មន្ត្រីជាន់ខ្ពស់នៃក្រសួងសុខាភិបាលកម្ពុជា ថ្លែងថា ប្រជាពលរដ្ឋមិនគួរបារម្ភពីការឆ្លងវីរុសកូវីដ-១៩ បំប្លែងថ្មី «អូមីក្រុង» ពីប្រទេសជិតខាងចូលមកកម្ពុជាពេកទេ ព្រោះអាជ្ញាធរប្រទេសនោះក៏មានវិធានការគ្រប់គ្រងរឹងមាំ ដែលមិនងាយនឹងឆ្លងលឿនក្នុងប្រទេសរបស់គេ ហើយក៏មិនងាយឆ្លងមកដល់កម្ពុជាភ្លាមៗនោះដែរ។
សារព័ត៌មាន Bangkok Post កាលពីថ្ងៃម្សិលមិញ បានចុះផ្សាយថា ប្រទេសថៃបានរកឃើញករណីអ្នកឆ្លងជំងឺកូវីដ-១៩បំប្លែងខ្លួនប្រភេទ «អូមីក្រុង» ជាលើកដំបូង លើអ្នកជំនួញជនជាតិអាមេរិកម្នាក់ដែលទើបធ្វើដំណើរមកពីអេស្ប៉ាញកាលពីចុងខែវិច្ឆិកា។
ប្រភពដដែលបន្តថា អ្នកដំណើររូបនោះបានប្រាស្រ័យទាក់ទងជាមួយបុគ្គលិកអាកាសយានដ្ឋានចំនួន២នាក់ និងបុគ្គលិកសណ្ឋាគារចំនួន១៧នាក់។ ការប្រកាសរកឃើញនេះ ធ្វើឱ្យថៃក្លាយជាប្រទេសទី៤៧នៅក្នុងពិភពលោក ដែលបានប្រកាសរកឃើញអ្នកផ្ទុកវីរុស «អូមីក្រុង»។
អគ្គនាយកបច្ចេកទេសនៃក្រសួងសុខាភិបាលកម្ពុជា លោកវេជ្ជបណ្ឌិត ហុក គឹមចេង ថ្លែងប្រាប់ វីអូឌី នៅថ្ងៃទី៧ ខែធ្នូនេះ ថាពលរដ្ឋមិនគួរព្រួយបារម្ភពីការឆ្លងវីរុសបំប្លែងថ្មី «អូមីក្រុង» ពីប្រទេសជិតខាងចូលមកកម្ពុជានោះទេ ខណៈកម្ពុជាក៏មានការប្រុងប្រយ័ត្នខ្ពស់ផងដែរ។
លោកថា៖ «យើងមិនគួរព្រួយបារម្ភពេកទេ ដោយសារថានៅប្រទេសជិតខាងយើងហ្នឹង គេក៏មានវិធានការសុខាភិបាលរបស់គេ។ ដូច្នេះ នៅក្នុងករណីដែលគេរកឃើញបានលឿន គេក៏មានវិធានការសុខាភិបាលរបស់គេរឹងមាំនៅក្នុងការគ្រប់គ្រងទៅលើអ្នកឆ្លងអូមីក្រុងហ្នឹងដែរ។ អ៊ីចឹងប្រទេសនីមួយៗគឺមានវិធានការរៀងខ្លួនរឹងមាំហើយ យើងក៏មានការប្រុងប្រយ័ត្នដែរ។ អ៊ីចឹងមិនមែនជាការព្រួយបារម្ភពេកទេ ដោយសារថា យើងមានបទពិសោធន៍ក្នុងការគ្រប់គ្រងកូវីដ-១៩ក្នុងរយៈពេលកន្លងមកហើយ»។
មន្ត្រីរូបនេះបន្ថែមថា ពលរដ្ឋត្រូវជំនួសការព្រួយបារម្ភមកជាការតាមដានស្ថានភាពជំងឺឱ្យបានម៉តចត់។ លើសពីនេះ លោកថា ដើម្បីទប់ទល់នឹងវីរុសបំប្លែងថ្មីនេះ កម្ពុជាបានផ្ដោតលើវិធានការសុខាភិបាល ដូចជា ការធ្វើចត្តាឡីស័ក ការធ្វើតេស្ត ៣កុំ៣ការពារ និងគោរពតាមច្បាប់អង្គការសុខភាពពិភពលោកឆ្នាំ២០០៥ ស្ដីពី «ការប្រុងប្រយ័ត្ន ការគ្រប់គ្រងលើសុខភាពសាធារណៈក្នុងពេលបន្ទាន់»។ លោកថា ក្រៅពីនោះ កម្ពុជាផ្ដោតលើប្រទេសទាំង១០ដែលមានការព្រួយបារម្ភពីហានិភ័យចម្លង និងប្រទេសផ្សេងទៀតដែលមានអ្នកដំណើរចូលមក។
អាជីវករលក់សាច់អាំងនៅរាជធានីភ្នំពេញមួយរូប សុំមិនបញ្ចេញឈ្មោះ លើកឡើងថា លោកបានឃើញព័ត៌មានពីវីរុសបំប្លែងខ្លួន «អូមីក្រុង» តាមបណ្ដាញសង្គម និងតាមរយៈព័ត៌មានអន្តរជាតិ។ យ៉ាងណា លោកថា លោកមិនទាន់ច្បាស់ពីកម្រិតនៃភាពធ្ងន់ធ្ងរនៃវីរុសថ្មីនេះថាយ៉ាងណានោះទេ ពោលគឺគ្រាន់តែឮថាជំងឺនេះឆ្លងលឿន។
