មេដឹកនាំបក្សកាន់អំណាច ប្រកាសជាផ្លូវការគាំទ្រលោក ហ៊ុន ម៉ាណែត កូនប្រុសច្បងរបស់លោក ជាបេក្ខភាពនាយករដ្ឋមន្ត្រី សម្រាប់ស្នងតំណែងរបស់លោកទៅថ្ងៃអនាគត និងបានច្រានចោលការចោទពីការគំរាមកំហែងដើម្បីបំបែកក្បាលម៉ាស៊ីនដឹកនាំរបស់មេដឹកនាំអតីតគណបក្សសង្គ្រោះជាតិ។
ក្នុងពិធីសម្ពោធដាក់ឱ្យប្រើប្រាស់ផ្លូវ៣៧ខ្សែ នៅខេត្តព្រះសីហនុ នាថ្ងៃទី២ ខែធ្នូ ឆ្នាំ២០២១ លោកនាយករដ្ឋមន្ត្រី ហ៊ុន សែន ថ្លែងថា ដើម្បីកុំឱ្យអ្នកវិភាគមួយចំនួនមានមន្ទិលសង្ស័យថា លោកបានប្រើយុទ្ធសាស្ត្របំបែកក្រុមប្រឆាំងដើម្បីពង្រឹងអំណាច សម្រាប់ផ្ទេរតំណែងទៅកូននោះ លោកបានប្រកាសជាសាធារណៈនៅថ្ងៃនេះ ពីបេក្ខជននាយករដ្ឋមន្រ្តីទៅថ្ងៃអនាគតសម្រាប់គណបក្សកាន់អំណាច។
លោកបានគូសបញ្ជាក់ថា៖ «ហ៊ុន ម៉ាណែត មួយជាបេក្ខភាពក្នុងចំណោមបេក្ខភាពជានាយករដ្ឋមន្ត្រី មិនមែនមានតែម្នាក់ទេ ប៉ុន្តែបានទទួលការគាំទ្រពីឪវា ពេលលេញគឺ ហ៊ុន សែន! មើលអ្ហែងធ្វើអីអញ? អញសួរអ្ហែង អ្ហែងធ្វើអីអញ? អ្ហែងនិយាយចេញមក! ហ៊ុន សែន វាមានថ្ងៃងាប់ ថ្ងៃចាស់ណា! ហើយចុះបើមានកូន ម៉េចមិនឱ្យវាធ្វើតទៅតាមរយៈបោះឆ្នោត»។
មួយវិញទៀត មេដឹកនាំបក្សកាន់អំណាចរូបនេះក៏បានវាយបកទៅនឹងការចោទប្រកាន់ថា លោកជាតួអង្គសំខាន់មួយបំបែកអតីតមេដឹកបក្សប្រឆាំងផងដែរ។
លោកបានថ្លែងថា៖ «ស្អីក៏ ហ៊ុន សែនៗ! អ៊ីចឹង ហ៊ុន សែន ទៅជាមនុស្សខ្លាំងមហាអស្ចារ្យហើយ ដែលបំបែកពួកអ្ហែងបាននោះ។ ពួកអ្ហែងទាស់គ្នាអ្ហែងតើ! រឿងអីមកទាក់ទងជាមួយអញ? […] អ្ហែងរួមក៏រួមទៅ អ្ហែងបែកក៏បែកទៅ ម៉ែអញ»។
អ្នកស្រាវជ្រាវសង្គម លោកបណ្ឌិត សេង សារី ហៅការប្រកាសបេក្ខភាពនាយករដ្ឋមន្ត្រីសម្រាប់ស្នងតំណែងថាជារឿងល្អ ព្រោះបានជម្រះមន្ទិលមន្ត្រីជាសមាជិកបក្សកាន់អំណាចខ្លួនផង និងប្រាប់ទៅអ្នកនយោបាយផ្សេងទៀតឱ្យបានដឹងពីការត្រៀមធនធានមនុស្សសម្រាប់ប្រកួតប្រជែងកៅអីនាយករដ្ឋមន្ត្រីផងដែរ។
ប៉ុន្តែលោកនៅតែមានមន្ទិលថា ការស្នងតំណែងតាមរយៈបោះឆ្នោតនោះជាការបើកផ្លូវឱ្យមានការបោះឆ្នោតមានលក្ខណៈសេរី ត្រឹមត្រូវ និងយុត្តិធម៌ តាមគន្លងប្រជាធិបតេយ្យឬក៏អត់។
លោកថា៖ «យ៉ាងណាក៏ដោយ ឯកឧត្ដម ហ៊ុន ម៉ាណែត អាចក្លាយជានាយករដ្ឋមន្ត្រីបានតាមរយៈការបោះឆ្នោត […] ប៉ុន្តែអ្វីដែលសំខាន់ វាទាល់តែការបោះឆ្នោតនេះ វាទទួលស្គាល់ពីគ្រប់ភាគីនៅក្នុងការចូលរួម និងមានការទទួលស្គាល់ដោយអន្តរជាតិផង។ អ៊ីចឹងចំណុចសំខាន់ គឺនៅត្រង់ហ្នឹង»។
