មេដឹកនាំកម្ពុជា លោក ហ៊ុន សែន ប្រកាសឱ្យឈប់យោគយល់នូវការទាមទារណាមួយ ពាក់ព័ន្ធរឿងសុំទៅធ្វើទស្សនកិច្ចនៅកំពង់ផែរាម ក្នុងខេត្តព្រះសីហនុ ជាទីតាំងដែលសហរដ្ឋអាមេរិកធ្លាប់ចោទថា អាចជាតំបន់ឈរជើងរបស់កងទ័ពចិន គំរាមកំហែងដល់សន្តិសុខតំបន់នោះ។
ការថ្លែងរបស់លោកនាយករដ្ឋមន្ត្រី ហ៊ុន សែន នេះធ្វើឡើងក្នុងពិធីសម្ពោធដាក់ឱ្យប្រើប្រាស់ផ្លូវ៣៧ខ្សែនៅខេត្តព្រះសីហនុនៅថ្ងៃទី២ ខែធ្នូ ឆ្នាំ២០២១នេះ។
ក្នុងពិធីនោះ លោក ហ៊ុន សែន ថ្លែងថា លោកឈប់និយាយតទៅទៀតហើយ រឿងកំពង់ផែរាម នៅខេត្តព្រះសីហនុនេះ និងបង្ហើបថា ធ្លាប់បានបញ្ជាទៅរដ្ឋមន្ត្រីក្រសួងការពារជាតិ លោក ទៀ បាញ់ ឈប់អនុញ្ញាតឱ្យទៅតំបន់នោះ ទោះមានការសុំជាថ្មីពីនរណាក៏ដោយ។
លោកថា៖ «ខ្ញុំមិននិយាយតទៅទៀតអារឿងកំពង់ផែរាម ឈប់និយាយ។ ខ្ញុំបានប្រាប់ទៅលោក ទៀ បាញ់ ហើយឈប់និយាយរឿងកំពង់ផែរាម អ្នកណាចង់សុំទៅទស្សនកិច្ចអីមិនបាច់ឱ្យទៅទេ ព្រោះកំពង់ផែរាមមិនមែនជាកន្លែងចោរលួចចោរប្លន់ទេ»។
លោកបន្តថ្លែងទាំងមិនបញ្ចេញឈ្មោះថា ភាគីកម្ពុជា ធ្លាប់បានអនុញ្ញាតឱ្យឱ្យទៅមើលហើយ តែភាគីនោះមិនអស់ចិត្ត។ លោកគូសបញ្ជាក់ថា ជាការអនុញ្ញាតឱ្យទៅទស្សនកិច្ច មិនមែនឱ្យទៅឆែកឆេរ ឬចុះធ្វើអធិការកិច្ចនោះទេ។
កាលពីអំឡុងខែមិនា ឆ្នាំ២០២១នេះ អនុព័ន្ធយោធាប្រចាំស្ថានទូតអាមេរិកប្រចាំកម្ពុជា ត្រូវបានអនុញ្ញាតឱ្យទស្សនកិច្ចនៅសមុទ្ររបស់កម្ពុជា ដើម្បីបញ្ជាក់ពីមន្ទិលសង្ស័យរបស់ភាគីអាមេរិក ពីវត្តមានកងទ័ពចិននៅទីនោះ។ ប៉ុន្តែដំណើរទស្សនកិច្ចនោះ ត្រូវបានភាគីអាមរិកបានបញ្ឈប់ដំណើរទស្សនកិច្ចមុនការគ្រោងទុកដោយសារ ភាគីកម្ពុជាមិនអនុញ្ញាតឱ្យមើលកំពង់ផែរាមទាំងមូល ពិសេសចំណុចដែលពួកគេចង់ដឹង។
ការបើកផ្លូវឱ្យមានដំណើរទស្សនកិច្ច របស់អនុព័ន្ធយោធាអាមរិកទៅកាន់តំបន់សមុទ្ររាមនេះ ធ្វើឡើងតាមសំណើររបស់ អនុរដ្ឋមន្ត្រីការបរទេសអាមេរិក លោកស្រី Wendy Sherman ដែលបានជួបជាមួយលោកនាយករដ្ឋមន្ត្រី ហ៊ុន សែន កាលពីថ្ងៃ១ ខែមិថុនា ឆ្នាំ២០២១។
ក្នុងជំនួបនោះ លោកស្រី Sherman បានលើកឡើងថា អាមេរិកមានកង្វល់ជាខ្លាំង លើវត្តមានយោធារបស់សាធារណរដ្ឋប្រជាមានិតចិន និងការកសាងទីតាំងនៅមូលដ្ឋានជើងទឹករាម ក្នុងឈូងសមុទ្រថៃ។
លោកស្រីបានសុំការបំភ្លឺលើការវាយកំទេចអគារចំនួន២ ដែលបានទទួលជំនួយថវិកាពីសហរដ្ឋអាមេរិក នៅរាម ដោយគ្មានការជូនដំណឹង ឬការពន្យល់ជាមុន ហើយថា «មូលដ្ឋានយោធារបស់សាធារណរដ្ឋប្រជាមានិតចិនណាមួយ នៅកម្ពុជា អាចនឹងបំផ្លាញអធិបតេយ្យភាពរបស់កម្ពុជា គំរាមកំហែងសន្តិសុខតំបន់ និងប៉ះពាល់ជាអវិជ្ជមានដល់ទំនាក់ទំនងរវាងសហរដ្ឋអាមេរិក និងប្រទេសកម្ពុជា»៕