការបាត់បង់វរជនក្នុងសែរាជវង្សដ៏ឆ្នើម។
ក្នុងសាររំលែកព្រះមរណទុក្ខរបស់អតីតប្រធានគណបក្សសង្រ្គោះជាតិ លោក កឹម សុខា នៅថ្ងៃទី២៩ ខែវិច្ឆិកា ដែលបានទូលថ្វាយនិងជម្រាបជូនព្រះអង្គម្ចាស់ក្សត្រិយ៍ នរោត្ដម ម៉ារី រណឫទ្ធិ ព្រះរាជបុត្រាបុត្រី និងសមាជិក-សមាជិកាគណបក្សហ៊្វុនស៊ិនប៉ិច បានបង្ហាញក្ដីសង្វែកសោកស្ដាយស្រណោះអាឡោះអាល័យជាអនេកចំពោះការបាត់បង់សម្ដេចក្រុមព្រះ នរោត្ដម រណឫទ្ធិ ដែលជាព្រះស្វាមី ព្រះបិតា និងជាព្រះប្រធានជាទីគោរពស្រឡាញ់បំផុត។
លោក កឹម សុខា សរសេរបន្តថា៖ «ក្នុងឱកាសនេះ ទូលព្រះបង្គំខ្ញុំសូមឧទ្ទិសបួងសួង សូមឱ្យដួងវិញ្ញាណក្ខន្ធសម្ដេចក្រុមព្រះ នរោត្ដម រណឬទ្ធិ សូមយាងទៅសោយក្នុងសុគតិភពកុំបីឃ្លៀងឃ្លាតឡើយ»។
ដោយឡែក សម្រាប់លោកនាយករដ្ឋមន្ត្រី ហ៊ុន សែន វិញ កាលពីយប់ថ្ងៃម្សិលមិញ បានថ្វាយសាររំលែកព្រះមរណទុក្ខជូនព្រះអង្គម្ចាស់ក្សត្រិយ៍ នរោត្ដម ម៉ារី រណឫទ្ធិ និងព្រះរាជបុត្រាបុត្រី ចំពោះការយាងសោយទិវង្គតរបស់សម្ដេចក្រុមព្រះ នរោត្ដម រណឫទ្ធិ ផងដែរ។
ក្នុងសាររំលែកព្រះមរណទុក្ខនោះ លោកនាយករដ្ឋមន្ត្រី ហ៊ុន សែន បានចាត់ទុកការបាត់បង់សម្ដេចក្រុមព្រះ នរោត្តម រណឫទ្ធិ ថាជាការបាត់បង់ព្រះរាជឥស្សរជនក្នុងព្រះរាជវង្សដ៏ល្អឆ្នើមមួយព្រះអង្គ។
លោកលើកឡើងយ៉ាងដូច្នេះថា៖ «ក្នុងឱកាសប្រកបដោយសមានទុក្ខដ៏ក្រៀមក្រំនេះ ទូលព្រះបង្គំនិងភរិយា សូមចូលរួមរំលែកព្រះមរណទុក្ខជាមួយព្រះអង្គម្ចាស់ក្សត្រិយ៍ ជាព្រះជាយា និងព្រះរាជបុត្រា បុត្រី ព្រមទាំងរាជវង្សានុវង្ស ប្រកបដោយអនិច្ចលក្ខណធម៌ សង្វេគសោកស្ដាយស្រណោះ អាឡោះអាល័យស្ទើររកទីបំផុតគ្មាន ព្រោះការបាត់បង់សម្ដេចក្រុមព្រះ នរោត្ដម រណឫទ្ធិ គឺជាការបាត់បង់ព្រះរាជឥស្សរជនក្នុងព្រះរាជវង្សដ៏ល្អឆ្នើមមួយព្រះអង្គ ដែលទ្រង់ពេញព្រះហឫទ័យ ស្នេហាជាតិ សាសនា ព្រះមហាក្សត្រ ប្រកបដោយព្រះឆន្ទៈមនសិការមោះមុត និងវាងវៃជាអតិបរមា»។
សម្រាប់អតីតប្រធានគណបក្សសង្រ្គោះជាតិ និងជាអតីតមន្ត្រីក្រោមឱវាទរបស់សម្ដេចក្រុមព្រះផងនោះ គឺលោក សម រង្ស៊ី កាលពីថ្ងៃទី២៨ ខែវិច្ឆិកា បានលើកឡើងលើទំព័រហ្វេសប៊ុករបស់ខ្លួនថា ព្រះអង្គម្ចាស់ នរោត្ដម រណឫទ្ធិ ជាមេដឹកនាំចលនាតស៊ូមួយរូបគួរឱ្យគោរព កាលពីចុងទសវត្សរ៍ឆ្នាំ១៩៨០ ដល់ការបោះឆ្នោតរៀបចំដោយអង្គការសហប្រជាជាតិ ក្នុងខែឧសភា ឆ្នាំ១៩៩៣។
លោក សម រង្ស៊ី បន្តថា៖ «ខ្ញុំសូមសម្ដែងការគោរពចំពោះវិញ្ញាណក្ខន្ធព្រះអង្គ»។