ប្រធានគណបក្សឆន្ទៈខ្មែរ លោក គង់ មូនីកា គាំទ្រសាររបស់នាយករដ្ឋមន្ត្រីនេះ ដោយថា ពិភពលោកនៃប្រទេសលោកសេរី ក៏តែងផ្ដល់ឱកាសឱ្យក្មេងជំនាន់ក្រោយដែរ។ ប៉ុន្តែលោកចង់ឃើញរដ្ឋាភិបាលរៀបចំទីលានប្រកួតនាពេលខាងមុខ មានតម្លាភាព មានអាជ្ញាកណ្ដាលឯករាជ្យ និងមិនលម្អៀង។
លោកថា៖ «យើងត្រូវការគណៈកម្មាធិការរៀបចំការបោះឆ្នោតមួយដែលជាអាជ្ញាកណ្ដាលហ្នឹង ជាអាជ្ញាកណ្ដាលអព្យាក្រឹត្យ ធ្វើយ៉ាងណាកសាងទំនុកចិត្តជូនប្រជាពលរដ្ឋជាម្ចាស់ឆ្នោត និងធ្វើជាអ្នករៀបចំឱ្យគណបក្សនយោបាយទាំងអស់ប្រកួតដោយស្មើភាព»។
ចំណែកនាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ ក៏យល់ឃើញដូចការលើកឡើងរបស់លោកនាយករដ្ឋមន្ត្រីដែរ ដោយថា ការបែកបាក់របស់គណបក្សមួយ មិនត្រូវចោទប្រកាន់អ្នកចូលទៅបំបែកទេ តែវាសំខាន់ទៅការពង្រឹងផ្ទៃក្នុងរបស់ខ្លួន។
លោកថា៖ «គណបក្សនយោបាយមួយៗ វាមានក្រុមនីមួយៗរៀងៗខ្លួន ដូច្នេះការដែលក្រុមហ្នឹងចេះសហការគ្នា ធ្វើការជាមួយគ្នាបានកម្រិតណានោះ គឺជាសមត្ថភាពនៅក្នុងការបង្រួបបង្រួមផ្ទៃក្នុង ដើម្បីប្រជែងអំណាចជាមួយដៃគូរបស់ខ្លួន»។
យ៉ាងណា លោក សុជាតិ រម្លឹកថា បើការប្រកួតអំណាចណាមួយមិនដើរលើគន្លងប្រជាធិបតេយ្យទេនោះ កម្ពុជានឹងបន្តខាតបង់ ហើយប្រទេសជិតខាងនឹងបន្តទាញយកប្រយោជន៍ពីការបែកបាក់នេះ ក្នុងនោះមានទាំងអ្នកវិនិយោគធំៗមកពីប្រទេសប្រជាធិបតេយ្យផងដែរ។
ប្រតិកម្មរបស់លោកនាយករដ្ឋមន្ត្រី ហ៊ុន សែន នេះ បានកើតឡើង៤ថ្ងៃ ក្រោយពីអតីតមេដឹកនាំគណបក្សសង្គ្រោះជាតិ លោក កឹម សុខា ដែលកំពុងដាក់ឱ្យស្ថិតក្រោមការតាមដានរបស់តុលាការ និងលោក សម រង្ស៊ី ដែលកំពុងនិរទេសខ្លួន បានស្ដីបន្ទោសគ្នាទៅវិញទៅមក ដែលការណ៍នេះបានធ្វើឱ្យអ្នកឃ្លាំមើលអត្ថាធិប្បាយថា ពួកគេអាចនឹងដើរដល់ផ្លូវបំបែក។
កាលពីថ្ងៃទី២៨ ខែវិច្ឆិកា លោក កឹម សុខា ដែលតុលាការដកសិទ្ធិធ្វើនយោបាយជាង៤ឆ្នាំមកនេះ បានចេញសារនយោបាយដ៏កម្រមួយជាលើកដំបូង ដោយចាត់ទុកទង្វើរបស់លោក សម រង្ស៊ី ដែលបានយករូបថតគាត់ទៅភ្ជាប់នឹងសកម្មភាពនយោបាយ និងការចេញដំណើររបស់«គណបក្សភ្លើងទៀន»ជាដើមនោះ ថាជាការមិនគោរពគោលការណ៍រួបរួមអំឡុងឆ្នាំ២០១២។ លោក កឹម សុខា បានគូសបញ្ជាក់ថា ទង្វើនោះបង្ហាញថា «លោក សម រង្ស៊ី និងលោក កឹម សុខា មិនមែនជាមនុស្សតែមួយទេ»។
ចំណែកលោក សម រង្ស៊ី វិញបានចាត់ទុកសារលោក កឹម សុខា នេះធ្វើឡើងក្រោមការគំរាមកំហែងពីលោក ហ៊ុន សែន និងបានបញ្ជាក់ថា លោក ហ៊ុន សែន ភ័យខ្លាចជាទីបំផុតចំពោះឯកភាពនៃអ្នកប្រជាធិបតេយ្យខ្មែរ ហើយយកលោក កឹម សុខា ធ្វើជាចំណាប់ខ្មាំង៕