លោកបន្តថា៖ «បើឧបមាថា ខាងក្រសួងគេរាយការណ៍ ឬព័ត៌មានផ្សាយថាអាជំងឺហ្នឹងឱ្យតែឆ្លង វានឹងវិវត្តៗធ្វើឱ្យមនុស្សយើងធ្ងន់ធ្ងរ! អ្នកចាក់វ៉ាក់សាំងហើយ វាទប់អត់បាន! អាហ្នឹងអាចថាពួកយើងនឹងព្រួយបារម្ភខ្លាំង។ តែឥលូវ និយាយរួម វាមិនទាន់មានករណីហ្នឹងក្នុងស្រុកយើង និងសហគមន៍យើង អ៊ីចឹងមួយៗគាត់ដឹងព័ត៌មានដែរ តែគ្រាន់តែគាត់មិនទាន់ដូចថាផ្អើលខ្លាំងអ៊ីចឹង»។
លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធផ្លូវជាតិលេខ១១ នៅខេត្តព្រៃវែង កាលពីថ្ងៃចន្ទម្សិលមិញថា ការបន្តថែរក្សាសុខភាព «៣ការពារ ៣កុំ» ទោះបីប្រភេទថ្មី អូមីក្រុង ក៏មិនអាចធ្វើអីកម្ពុជាបានដែរ។
លោកថា៖ «អាអូមីក្រុងហ្នឹង! យើងវាស្លន់ស្លោពេក ស្លន់ស្លោតាំងពីអង្គការសុខភាពពិភពលោក ស្លន់ស្លោតាំងពីអឺរ៉ុប ស្លន់ស្លោតាំងពីអាមេរិក។ តែទីបំផុត អ្នកដែលស្លាប់ដោយសារអូមីក្រុង អត់ទាន់មានសោះ ទទេស្អាត ស្លាប់ដោយសារអា[ប្រភេទ]ដែលតា និង[ប្រភេទ]អាល់ហ្វាទាំងអស់! មកដល់ម៉ោងនេះហើយ អូមីក្រុងអត់ទាន់មានធ្វើអីសោះ។ អ៊ីចឹងបានជាយើងបានសម្រេចពីម្សិលហើយ យើងលុបចោលការហាមប្រាម១០ប្រទេស ទាំងអ្នកធ្វើដំណើរឆ្លងកាត់១០ប្រទេសនេះ»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា បើសិនជាមានករណីរាលដាលវីរុសបំប្លែងខ្លួន «អូមីក្រុង» នេះមែន ស្ថាប័នសុខាភិបាលថៃ និងកម្ពុជា នឹងរួមគ្នាទប់ស្កាត់មិនខាន។
លោកថា៖ «ឥលូវនេះ យើងគ្រាន់តែមិនទាន់ច្បាស់ អូមីក្រុងហ្នឹង! គ្រាន់តែថា វាជារឿងមួយដែលឮថាមកពីអាហ្វ្រិកខាងត្បូង និងអាហ្វ្រិកប៉ុន្មានដែលនៅជាប់ហ្នឹង។ ក៏ប៉ុន្តែយើងអត់ទាន់ឃើញអាការអ្នកជំងឺហ្នឹងវាយ៉ាងម៉េចៗ ដែលគេបានយកមកដើម្បីអំណះអំណាងថា អូមីក្រុងវាសាហាវជាងដែលតាយ៉ាងម៉េច! វាអត់ទាន់មាន! ហើយក៏វាអត់ទាន់មានហានិភ័យស្លាប់ដោយសារវីរុសបំប្លែងខ្លួនអូមីក្រុងហ្នឹងដែរ។ […] យើងភ័យខ្លាចបំផុតគឺដែលតា ព្រោះវាវាយលុកសួតខ្លាំង វាជាវីរុសច្បាស់លាស់ដែលគេរកឃើញ»។
កាលពីថ្ងៃទី២៩ ខែវិច្ឆិកា ក្រសួងសុខាភិបាលបានចេញសេចក្ដីសម្រេចហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន១០នៅទ្វីបអាហ្រ្វិក ឬអ្នកមានប្រវត្តិធ្វើដំណើរទៅប្រទេសទាំង១០ រួមមាន Botswana, Eswatini, Lesotho, Mozambique, Namibia, South Africa, Zimbabwe, Malawi, Angola, និង Zambia ក្នុងអំឡុងពេល៣សប្ដាហ៍ មុនពេលធ្វើដំណើរចូលប្រទេសកម្ពុជា។
យ៉ាងណា នៅថ្ងៃទី៥ ខែធ្នូ ក្រសួងសុខាភិបាលបានប្រកាសលុបចោលបម្រាមដែលហាមអ្នកដំណើរ ឬអ្នកដែលឆ្លងកាត់ប្រទេសតំបន់អាហ្វ្រិកចំនួន១០ចូលកម្ពុជានោះវិញ ប៉ុន្តែក្រសួងតម្រូវឱ្យអ្នកធ្វើដំណើរត្រូវបង្ហាញវិញ្ញាបនបត្របញ្ជាក់ថា គ្មានជំងឺកូវីដ-១៩ (តេស្ត PCR) ក្នុងរយៈពេល៧២ម៉ោង មុនពេលមកដល់កម្ពុជា និងទទួលស្គាល់ដោយអាជ្ញាធរសុខាភិបាលនៃប្រទេសសាម៉ី ឬប្រទេសសំណាក់ចុងក្រោយ ជាដើម៕