រដ្ឋាភិបាលអាមេរិក បានប្រកាសផ្ដល់ជំនួយចំនួន៨៦ ៦៦៤ដុល្លារ ដល់ការអភិរក្សនិងជួសជុលនូវជណ្ដើរភាគខាងជើងនៃប្រាសាទព្រះវិហារ ដែលត្រូវបានកសាងឡើងអំឡុងសតវត្សរ៍ទី១១។
ក្នុងសេចក្ដីប្រកាសព័ត៌មានរួមមួយកាលពីម្សិលមិញបានឱ្យដឹងថា ពិធីចុះហត្ថលេខាផ្ដល់និងទទួលជំនួយជិត១០ម៉ឺនដុល្លារនេះ ធ្វើឡើងរវាងឯកអគ្គរដ្ឋទូតអាមេរិកប្រចាំកម្ពុជា លោក Patrick Murphy និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៅប្រាសាទព្រះវិហារ នាព្រឹកថ្ងៃទី៨ ខែធ្នូ ឆ្នាំ២០២១។
សេចក្ដីប្រកាសព័ត៌មានរួមនោះបានស្រង់ប្រសាសន៍របស់ឯកអគ្គរដ្ឋទូតអាមេរិក លោក Murphy យ៉ាងដូច្នេះថា៖ «ខ្ញុំមានមោទកភាពក្នុងការប្រកាសនូវការបរិច្ចាគបន្ថែមទៀត ដើម្បីជួយដល់ការអភិរក្សប្រាសាទព្រះវិហារដ៏អស្ចារ្យមួយនេះ។ សហរដ្ឋអាមេរិកនឹងបន្តជាដៃគូដ៏សំខាន់មួយក្នុងកិច្ចប្រឹងប្រែងអភិរក្សនូវសម្បត្តិអច្ឆរិយៈរបស់ព្រះរាជាណាចក្រនេះ»។
ប្រភពដដែលបញ្ជាក់ថា គម្រោងលើកទី១ និងទី២ ដែលបានធ្វើចាប់ពីឆ្នាំ២០១៨ មកដល់ឆ្នាំ២០២១នេះ បានបញ្ចប់ជាស្ថាពរ ក្នុងទឹកប្រាក់៣២០ ០០០ដុល្លារអាមេរិក។ នេះជាជំនួយលើកទី៣ ដែលនឹងជួយគម្រោងអភិរក្សនិងជួសជុលជណ្ដើរបុរាណខាងជើងប្រាសាទព្រះវិហារ ជណ្ដើរថ្នាក់ទី៦ និងថ្នាក់ទី៧ និងជួសជុលចម្លាក់តោចំនួន២។
រដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា មានប្រសាសន៍ក្នុងសេចក្ដីប្រកាសព័ត៌មានរួមនោះ ដោយបង្ហាញការស្វាគមន៍យ៉ាងកក់ក្ដៅចំពោះជំនួយពីក្រសួងការបរទេសនៃសហរដ្ឋអាមេរិក សម្រាប់គម្រោងដំណាក់កាលទី៣ នៃការអភិរក្សនិងជួសជុលជណ្ដើរខាងជើងប្រាសាទព្រះវិហារនេះ។
លោកស្រីបន្តថា៖ «ខ្ញុំជឿជាក់ថា ការខិតខំប្រឹងប្រែងរួមគ្នារបស់យើងនឹងអាចរក្សាបាននូវស្នាដៃសិល្បៈនេះសម្រាប់មនុស្សជំនាន់ក្រោយ ហើយវានឹងតំណាងឱ្យទំនាក់ទំនងវប្បធម៌រវាងប្រទេសទាំងពីរនិងប្រជាជនទាំងពីរ»។
កម្មវិធីមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ (AFCP) ត្រូវបានបង្កើតឡើងដើម្បីជួយអភិរក្សការពារនូវបេតិកភណ្ឌវប្បធម៌សំខាន់ៗជុំវិញពិភពលោក។ រដ្ឋាភិបាលអាមេរិកបានផ្ដល់ជំនួយជួយដល់កម្ពុជាជាង៥លានដុល្លារអាមេរិក តាំងពីឆ្នាំ២០០១មក ដើម្បីជួយដល់ការអភិរក្សទីតាំងបេតិកភណ្ឌសំខាន់ៗផ្សេងទៀត មានទាំងសម្ភារឯកសារប្រវត្តិសាស្ត្រនៅប្រទេសកម្ពុជា។
ប្រាសាទព្រះវិហារ ត្រូវបានអង្គការយូណេស្កូចុះបញ្ជីជាសម្បត្តិបេតិកភណ្ឌពិភពលោក កាលពីថ្ងៃទី៧ ខែកក្កដា ឆ្នាំ២០០៨៕
