មន្រ្តីជាន់ខ្ពស់គណបក្សប្រជាជនកម្ពុជា បញ្ជាក់ថា បេក្ខភាពជានាយករដ្ឋមន្រ្តីសម្រាប់គណបក្សកាន់អំណាច មិនមែនមានតែកូនប្រុសច្បងរបស់លោកនាយករដ្ឋមន្ត្រី ហ៊ុន សែន ម្នាក់ទេ ដែលនឹងត្រូវប្រកួតប្រជែងសម្រាប់តំណែងជាប្រមុខរដ្ឋាភិបាលដ៏សំខាន់មួយនេះ ខណៈក្នុងជួរបក្សកាន់អំណាចមានធនធានមនុស្សដែលមានសក្ដានុពលជាច្រើនរូបទៀតដែលនឹងត្រូវដាក់ឱ្យជ្រើសរើស។
មន្រ្តីនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា តាមពិតទៅ ការជ្រើសរើសនេះ គណបក្សគ្រប់គ្រងអំណាចនឹងផ្ដល់ឱកាសសម្រាប់យុវជននិងអ្នកដែលមានសមត្ថភាពផ្សេងទៀតក្រៅពីលោក ហ៊ុន ម៉ាណែត។ ប៉ុន្តែការសម្រេចបែបណា លោកថា អាស្រ័យលើការសម្រេចចិត្តពីគណៈអចិន្រ្តៃយ៍ និងសមាជគណបក្ស។
បើតាមលោក សុខ ឥសាន កូនប្រុសច្បងលោកនាយករដ្ឋមន្រ្តី លោក ហ៊ុន ម៉ាណែត ជាយុវជនដែលមានសមត្ថភាព ចំណេះជំនាញ និងលក្ខណៈសម្បត្តិគ្រប់គ្រាន់ក្នុងការទទួលតួនាទីដ៏សំខាន់មួយនេះ។
លោកបន្តថា៖ «ថ្ងៃមុន គាត់មានប្រសាសន៍ហើយថា មានយុវជនដែលមានសក្ដានុពល និងមានលក្ខណៈសម្បត្តិគ្រប់គ្រាន់មួយចំនួនទៀត មិនមែនអត់ទេ! អាហ្នឹងវាអាស្រ័យលើលក្ខណៈសម្បត្តិរបស់សាម៉ីជន។ ហើយទី២ អាស្រ័យលើការជ្រើសរើសរបស់គណៈកម្មាធិការអចិន្រ្តៃយ៍ជាមុខសញ្ញា។ ហើយទី៣ អាស្រ័យលើការបោះឆ្នោតមហាសន្និបាតរបស់គណបក្ស»។
លោក សុខ ឥសាន បញ្ជាក់ថា បេក្ខភាពជានាយករដ្ឋមន្រ្តី ដូចដែលលោក ហ៊ុន សែន ប្រកាសនេះ នៅមិនដឹងថានឹងត្រូវដាក់ឱ្យជ្រើសរើសសម្រាប់អាណត្តិខាងមុខនេះឬអាណត្តិបន្ទាប់ទៀតនោះទេ។
នៅក្នុងឆ្នាំ១៩៩៩ លោក ហ៊ុន ម៉ាណែត បានបញ្ចប់ថ្នាក់បណ្ឌិតនៅសាលាយោធា West Point ក្នុងទឹកដីសហរដ្ឋអាមេរិក មុននឹងលោកទទួលបានបណ្ឌិតសេដ្ឋកិច្ចនៅសាលា Bristol នៃចក្រភពអង់គ្លេសក្នុងឆ្នាំ២០០៨។ លោក ហ៊ុន ម៉ាណែត ត្រូវគេមើលឃើញថា ជាមនុស្សជំនាន់ថ្មីដែលទទួលបានតួនាទីខ្ពស់និងយ៉ាងឆាប់រហ័ស ទាំងក្នុងក្របខណ្ឌយោធា និងគណបក្ស។
បច្ចុប្បន្ន លោក ហ៊ុន ម៉ាណែត គឺជាសមាជិកគណៈអចិន្រ្តៃយ៍ នៃគណបក្សប្រជាជនកម្ពុជា និងជាមេបញ្ជាការកងទ័ពជើងគោក នៃកងយោធពលខេមរភូមិន្ទ។
លោក ខឺយ ស៊ីនឿន អនុប្រធានគណបក្សខ្មែរស្រឡាញ់ជាតិ ដែលជាគណបក្សទើបកកើតថ្មី ថ្លែងដោយមោទកភាពថា លោកមិនខ្វល់សោះឡើយចំពោះបេក្ខភាពនាយករដ្ឋមន្ត្រីថ្មីដូចដែលមេដឹកនាំបក្សកាន់អំណាចប្រកាសនេះ។ លោកបន្តថា នៅក្នុងសង្គមប្រជាធិបតេយ្យ ការប្រកាសពីបេក្ខភាពឬផ្គូផ្គងអ្នកណាជាមេដឹកនាំស្នងតំណែងបន្តនៅក្នុងបក្ស វាជារឿងធម្មតា។ លើសពីនេះទៀត លោកថា នឹងមិនប៉ះពាល់ទៅដល់ដំណើរការនៃការបោះឆ្នោតនោះដែរ សំខាន់អាស្រ័យលើការសម្រេចចិត្ត របស់ប្រជាពលរដ្ឋប៉ុណ្ណោះ។
