សាលាដំបូងរាជធានីភ្នំពេញ នៅព្រឹកថ្ងៃអង្គារនេះ កំពុងបើកសវនាការកាត់ទោសថ្នាក់ដឹកនាំអតីតគណបក្សសង្គ្រោះជាតិ លោក សម រង្ស៊ី និងសកម្មជនអតីតគណបក្សប្រឆាំងសរុប៤២នាក់ ពីបទ «ក្បត់ជាតិ» និង «រួមគំនិតក្បត់»។
យោងតាមដីកាបញ្ជូនរឿងរបស់ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហៀង កាលពីថ្ងៃទី១៦ ខែវិច្ឆិកា ឆ្នាំ២០២១ បានបង្គាប់ឱ្យលោក សម រង្ស៊ី ប្រធានស្ដីទីអតីតគណបក្សសង្គ្រោះជាតិ និងសកម្មជននយោបាយក្នុងអតីតគណបក្សនេះចំនួន៤១នាក់ផ្សេងទៀត ត្រូវចូលរួមសវនាការ នៅថ្ងៃទី៧ ខែធ្នូ ឆ្នាំ២០២១។ ពួកគេបានរងនូវការចោទប្រកាន់ក្នុងសំណុំរឿង «ក្បត់ជាតិ» និង «រួមគំនិតក្បត់ជាតិ» សម្រាប់ព្រឹត្តិការណ៍ «មាតុភូមិនិវត្តន៍ ថ្ងៃ៩វិច្ឆិកា» របស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០២១។
តុលាការក្រុងភ្នំពេញ ធ្លាប់បានបើកសវនាការសំណុំរឿងនេះជាលក្ខណៈទ្រង់ទ្រាយធំ ដោយមានថ្នាក់ដឹកនាំនិងសកម្មជនបក្សប្រឆាំងជាង១៣០នាក់ តាំងពីចុងឆ្នាំ២០២០។ ប៉ុន្តែតុលាការបានផ្អាកសវនាការវិញជាបន្តបន្ទាប់ចាប់តាំងខែកុម្ភៈ ឆ្នាំ២០២១ ដោយសារការរីករាលដាលនៃជំងឺកូវីដ-១៩៕
