ក្រុមមន្ត្រីសង្គមស៊ីវិលលើកឡើងថា រដ្ឋាភិបាលផ្ដល់សេវាអត្រានុកូលដ្ឋានល្អប្រសើរជាងមុន ខណៈការផ្ដល់សេវាផ្នែកអាជីវកម្មនិងការធ្វើជំនួញ អាជ្ញាធរមួយចំនួននៅតែគប់គិតគ្នាប្រព្រឹត្តអំពើពុករលួយជាថ្នូរនឹងការផ្ដល់សេវាឱ្យបានរហ័សនិងទាន់សភាពការណ៍ជូនអ្នកទទួលសេវាទាំងនោះ។
ការលើកឡើងនេះធ្វើឡើងបន្ទាប់ពីអភិបាលខេត្តព្រះវិហារ លោក ប្រាក់ សុវណ្ណ បានអំពាវនាវនិងណែនាំបន្ថែមទៀតដល់មន្ត្រីរាជការ និងមន្ទីរ អង្គភាព ជុំវិញខេត្ត ត្រូវបន្តយកចិត្តទុកដាក់បម្រើសេវាសាធារណៈជូនពលរដ្ឋឱ្យបានល្អប្រសើរ ដោយមិនត្រូវយកកម្រៃក្រៅពីច្បាប់មានចែងបានឡើយ។ ជាពិសេស គឺសេវាអត្រានុកូលដ្ឋាន សេវាសុរិយោដី (កាត់ប្លង់ រត់ប្លង់រឹង ដាក់បន្ទុក ដោះបន្ទុក ដើម្បីខ្ចីប្រាក់ធនាគារ) បង់ពន្ធប្រថាប់ត្រាផ្ទេរដីធ្លី សេវាសុខាភិបាល សេវាអប់រំ ភាស៊ីផ្សារ ចំណតរថយន្ត ជាដើម។
អភិបាលខេត្តរូបនោះព្រមានថា បើមន្ត្រីរូបណាយកលុយពីប្រជាពលរដ្ឋជាថ្នូរផ្ដល់សេវាសាធារណៈលើសច្បាប់ ត្រូវចាត់វិធានការច្បាប់លើមន្ត្រីនោះផងដែរ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ សង្កេតឃើញថា ប៉ុន្មានឆ្នាំកន្លងមកនេះ រដ្ឋាភិបាលផ្ដល់សេវាអត្រានុកូលដ្ឋាន ដូចជា ការធ្វើឬបញ្ជាក់សៀវភៅគ្រួសារ សំបុត្រកំណើត សំបុត្រអាពាហ៍ពិពាហ៍ និងការធ្វើអត្តសញ្ញាណបណ្ណ មានភាពល្អប្រសើរជាងមុន។ ប៉ុន្តែលោកថា ចំពោះសេវាសុំអាជីវកម្មនិងការធ្វើជំនួញនានា ជាពិសេសការស្នើសុំសាងសង់អគារ ការផ្ទេរសិទ្ធិប្លង់ដី និងផ្ទះសម្បែង ហាក់មានភាពស្មុគស្មាញ និងត្រូវចំណាយលុយក្រោមតុជូនទៅមន្ត្រីមួយចំនួន ដើម្បីទទួលបានសេវាលឿននិងទាន់ពេលវេលាផងដែរ។
លោកមានប្រសាសន៍ថា៖ «បើនិយាយពីតម្លៃសេវារបស់រដ្ឋតែមួយមុខ យើងឃើញថាមានភាពល្អប្រសើរ តម្លៃល្អ ដោយសារតែរដ្ឋាភិបាលបានកំណត់។ ហើយការសុំច្បាប់សាងសង់ទំហំដីប៉ុន្មានផ្សេងៗ យើងឃើញថាមាន[បញ្ហា] ប៉ុន្តែបញ្ហាបច្ចេកទេសនៅពីក្រោយហ្នឹង លក្ខខណ្ឌតម្រូវ»។
លោកលើកជាឧទាហរណ៍ដូច្នេះថា៖ «ឧទាហរណ៍ថា ការសុំច្បាប់សាងសង់មួយ ថាតើត្រូវមានលក្ខខណ្ឌបច្ចេកទេស លក្ខខណ្ឌអ្វីជាក់លាក់ផ្សេងទៀត ដែលត្រូវបំពេញជាមួយនឹងការសុំច្បាប់។ អ៊ីចឹងឯកសារផ្សេងៗបន្ថែមទៀត ហ្នឹងហើយគឺនៅតែជាចម្ងល់ នៅតែជាការខ្វះព័ត៌មានលម្អិតសម្រាប់ប្រជាពលរដ្ឋ។ អ៊ីចឹងកាលណាពលរដ្ឋខ្វះព័ត៌មាន អាចធ្វើឱ្យពួកគេប្រឈមនឹងការចំណាយប្រាក់ក្រៅផ្លូវការ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ប្រសិនបើអំពើរពុករលួយក្នុងសេវាសាធារណៈនៅតែបន្តកើតមានឡើង នឹងធ្វើឱ្យប៉ះពាល់ជីវភាពប្រចាំថ្ងៃរបស់ប្រជាពលរដ្ឋ និងប៉ះពាល់កំណើនសេដ្ឋកិច្ច រួមទាំងប៉ះពាល់ដល់មុខមាត់របស់កម្ពុជាថែមទៀតផង។