លោកបន្តថា៖ «ហើយចំពោះគណបក្សខ្មែរស្រឡាញ់ជាតិវិញ ត្រៀមខ្លួនរួចជាស្រេចក្នុងការប្រកួត ដូចមិនមានអីបារម្ភទេ។ វាអាស្រ័យទៅលើប្រជាពលរដ្ឋដែលប្រើសិទ្ធិជាម្ចាស់អំណាច និងជាម្ចាស់ប្រទេស ដែលជ្រើសរើសមេដឹកនាំរបស់ខ្លួន»។
ប្រកាសចេញពីខេត្តព្រះសីហនុ កាលពីថ្ងៃទី២ ខែធ្នូ លោកនាយករដ្ឋមន្រ្តី ហ៊ុន សែន បញ្ជាក់ថា លោកនឹងគាំទ្រកូនប្រុសច្បងរបស់លោក គឺលោក ហ៊ុន ម៉ាណែត ធ្វើជាប្រមុខរដ្ឋតពីលោក តាមរយៈការបោះឆ្នោតនៅក្នុងផ្ទៃក្នុងបក្ស។
ចំណែកមាត្រា១៩ នៃលក្ខន្តិកៈនៃគណបក្សប្រជាជនកម្ពុជា លើកឡើងថា មហាសន្និបាតទូទាំងប្រទេសរបស់គណបក្ស គឺជាអង្គការដឹកនាំខ្ពស់បំផុតរបស់គណបក្ស ហើយមហាសន្និបាតនេះប្រជុំសាមញ្ញ៥ឆ្នាំម្តង ដោយគណៈកម្មាធិការកណ្ដាលជាអ្នកកោះអញ្ជើញ។ ក្នុងករណីពិសេស មហាសន្និបាតនេះអាចប្រជុំមុនឬក្រោយពេលកំណត់។ ភារកិច្ចនៃមហាសន្និបាត តំណាងទូទាំងប្រទេសរបស់គណបក្ស គឺពិនិត្យពិភាក្សានិងអនុម័តលើរបាយការណ៍នយោបាយរបស់គណៈកម្មាធិការកណ្ដាល អំពីសភាពការរួមរបស់គណបក្ស ព្រមទាំងសម្រេចកំណត់ពីគោលនយោបាយក្នុងប្រទេសនិងក្រៅប្រទេស។
យ៉ាងនេះក្ដី សម្រាប់នាយកប្រតិបត្តិការអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ យល់ឃើញថា នេះជាពេលវេលាសមរម្យដែលលោកនាយករដ្ឋមន្ត្រី ហ៊ុន សែន លើកឡើងពីអ្នកត្រូវស្នងតំណែងបន្ត ខណៈវ័យរបស់លោកនាយករដ្ឋមន្រ្តីកាន់តែវិវត្តទៅមុខ។
បើតាមលោក សេក សុជាតិ តាមពិតទៅ ក្នុងបក្សប្រជាជនកម្ពុជា មានខ្សែបណ្ដាញនិងបក្សពួកច្រើនផ្នែក ប៉ុន្តែគេសម្លឹងឃើញមានតែខ្សែខាងលោកនាយករដ្ឋមន្ត្រី ហ៊ុន សែន ទេ ដែលលេចធ្លោជាងគេ។ លោកបន្តថា បើទោះជាលោកនាយករដ្ឋមន្រ្តីប្រកាសបើកចំហប្រជាធិបតេយ្យផ្ទៃក្នុងបក្ស ក្នុងការជ្រើសរើសបេក្ខភាពក្ដី ក៏លោកមិនមានជំនឿថានឹងមានអ្នកដែលហ៊ានប្រកួតប្រជែងដែរ ដោយរួមទាំងឥស្សរជននយោបាយកំពូលៗផង។
លោកបន្តថា៖ «នាយករដ្ឋមន្រ្តីបានប្រកាសក្ដែងៗថា លោកគាំទ្រកូនប្រុសច្បងលោកពេញទំហឹងហើយ ដូច្នេះ ខ្ញុំជឿជាក់ថា បេក្ខជននាយករដ្ឋមន្រ្តីផ្សេងៗដែលកំពុងតែកាន់អំណាចនៅក្នុងរាជរដ្ឋាភិបាលសព្វថ្ងៃនេះ គឺមិនហ៊ានប្រជែងទេ។ ហើយយើងនៅតែមើលឃើញថា កូនប្រុសច្បងរបស់លោកនាយករដ្ឋមន្រ្តីនៅតែជាបេក្ខជនទី១ដដែល។ នេះជាអ្វីដែលខ្ញុំមើលឃើញ »។
គិតមកដល់ពេលនេះ គេសង្កេតឃើញសារនយោបាយនិងញត្តិគាំទ្រព្រោងព្រាតចេញពីស្ថាប័នរដ្ឋ ថ្នាក់ដឹកនាំជាន់ខ្ពស់រដ្ឋាភិបាល នគរបាល និងកងរាជអាវុធហត្ថ ត្រូវបានបង្ហោះនៅលើបណ្ដាញសង្គម ដែលបង្ហាញពីការគាំទ្របេក្ខភាពលោក ហ៊ុន ម៉ាណែត ធ្វើជានាយករដ្ឋមន្រ្តី៕