តាមគម្រោង ព្រះសពសម្ដេចក្រុមព្រះ នរោត្ដម រណឫទ្ធិ នឹងយាងដង្ហែពីប្រទេសបារាំងមកដល់ប្រទេសកម្ពុជា នៅថ្ងៃអាទិត្យ ទី៥ ខែធ្នូ ឆ្នាំ២០២១ វេលាម៉ោង១១ព្រឹក ខាងមុខនេះ។
មន្ត្រីគណបក្សហ្វ៊ុនស៊ិនប៉ិច បានប្រាប់ វីអូឌី នៅថ្ងៃទី២ ខែធ្នូនេះថា ព្រះសពសម្ដេចក្រុមព្រះ នរោត្ដម រណឫទ្ធិ នឹងយាងដង្ហែមកកម្ពុជា តាមរយៈយន្តហោះពិសេសពីប្រទេសបារាំង។
កាលពីព្រឹកថ្ងៃពុធ ថ្ងៃទី១ ខែធ្នូ ម្សិលមិញនេះ ថ្នាក់ដឹកនាំគណបក្សហ្វ៊ុនស៊ិនប៉ិច បានប្រារព្ធព្រះរាជពិធីបុណ្យទក្ខិណានុប្បទាន បង្សុកូល ឧទ្ទិសព្រះកុសល ថ្វាយដល់ដួងព្រះវិញ្ញាណក្ខន្ធសម្ដេចក្រុមព្រះ នរោត្ដម រណឫទ្ធិ។
សម្ដេចក្រុមព្រះ នរោត្ដម រណឫទ្ធិ ព្រះប្រធានក្រុមឧត្ដមប្រឹក្សាផ្ទាល់ព្រះមហាក្សត្រ និងជាអតីតនាយករដ្ឋមន្ត្រីកម្ពុជាទី១ ចន្លោះឆ្នាំ១៩៩៣ ដល់ឆ្នាំ១៩៩៧ បានយាងសោយព្រះទិវង្គតនៅរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ នៅឯប្រទេសបារាំង ក្នុងព្រះជន្មាយុ៧៧ព្រះវស្សា ដោយរោគាពាធ៕
