មន្ត្រីអង្គការសុខភាពពិភពលោក (WHO) នៅថ្ងៃសុក្រនេះ បានណែនាំដល់ប្រទេសក្នុងតំបន់អាស៊ីប៉ាស៊ីហ្វិក ឱ្យបង្កើនសមត្ថភាពវិស័យសុខាភិបាល និងជំរុញការចាក់វ៉ាក់សាំងឱ្យបានពេញលេញដល់ប្រជាជនរបស់ខ្លួនបន្ថែមទៀត ដើម្បីត្រៀមទប់ស្កាត់ការកើនឡើងនៃករណីឆ្លងជំងឺកូវីដ-១៩ដែលបង្កឡើងដោយវីរុសបំប្លែងខ្លួនថ្មី «អូមីក្រុង»។
ទាក់ទងនឹងមេរោគកូវីដបំប្លែងខ្លួនថ្មី «អូមីក្រុង» ដែលត្រូវបានរកឃើញជាលើកដំបូងនៅក្នុងប្រទេសអាហ្វ្រិកខាងត្បូង កាលពីខែមុន និងត្រូវបានចាត់ទុកដោយអង្គការសុខភាពពិភពលោកថាជាក្ដីបារម្ភថ្មីមួយ អ្នកវិទ្យាសាស្ត្រនានាបច្ចុប្បន្នក៏កំពុងតែបន្តប្រមូលទិន្នន័យ ដើម្បីកំណត់ពីកម្រិតឆ្លងនិងភាពធ្ងន់ធ្ងរនៃវីរុសបំប្លែងខ្លួនថ្មីមួយនេះផងដែរ។
មេរោគកូវីដបំប្លែងខ្លួនថ្មី «អូមីក្រុង» ដែលបានរីករាលដាលដល់ប្រទេសជាង២០នេះ ក្នុងនោះក៏ មានប្រទេសមួយចំនួនក្នុងតំបន់អាស៊ីផងដែរ ដូចជា ប្រទេសអូស្ត្រាលី ជប៉ុន កូរ៉េខាងត្បូង សិង្ហបុរី ម៉ាឡេស៊ី និងឥណ្ឌា ខណៈរដ្ឋាភិបាលជាច្រើននាពេលបច្ចុប្បន្នបានឆ្លើយតបទៅនឹងករណីនេះតាមរយៈការរឹតបន្តឹងវិធានធ្វើដំណើរនានា។
ទីភ្នាក់ងារសារព័ត៌មាន Reuters បានស្រង់សម្ដីនាយកអង្គការសុខភាពពិភពលោក សម្រាប់តំបន់ប៉ាស៊ីហ្វិកខាងលិច លោក Takeshi Kasai ដែលបានថ្លែងប្រាប់សន្និសីទសារព័ត៌មានមួយថា៖ «វិធានរឹតត្បឹតតាមព្រំដែនអាចនឹងកាត់បន្ថយការឆ្លង។ ទោះជាយ៉ាងណា គ្រប់ប្រទេស និងសហគមន៍ទាំងអស់ត្រូវតែត្រៀមបន្ថែមទៀតសម្រាប់ការកើនឡើងនៃករណីឆ្លងថ្មី»។
លោកបន្តថា៖ «ប្រជាពលរដ្ឋមិនគួរពឹងផ្អែកតែលើវិធានការតាមព្រំដែននោះទេ។ អ្វីដែលសំខាន់បំផុត គឺត្រូវត្រៀមទប់ស្កាត់វីរុសបំប្លែងខ្លួនថ្មីនេះ ខណៈដែលវាមានលទ្ធភាពនៃការឆ្លងក្នុងកម្រិតខ្ពស់»។
លោក Takeshi Kasai បន្ថែមថា បណ្ដាប្រទេសនានាត្រូវតែប្រើប្រាស់បទពិសោធន៍កាលពីពេលកន្លងទៅ ក្នុងការដោះស្រាយជាមួយនឹងវីរុសបំប្លែងខ្លួនប្រភេទ Delta ខណៈដែលលោកក៏បានជំរុញសារជាថ្មីឱ្យមានការចាក់វ៉ាក់សាំងពេញលេញដល់ក្រុមដែលងាយរងគ្រោះ និងអនុវត្តវិធានការបង្ការ ដូចជា ការពាក់ម៉ាស់ និងវិធានរក្សាគម្លាតសង្គម ជាដើម។
គិតត្រឹមថ្ងៃសុក្រនេះ អូស្ត្រាលីក្លាយជាប្រទេសចុងក្រោយគេដែលបានរាយការណ៍ពីការរកឃើញករណីឆ្លងវីរុសបំប្លែងខ្លួនថ្មី «អូមីក្រុង» នៅក្នុងប្រទេស បន្ទាប់ពីសហរដ្ឋអាមេរិក។ ទោះជាយ៉ាងណា វីរុសបំប្លែងខ្លួនថ្មីនេះពុំទាន់បង្កឱ្យមានជាករណីស្លាប់ណាមួយនោះទេ៕