លោកលើកឡើងថា៖ «វាប៉ះពាល់ដល់កំណើនសេដ្ឋកិច្ចដែរ ប្រសិនបើប្រជាពលរដ្ឋដែលគាត់ត្រូវការសេវាផ្សេងៗដើម្បីប្រកបរបររកស៊ីអីផ្សេងៗ ប៉ុន្តែស្ថាប័នរបស់រដ្ឋហ្នឹងមិនអាចសម្រួលសេវាបានទាន់ពេលវេលាឬក៏មានការរាំងស្ទះ ដោយសារតែមានអំពើពុករលួយហ្នឹង»។
លោកមានប្រសាសន៍បន្ថែមថា៖ «ហើយប៉ះពាក់មួយទៀតដល់មុខមាត់កម្ពុជា ដែលគេមិនអាចចូលមកវិនិយោគនៅប្រទេសកម្ពុជា ដោយសារតែគេមានការធុញទ្រាន់នឹងអំពើពុករលួយដែលវាកើតមាន ដែលយើងមិនអាចលុបបំបាត់បានឬកាត់បន្ថយឱ្យវានៅកម្រិតអប្បបរមាបាន»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាស៍ថា តាមរបាយការណ៍ដែលធ្វើការសិក្សាស្រាវជ្រាវក្នុងឆ្នាំ២០២០ ទោះបីជាការរកឃើញបង្ហាញថា អំពើពុករលួយឬភាពមិនប្រក្រតីនៅក្នុងការផ្ដល់សេវាសាធារណៈមានភាពល្អជាងពីរបាយការណ៍មុនៗក៏ដោយ តែអំពើពុករលួយទ្រង់ទ្រាយធំមិនទាន់មានការថមថយនៅឡើយទេ។
ករណីនេះ លោក ប៉ិច ពិសី លើកទឹកចិត្តដល់រដ្ឋាភិបាលជំរុញទៅមន្ត្រីស្ថាប័នរដ្ឋទប់ស្កាត់កុំឱ្យមានអំពើពុករលួយ ដើម្បីឱ្យអ្នកវិនិយោគជឿទុកចិត្ត ហើយមកបណ្ដាក់ទុននៅកម្ពុជាកាន់តែច្រើន និងធ្វើឱ្យសេដ្ឋកិច្ចជាតិកាន់តែមានភាពល្អប្រសើរជាងមុនផងដែរ។
លោកមានប្រសាសន៍ថា៖ «ការកាត់បន្ថយអំពើពុករលួយ គឺអាចជះឥទ្ធិពលវិជ្ជមានច្រើន ធ្វើឱ្យវិស័យផ្សេងៗងើបទាំងអស់។ បើសិនជាយើងអាចធ្វើបាន គ្រប់ក្រសួង គ្រប់ស្ថាប័ន ត្រូវលុបបំបាត់អំពើពុករលួយ ភាពមិនប្រក្រតីផ្សេងៗ។ ទី២ ជំរុញនូវប្រសិទ្ធភាពនិងប្រសិទ្ធផលនៃការអនុត្តការងាររបស់មន្ត្រីសាធារណៈ ដើម្បីឱ្យមន្ត្រីគាត់ជាអ្នកទទួលបានប្រាក់ខែពីពលរដ្ឋ គាត់ត្រូវបម្រើពលរដ្ឋ ហើយផ្ដល់សេវាឱ្យមានប្រសិទ្ធភាពជូនប្រជាពលរដ្ឋ ដោយមិនតម្រូវឱ្យពលរដ្ឋបង់លុយបន្ថែមទៀត»។
វីអូឌី មិនអាចសុំការបំភ្លឺពីប្រធានអង្គភាពប្រឆំាងអំពើពុករលួយ លោក ឱម យិនទៀង បានទេ នៅរសៀលថ្ងៃព្រហស្បតិ៍នេះ ខណៈអ្នកនាំពាក្យអង្គភាពប្រឆំាងអំពើពុករលួយ លោក ឃាង សេង អះអាងថាជាប់រវល់ប្រជុំ ។
យោងតាមសេចក្ដីថ្លែងការណ៍កាលពីថ្ងៃទី២៨ ខែមករា ឆ្នាំ២០២១ របស់អង្គការតម្លាភាពអន្តរជាតិ ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ បង្ហាញថា លទ្ធផលសន្ទស្សន៍នៃការយល់ឃើញអំពើពុករលួយក្នុងឆ្នាំ២០២០ បង្ហាញថា ប្រទេសកម្ពុជាឈរនៅចំណាត់ថ្នាក់ទី១៦០ ក្នុងចំណោមប្រទេសនិងដែនដីសរុប១៨០ ដែលបានដាក់បញ្ចូលក្នុងការវាយតម្លៃអំពីបញ្ហាអំពើពុករលួយ។ ចំណាត់ថ្នាក់នោះបង្ហាញថា កម្ពុជានៅតែជាប្រទេសដែលមានអំពើពុករលួយអាក្រក់ជាងគេក្នុងតំបន់និងនៅលើពិភពលោក៕