ព្រះសពសម្ដេចក្រុមព្រះ នរោត្ដម រណឫទ្ធិ ត្រូវបានបូជាដោយព្រះភ្លើង នៅព្រឹកថ្ងៃពុធនេះ នៅមុខវត្តបទុមវតី រាជធានីភ្នំពេញ ក្រោមការយាងប្រោសព្រះរាជទានព្រះភ្លើងដោយព្រះមហាក្សត្រ ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី។
ព្រះរាជពិធីថ្វាយព្រះភ្លើងនេះ ព្រះមហាក្សត្រី នរោត្ដម មុនិនាថ សីហនុ ក៏បានយាងចូលរួម និងមានការចូលរួមពីសំណាក់ឥស្សរជនជាន់ខ្ពស់ជាច្រើនរូបផងដែរ ក្នុងនោះរួមមាន លោកនាយករដ្ឋមន្ត្រី ហ៊ុន សែន, រដ្ឋមន្ត្រីក្រសួងមហាផ្ទៃ លោក ស ខេង, ប្រធានព្រឹទ្ធសភា លោក សាយ ឈុំ និងប្រធានរដ្ឋសភា លោក ហេង សំរិន។
ព្រះរាជពិធីបុណ្យនេះក៏មានវត្តមានព្រះរាជវង្សានុវង្ស រួមនឹងអ្នកចូលរួមផ្សេងទៀត និងឯកអគ្គរដ្ឋទូតមួយចំនួន ដែលស្ថិតនៅក្នុងទីតាំងដែលត្រូវបានរៀបចំដាច់ដោយឡែក ក្រោមការយាមកាមដោយការយកចិត្តទុកដាក់ពីកងកម្លាំងសន្តិសុខ។
អ្នកចូលរួមរាប់រយនាក់បានអមដំណើរព្រះរាជពិធីដង្ហែព្រះសពសម្ដេចក្រុមព្រះ នរោត្ដម រណឫទ្ធិ ក្នុងរាជធានីភ្នំពេញ នៅព្រឹកនេះ ដែលធ្វើដំណើរចេញពីគេហដ្ឋានរបស់ព្រះអង្គក្នុងខណ្ឌដូនពេញ ឆ្ពោះទៅកាន់ទីតាំងព្រះមេរុមុខវត្តបទុម។
បន្ទាប់ពីព្រះរាជពិធីបូជាព្រះសពបញ្ចប់ទៅ ព្រះមហាក្សត្រ និងសម្ដេចម៉ែ ក៏បានធ្វើព្រះរាជដំណើរចាកចេញ ខណៈដែលឯកអគ្គរាជទូតនិងមន្ត្រីផ្សេងទៀតក៏បានចាកចេញជាបន្តបន្ទាប់ពីទីតាំងព្រះរាជពិធីបុណ្យផងដែរ។
សម្ដេចក្រុមព្រះ នរោត្ដម រណឫទ្ធិ ព្រះប្រធានក្រុមឧត្ដមប្រឹក្សាផ្ទាល់ព្រះមហាក្សត្រ ព្រះប្រធានគណបក្សហ្វ៊ុនស៊ិនប៉ិច និងជាអតីតនាយករដ្ឋមន្ត្រីកម្ពុជាទីមួយ ចន្លោះឆ្នាំ១៩៩៣ ដល់ឆ្នាំ១៩៩៧ បានយាងសោយព្រះទិវង្គតនៅរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ នៅឯប្រទេសបារាំង ក្នុងព្រះជន្មាយុ៧៧ព្រះវស្សា ដោយរោគាពាធ៕