លោកនាយករដ្ឋមន្ត្រី ហ៊ុន សែន នឹងទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ ខាងមុខនេះ តាមការអញ្ជើញរបស់មេដឹកនាំរដ្ឋប្រហារយោធា លោក Min Aung Hlaing។
ការគូសបញ្ជាក់នេះបានធ្វើឡើងនៅក្នុងជំនួបមួយរវាងលោកនាយករដ្ឋមន្ត្រី ហ៊ុន សែន និងលោក វុនណា ម៉ោងលីន (Wunna Maung Lwin) រដ្ឋមន្រ្តីការបរទេស និងជាបេសកជនពិសេសរបស់ប្រធានក្រុមប្រឹក្សារដ្ឋ និងនាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា នៅព្រឹកថ្ងៃទី៧ ខែធ្នូនេះ។
នៅក្នុងជំនួបនោះ លោក វុនណា ម៉ោងលីន (Wunna Maung Lwin) បាននាំយកនូវលិខិតរបស់លោក Min Aung Hlaing ប្រធានក្រុមប្រឹក្សារដ្ឋ និងជានាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា ជូនលោកនាយករដ្ឋមន្ត្រី ហ៊ុន សែន ដើម្បីអញ្ជើញលោកឱ្យទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ខាងមុខ។
ជាការឆ្លើយតប លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកនឹងអញ្ជើញទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ខាងមុខ តបតាមការអញ្ជើញនេះ។
លោក វុនណា ម៉ោងលីន (Wunna Maung Lwin) រដ្ឋមន្រ្តីការបរទេស និងជាបេសកជនពិសេសរបស់ប្រធានក្រុមប្រឹក្សារដ្ឋ និងនាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា បានមកទស្សនកិច្ចនៅប្រទេសកម្ពុជាស្ងាត់ៗ នៅថ្ងៃទី៧ ខែធ្នូនេះ។ ភាគីទាំងពីរបានពិភាក្សាគ្នាអំពីកិច្ចសហប្រតិបត្តិការទ្វេភាគីផង និងទំនាក់ទំនងរវាងប្រទេសកម្ពុជានិងប្រទេសមីយ៉ាន់ម៉ាផង។ ក្រៅពីនោះ ភាគីទាំងពីរក៏បានពិភាក្សាគ្នាអំពីបញ្ហាអាស៊ានផងដែរ ដើម្បីស្វែងរកមធ្យោបាយធ្វើយ៉ាងណាឱ្យអាស៊ានមានកិច្ចសហប្រតិបត្តិការល្អនិងមានសាមគ្គីភាពល្អឡើងវិញ។
កាលពីថ្ងៃចន្ទ លោកនាយករដ្ឋមន្ត្រី ហ៊ុន សែន បានប្រកាសជាសាធារណៈពីខេត្តព្រៃវែងថា លោកនឹងធ្វើការជាមួយមេដឹកនាំយោធាមីយ៉ាន់ម៉ា ទោះបីមានការរិះគន់ក៏ដោយ។ លោកថា មានលទ្ធភាពជាច្រើនដែលលោកនឹងទៅបំពេញទស្សនកិច្ចនៅប្រទេសមីយ៉ាន់ម៉ា និងជជែកជាមួយលោក Min Aung Hlaing មេដឹកនាំយោធាដែលធ្វើរដ្ឋប្រហារទម្លាក់មេដឹកនាំប្រជាធិបតេយ្យ លោកស្រី អ៊ុងសាន ស៊ូជី កាលពីដើមខែកុម្ភៈ ឆ្នាំ២០២១៕