រដ្ឋាភិបាលកម្ពុជាបានសម្រេចបង្កើតគណៈកម្មការរៀបចំព្រះពិធីបុណ្យព្រះសពសម្ដេចក្រុមព្រះ នរោត្ដម រណឫទ្ធិ ព្រះប្រធានក្រុមឧត្ដមប្រឹក្សាផ្ទាល់ព្រះមហាក្សត្រ ដោយសហការជាមួយព្រះញាតិវង្សនៃព្រះសព។
យោងតាមសេចក្ដីសម្រេចរបស់រដ្ឋាភិបាលនៅថ្ងៃទី២ ខែធ្នូនេះ បានឱ្យដឹងថា គណៈកម្មការនេះ មានលោកឧបនាយករដ្ឋមន្ត្រី គង់ សំអុល ជាប្រធាន, ព្រះអង្គម្ចាស់ នរោត្ដម ចក្រាវុឌ្ឍ ជាអនុប្រធាន និងអមដោយអនុប្រធាន អនុប្រធានអចិន្ត្រៃយ៍ និងសមាជិកសរុបចំនួន២៦រូបទៀត។
គណៈកម្មការនេះមានភារកិច្ចរៀបចំព្រះពិធីបុណ្យព្រះសពសម្ដេចក្រុមព្រះ នរោត្ដម រណឫទ្ធិ ឱ្យប្រតិបត្តិបានល្អប្រសើរសមស្របតាមប្រពៃណីព្រះពុទ្ធសាសនា និងព្រះរាជវង្សានុវង្ស។ គណៈកម្មការនេះមានសិទ្ធិបង្កើតអនុគណៈកម្មការ ឬក្រុមជំនួយការតាមតម្រូវការចាំបាច់ និងមានសិទ្ធិប្រើប្រាស់ត្រារបស់គណៈកម្មាធិការជាតិរៀបចំបុណ្យជាតិនិងអន្តរជាតិថែមទៀតផង។
បើតាមគម្រោង ព្រះសពរបស់សម្ដេចក្រុមព្រះ នរោត្ដម រណឫទ្ធិ នឹងយាងដង្ហែមកដល់ប្រទេសកម្ពុជា នៅវេលាម៉ោង១១ ថ្ងៃអាទិត្យ ទី៥ ខែធ្នូ ឆ្នាំ២០២១ ខាងមុខនេះ។
មន្ត្រីជាន់ខ្ពស់គណបក្សហ្វ៊ុនស៊ិនប៉ិចបានប្រាប់ វីអូឌី ថាព្រះសពរបស់សម្ដេចក្រុមព្រះ នរោត្ដម រណឫទ្ធិ នឹងយាងដង្ហែមកកម្ពុជា តាមរយៈយន្តហោះពិសេសពីប្រទេសបារាំង។
សម្ដេចក្រុមព្រះ នរោត្ដម រណឫទ្ធិ ព្រះប្រធានក្រុមឧត្ដមប្រឹក្សាផ្ទាល់ព្រះមហាក្សត្រ ព្រះប្រធានគណបក្សហ្វ៊ុនស៊ិនប៉ិច និងជាអតីតនាយករដ្ឋមន្ត្រីកម្ពុជាទីមួយ ចន្លោះឆ្នាំ១៩៩៣ ដល់ឆ្នាំ១៩៩៧ បានយាងសោយព្រះទិវង្គតនៅរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ នៅឯប្រទេសបារាំង ក្នុងព្រះជន្មាយុ៧៧ព្រះវស្សា ដោយរោគាពាធ៕