ព្រះអង្គម្ចាស់ នរោត្ដម ចក្រាវុធ ព្រះប្រធានស្ដីទីគណបក្សហ្វ៊ុនស៊ិនប៉ិច បានប្រកាសស្វាគមន៍អតីតមន្ត្រីជាន់ខ្ពស់គណបក្សរាជានិយមនេះវិលត្រលប់មកវិញ នៅមុនពេលគណបក្សធ្វើសមាជនៅក្នុងខែមករា ឆ្នាំ២០២២ខាងមុខ។
អ្នកនាំពាក្យគណបក្សរាជានិយមហ្វ៊ុនស៊ិនប៉ិច លោក ញឿន រ៉ាដែន បានប្រាប់ វីអូឌី នៅថ្ងៃព្រហស្បតិ៍ថា ការប្រកាសស្វាគមន៍របស់ព្រះអង្គម្ចាស់ នរោត្ដម ចក្រាវុធ បុត្រាសម្ដេចក្រុមព្រះនេះ គឺបន្ទាប់ពីអតីតអនុប្រធានគណបក្សហ្វ៊ុនស៊ិនប៉ិច និងជាស្ថាបនិកគណបក្ស លោក ប៉ោ ប៊ុនស្រ៊ឺ បានប្រកាសគាំទ្រ ព្រះអង្គម្ចាស់ នរោត្ដម ចក្រាវុធ ជាព្រះប្រធាន ដើម្បីដឹកនាំគណបក្សបន្តពីសម្ដេចក្រុមព្រះ នរោត្ដម រណឫទ្ធិ ដែលទើបចូលទិវង្គតកាលពីថ្ងៃទី២៨ ខែវិច្ឆិកា កន្លងទៅនេះ។
លោក ញឿន រ៉ាដែន បានថ្លែងថា៖ «យើងឃើញអ្នកបោះដៃហ្នឹងមកមួយចំនួនធំហើយ។ ជាក់ស្ដែងដូចអ្វីដែលអស់លោកបានឃើញហើយ តាមរយៈសារព័ត៌មាន មានអ្នកចង់មកថ្វាយបង្គំ ហើយតាមគ្នាយើងមួយចំនួនហ្នឹងបានបង្ហើបថាចង់មកថ្វាយបង្គំលោក [ព្រះអង្គម្ចាស់ នរោត្តម ចក្រាវុធ] ហើយលោកថា អត់ជាបញ្ហា លោកស្វាគមន៍ជានិច្ចចំពោះកូនចៅ ជាពិសេសកូនចៅអ្នកស្នេហាជាតិ ឬកូនចៅសម្ដេចក្រុមព្រះទាំងអស់ដែលមានបំណងមកថ្វាយបង្គំលោក បាទ»។
លោក ប៉ោ ប៊ុនស្រ៊ី អតីតអនុប្រធានគណបក្សហ្វ៊ុនស៊ិនប៉ិច បានចូលគាល់ព្រះអង្គម្ចាស់ នរោត្ដម ចក្រាវុធ កាលពីថ្ងៃទី២៨ ខែធ្នូ និងបានសរសេរលិខិតគាំទ្រមួយច្បាប់កាលពីថ្ងៃទី២៨ ខែធ្នូ ថាលោកគាំទ្រព្រះអង្គម្ចាស់ នរោត្ដម ចក្រាវុធ ជាព្រះប្រធានគណបក្សហ្វ៊ុនស៊ិនប៉ិច ដើម្បីដឹកនាំគណបក្សនិងថែរក្សាកេរដំណែលដ៏ពិសិដ្ឋរបស់សម្ដេចតា ស្របតាមព្រះរាជតម្រិះដ៏ថ្លៃថ្លារបស់សម្ដេចក្រុមព្រះ នរោត្ដម រណឫទ្ធិ។
លោកបានសរសេរថា៖ «ក្នុងនាមខ្ញុំជាស្ថាបនិកដែលបានដង្ហែសម្ដេចក្រុមព្រះគ្រប់កាលៈទេសៈកន្លងមក ហើយដើម្បីតបស្នងគុណូបការៈដែលសម្ដេចក្រុមព្រះធ្លាប់ផ្ដល់មករូបខ្ញុំ។ ខ្ញុំសូមដង្ហែព្រះអង្គម្ចាស់នរោត្ដម ចក្រាវុធ ជាបុត្រាជារៀងរហូតលុះអវសាន្ត»។
