លោកនាយករដ្ឋមន្ត្រី ហ៊ុន សែន នឹងទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ខាងមុខនេះ ខណៈអ្នកវិភាគបានលើកឡើងថា កម្ពុជានឹងរងការរិះគន់ពីសំណាក់សហគមន៍អន្តរជាតិចំពោះដំណើរទស្សនកិច្ចលើកនេះ។
ដំណើរទស្សនកិច្ចនេះធ្វើឡើងតាមការអញ្ជើញរបស់មេដឹកនាំរបបយោធាមីយ៉ាន់ម៉ា លោក Min Aung Hlaing នៅថ្ងៃទី៧ ខែធ្នូនេះ បន្ទាប់ពីរដ្ឋមន្ត្រីការបរទេសមីយ៉ាន់ម៉ាមកទស្សនកិច្ចនៅកម្ពុជា។
នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព លោក វុនណា ម៉ោងលីន (Wunna Maung Lwin) រដ្ឋមន្រ្តីការបរទេស និងជាបេសកជនពិសេសរបស់ប្រធានក្រុមប្រឹក្សារដ្ឋ និងនាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា បាននាំយកនូវលិខិតរបស់លោក Min Aung Hlaing ប្រធានក្រុមប្រឹក្សារដ្ឋ និងជានាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា ជូនលោកនាយករដ្ឋមន្ត្រី ហ៊ុន សែន ដើម្បីអញ្ជើញលោកឱ្យទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ខាងមុខ។
ជាការឆ្លើយតប លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកនឹងអញ្ជើញទៅធ្វើទស្សនកិច្ចនៅប្រទេសមីយ៉ាន់ម៉ា នៅថ្ងៃទី៧-៨ ខែមករា ឆ្នាំ២០២២ខាងមុខ តបតាមការអញ្ជើញនេះ។
លោក វុនណា ម៉ោងលីន (Wunna Maung Lwin) រដ្ឋមន្រ្តីការបរទេស និងជាបេសកជនពិសេសរបស់ប្រធានក្រុមប្រឹក្សារដ្ឋ និងនាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា បានមកទស្សនកិច្ចនៅប្រទេសកម្ពុជាស្ងាត់ៗ នៅថ្ងៃទី៧ ខែធ្នូនេះ។
នៅក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅថ្ងៃនេះ ភាគីទាំងពីរបានពិភាក្សាគ្នាអំពីកិច្ចសហប្រតិបត្តិការទ្វេភាគី និងទំនាក់ទំនងរវាងប្រទេសកម្ពុជានិងប្រទេសមីយ៉ាន់ម៉ាផង។ ក្រៅពីនោះ ភាគីទាំងពីរក៏បានពិភាក្សាគ្នាអំពីបញ្ហាអាស៊ានផងដែរ ដើម្បីស្វែងរកមធ្យោបាយធ្វើយ៉ាងណាឱ្យអាស៊ានមានកិច្ចសហប្រតិបត្តិការល្អនិងមានសាមគ្គីភាពល្អឡើងវិញ។
អ្នកសិក្សាស្រាវជ្រាវនៅវិទ្យាស្ថានខ្មែរសម្រាប់សហប្រតិបត្តិការ និងសន្តិភាព លោក វណ្ណ ប៊ុនណា បានលើកឡើងថា កម្ពុជានឹងរងការរិះគន់ពីសហគមន៍អន្តរជាតិ បន្ទាប់ពីទទួលស្វាគមន៍រដ្ឋមន្ត្រីការបរទេសមីយ៉ាន់ម៉ាឱ្យមកធ្វើទស្សនកិច្ចនៅកម្ពុជា និងគម្រោងរបស់លោកនាយករដ្ឋមន្ត្រី ហ៊ុន សែន ទៅធ្វើទស្សនកិច្ចនៅក្នុងប្រទេសមីយ៉ាន់ម៉ានៅដើមខែក្រោយនេះ។ លោក ប៊ុនណា បានលើកឡើងថា កម្ពុជាហាក់បានដើរបញ្ច្រាសពីសហគមន៍អន្តរជាតិនៅក្នុងសំណុំរឿងមីយ៉ាន់ម៉ានេះ។