សម្រាប់សាររំលែកព្រះមរណទុក្ខរបស់ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ លោក ស ខេង នៅថ្ងៃទី២៨ ខែវិច្ឆិកានេះ បានបង្ហាញសេចក្ដីរន្ធត់ តក់ស្លុត និងសង្វេគសោកស្ដាយឥតឧបមា ចំពោះដំណឹងដ៏ក្រៀមក្រំនៃការយាងសោយព្រះទិវង្គតរបស់សម្ដេចក្រុមព្រះ។
អនុប្រធានគណបក្សប្រជាជនកម្ពុជារូបនេះ បានចាត់ទុកការយាងសោយព្រះទិវង្គតរបស់សម្ដេចក្រុមព្រះ នរោត្ដម រណឫទ្ធិ ថាមិនត្រឹមតែជាការបាត់បង់សមាជិកព្រះរាជវង្សានុវង្សដែលជាបញ្ញវន្តដ៏ឆ្នើមមួយព្រះអង្គប៉ុណ្ណោះទេ ប៉ុន្តែក៏ជាការបាត់បង់នូវឥស្សរជនជាន់ខ្ពស់មួយរូបដែលធ្លាប់បានបូជាកម្លាំងព្រះកាយពល និងព្រះបញ្ញាញាណ មិនខ្លាចនឿយហត់ ចូលរួមចំណែកយ៉ាងសកម្មបម្រើក្នុងបុព្វហេតុជាតិ សាសនា និងព្រះមហាក្សត្រ។
សាររំលែកព្រះមរណទុក្ខរបស់លោក ស ខេង បញ្ជាក់ថា៖ «ក្នុងវេលាប្រកបដោយសមានទុក្ខដ៏ក្រៀមក្រំអាឡោះអាល័យបំផុតនេះ ទូលព្រះបង្គំ និងភរិយា ព្រមទាំងថ្នាក់ដឹកនាំ មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ នៃក្រសួងមហាផ្ទៃ សូមចូលរួមរំលែកព្រះមរណទុក្ខជាមួយព្រះអង្គម្ចាស់ក្សត្រិយ៍ ព្រះរាជបុត្រាបុត្រី និងសូមឧទ្ទិសបួងសួងនូវព្រះរាជកុសលថ្វាយដួងព្រះវិញ្ញាណក្ខន្ធសម្ដេចក្រុមព្រះ នរោត្ដម រណឫទ្ធិ សូមទ្រង់យាងទៅកាន់ឋានព្រះបរមសុខក្នុងព្រះសុគតិភពកុំបីឃ្លៀងឃ្លាតឡើយ»។
បើតាមសេចក្ដីជូនដំណឹងរបស់គណបក្សហ៊្វុនស៊ិនប៉ិច បញ្ជាក់ថា សម្ដេចក្រុមព្រះ នរោត្ដម រណឫទ្ធិ ព្រះប្រធានគណបក្សហ៊្វុនស៊ិនប៉ិច និងជាព្រះប្រធានក្រុមឧត្ដមប្រឹក្សាផ្ទាល់ព្រះមហាក្សត្រ ទ្រង់សោយព្រះទិវង្គត កាលពីថ្ងៃអាទិត្យ ទី២៨ ខែវិច្ឆិកា ឆ្នាំ២០២១ វេលាម៉ោង៩និង៤០នាទីព្រឹក នៅប្រទេសបារាំង ត្រូវនឹងម៉ោង៣និង៤០នាទីរសៀលថ្ងៃខែឆ្នាំដដែលនៅប្រទេសកម្ពុជា ក្នុងព្រះជន្មាយុ៧៧ព្រះវស្សា ដោយព្រះរោគាពាធ។
សម្ដេចក្រុមព្រះ នរោត្ដម រណឫទ្ធិ ប្រសូតថ្ងៃទី២ ខែមករា ឆ្នាំ១៩៤៤។ ព្រះអង្គជាព្រះរាជបុត្រទី២ របស់ព្រះបាទសម្ដេច នរោត្ដម សីហនុ ជាមួយអ្នកម្នាង ផាត់ កាញ៉ុល ហើយព្រះអង្គត្រូវជាព្រះរាមព្រះមាតាទីទៃនៃព្រះមហាក្សត្រកម្ពុជាបច្ចុប្បន្ន គឺព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី។
សម្ដេចក្រុមព្រះ នរោត្ដម រណឫទ្ធិ ធ្លាប់បានជាប់ឆ្នោតក្លាយជានាយករដ្ឋមន្រ្តីទី១ នៃប្រទេសកម្ពុជា ចន្លោះពីឆ្នាំ១៩៩៣ រហូតដល់ឆ្នាំ១៩៩៧ ដោយកាលណោះលោក ហ៊ុន សែន ជានាយករដ្ឋមន្ត្រីទី២។ ហើយបន្ទាប់មក ព្រះអង្គក៏បានក្លាយជាព្រះប្រធានរដ្ឋសភា ចន្លោះឆ្នាំ១៩៩៨ ដល់ឆ្នាំ២០០៦។
ក្នុងសេចក្ដីជូនដំណឹងរបស់គណបក្សរាជានិយមមួយនេះ បញ្ជាក់ទៀតថា ព្រះសពរបស់សម្ដេចក្រុមព្រះនឹងត្រូវយាងដង្ហែមកប្រទេសកម្ពុជាក្នុងពេលដ៏ខ្លីខាងមុខ៕