បើតាមលោក ញឿន រ៉ាដែន គណបក្សហ្វ៊ុនស៊ិនប៉ិច នឹងរៀបចំធ្វើសមាជគណបក្សនៅក្នុងខែមករា ដើមឆ្នាំ២០២២ខាងមុខនេះ ដើម្បីសុំការគាំទ្រពីសមាជិក-សមាជិកា និងអ្នកគាំទ្រ ថ្វាយតួនាទីដល់ព្រះអង្គម្ចាស់ នរោត្ដម ចក្រាវុធ ជាប្រធានគណបក្សហ្វ៊ុនស៊ិនប៉ិច បន្តពីសម្ដេចក្រុមព្រះ នរោត្ដម រណឫទ្ធិ ដែលទើបចូលទិវង្គតកាលពីថ្ងៃទី២៨ ខែវិច្ឆិកា ឆ្នាំ២០២១ ដោយព្រះរោគាពាធនៅប្រទេសបារាំង និងទើបធ្វើព្រះរាជពិធីបុណ្យចប់កាលពីថ្ងៃទី៨ ខែធ្នូ កន្លងទៅ។
ទោះបីជាយ៉ាងណាក៏ដោយ នាយកប្រតិបត្តិអង្គការអភិវឌ្ឍន៍ផ្នត់គំនិត លោក សេក សុជាតិ យល់ថា គណបក្សហ្វ៊ុនស៊ិនប៉ិច នឹងមិនអាចប្រកួតប្រជែងជាមួយគណបក្សដទៃនៅក្នុងការបោះឆ្នោតនៅពេលខាងមុខនេះឡើយ ប្រសិនបើគណបក្សនេះមិនអាចបង្រួបបង្រួមឬដោះស្រាយបញ្ហាជម្លោះផ្ទៃក្នុងរវាងព្រះអង្គម្ចាស់ នរោត្ដម ចក្រាវុធ និងសមាជិកគណៈកម្មាធិការនាយកនៅមុនពេលធ្វើសមាជមកដល់នាពេលខាងមុខនោះ។
លោកមានប្រសាសន៍ថា ៖ «ក្នុងករណីដែលគណបក្សហ្វ៊ុនស៊ិនប៉ិចមិនអាចបង្រួបបង្រួមក្នុងពេលនេះបានទេ ខ្ញុំគិតថា គណបក្សហ្វ៊ុនស៊ិនប៉ិចប្រហែលពិបាកនៅក្នុងការប្រកួតប្រជែងនយោបាយ ហើយក៏ពិបាកក្នុងការបង្រួបបង្រួមហ្វ៊ុនស៊ិនប៉ិចឱ្យក្លាយទៅជាគណបក្សធំមួយឡើងវិញបានណាស់។ ដោយសារយើងឃើញទំនាស់ផ្ទៃក្នុងរបស់គណបក្សហ្វ៊ុនស៊ិនប៉ិចរវាងព្រះអង្គម្ចាស់ ចក្រាវុធ ហើយនិងថ្នាក់ដឹកនាំដែលជាសមាជិកគណៈកម្មាធិការនាយកពីមុនហ្នឹង»។
កាលពីខែកញ្ញាកន្លងទៅ គណបក្សហ្វ៊ុនស៊ិនប៉ិចបានជួបប្រទះនឹងបញ្ហាជម្លោះផ្ទៃក្នុង ដោយក្រុមមន្ត្រីជាន់ខ្ពស់គណបក្សហ្វ៊ុនស៊ិនប៉ិចមួយក្រុមដឹកនាំដោយអនុប្រធានគណបក្សចំនួន៣រូប បានប្រកាសប្ដឹងទៅក្រសួងមហាផ្ទៃ ដើម្បីទាមទារឱ្យព្រះអង្គម្ចាស់ក្សត្រិយ៍ នរោត្ដម ម៉ារី រណឫទ្ធិ ប្រគល់ត្រាគណបក្សមកវិញ។ ក្រោយមក គណបក្សបានសម្រេចបណ្ដេញមន្ត្រីជាន់ខ្ពស់៣នាក់ចេញពីគណបក្ស រួមមាន លោក ហេង ចន្ថា អនុប្រធានបក្ស, លោក សាយ ហាក់ អនុប្រធានគណបក្ស និងលោក ផាន់ សិទ្ធី អគ្គលេខាធិការរងគណបក្ស៕