លោកមានប្រសាសន៍បញ្ជាក់ថា៖ «ក្នុងក្រសែភ្នែកអន្តរជាតិ ច្បាស់ណាស់ ដូចជាសហរដ្ឋអាមេរិក ក៏ដូចជាប្រទេសដទៃទៀតដែលប្រកាន់របបប្រជាធិបតេយ្យ ដែលគេមានជំហរដាច់ខាតចំពោះរបបសឹកយោធាហ្នឹង វាកាន់តែធ្វើឱ្យរូបភាពកម្ពុជាហ្នឹងអាក្រក់ផងដែរក្នុងក្រសែភ្នែករបស់គេ។ ហើយវាអាចប៉ះពាល់ទៅដល់កិច្ចប្រជុំអាស៊ាននិងដៃគូពាក់ព័ន្ធរបស់អាស៊ានផងដែរ នៅពេលដែលកម្ពុជាធ្វើជាម្ចាស់ផ្ទះ។ ឧទាហរណ៍ ដូចមានកិច្ចប្រជុំមួយចំនួនបានពន្យារពេលរួចមកហើយ ដោយសារគេមិនចង់ឃើញវត្តមានរបស់លោក Min Aung Hlaing នៅក្នុងកិច្ចប្រជុំអាស៊ានជាមួយអង្គការសហប្រជាជាតិ កម្រិតរដ្ឋមន្ត្រីអាស៊ាន និងអគ្គលេខាធិការអង្គការសហប្រជាជាតិ។ ហើយមួយទៀត ប្រទេសកូរ៉េ [កូរ៉េខាងត្បូង] ក៏បានពន្យារពេលកិច្ចប្រជុំកូរ៉េមេគង្គម្ដងរួចហើយ ដោយសារគេមិនចង់ឃើញវត្តមានលោក Min Aung Hlaing។ អ៊ីចឹងទេ! បញ្ហាហ្នឹង ចង់មិនចង់ វាធ្វើឱ្យដៃគូរបស់អាស៊ានមានការអល់អែកក្នុងការចូលប្រជុំជាមួយអាស៊ាន នៅពេលកម្ពុជាធ្វើជាម្ចាស់ផ្ទះនៅឆ្នាំក្រោយផងដែរ»។
ប៉ុន្តែលោក ផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាលកម្ពុជា បានថ្លែងការពារជំហររបស់កម្ពុជាថា នេះគឺជាការចាប់ផ្ដើមធ្វើការងាររបស់កម្ពុជានៅក្នុងការស្វែងរកដំណោះស្រាយក្នុងប្រទេសមីយ៉ាន់ម៉ា។
លោក ផៃ ស៊ីផាន បានគូសបញ្ជាក់ថា៖ «ដំណោះស្រាយនេះ គឺអត់ទាន់ដាក់ពិន្ទុនរណាខុស នរណាត្រូវ គឺអត់ទេ! ចង់ដឹងថាភាគីទាំងពីរហ្នឹងចាប់ផ្ដើមពីអ្នកនៅក្នុងស្រុក ហើយត្រូវដោះស្រាយយ៉ាងម៉េច អាហ្នឹងយើងចង់ដឹងចង់ឮពីហ្នឹង ក្នុងកិច្ចអនុវត្តចំណុចទាំង៥ ដែលមិនទាន់គេអនុវត្តបាននោះ។ អាហ្នឹងជាភារកិច្ចរបស់កម្ពុជា ដែលនឹងក្លាយជាប្រធានអាស៊ាន។ ហើយអ្នកទិតៀនហ្នឹង គ្រាន់តែទិតៀនរកខុសរកត្រូវ អ្នកឈ្នះអ្នកចាញ់ គ្រាន់តែប៉ុណ្ណឹងទេ។ ប៉ុន្តែក្នុងអាស៊ាន គោលការណ៍ធំបំផុត គឺមិនចង់ឱ្យនរណាមួយដែលបែកឆ្ងាយចេញពីគោលការណ៍អាស៊ានទាំង១០»។
កាលពីថ្ងៃចន្ទ លោកនាយករដ្ឋមន្ត្រី ហ៊ុន សែន បានប្រកាសជាសាធារណៈពីខេត្តព្រៃវែងមកថា លោកនឹងធ្វើការជាមួយមេដឹកនាំយោធាមីយ៉ាន់ម៉ា ទោះបីមានការរិះគន់ក៏ដោយ។ លោកថា មានលទ្ធភាពជាច្រើនដែលលោកនឹងទៅបំពេញទស្សនកិច្ចនៅប្រទេសមីយ៉ាន់ម៉ា និងជជែកជាមួយលោក Min Aung Hlaing មេដឹកនាំយោធាដែលធ្វើរដ្ឋប្រហារទម្លាក់មេដឹកនាំប្រជាធិបតេយ្យ លោកស្រី អ៊ុងសាន ស៊ូជី កាលពីដើមខែកុម្ភៈ ឆ្នាំ២០២១។
សូមជម្រាបជូនថា នៅឆ្នាំ២០២២ខាងមុខនេះ កម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ាន៕