ត្រឹមរយៈពេលប្រមាណ២សប្ដាហ៍ចុងក្រោយនេះ ពលករខ្មែរមកពីថៃបានកើនឡើងនៅតាមច្រកព្រំដែនមួយចំនួនក្នុងខេត្តឧត្ដរមានជ័យ ខណៈពួកគេមានការព្រួយបារម្ភពីការឆ្លងជំងឺកូវីដ-១៩ ប្រភេទថ្មី «អូមីក្រុង»។
អភិបាលរងខេត្តឧត្ដរមានជ័យ លោក ឌី រ៉ាជូ បានសង្កេតឃើញថា ពលករដែលវិលត្រលប់មកពីប្រទេសថៃចូលមកកម្ពុជាវិញ ភាគច្រើនតាមរយៈច្រកអូរស្មាច់មានចំនួនច្រើនខុសពីថ្ងៃធម្មតា ជាពិសេសនៅរយៈពេលពីរសប្ដាហ៍ចុងក្រោយនេះ។
លោកបានបន្ថែមថា ស្របពេលការវិលត្រលប់របស់ពលករមកពីប្រទេសថៃ លោកបានស្វាគមន៍យ៉ាងកក់ក្ដៅ។ ប៉ុន្តែស្របពេលការទទួលស្វាគមន៍នេះ ក៏ត្រូវត្រួតពិនិត្យសុខភាពរបស់ពួកគេផងដែរ។
លោកមានប្រសាសន៍ថា៖ «ក្នុងនាមជាអាជ្ញាធរខេត្ត ពួកយើងបានផ្ដល់ភាពកក់ក្ដៅដល់ពួកគាត់ ពេលពួកគាត់ត្រលប់មកវិញ។ ប៉ុន្តែសំខាន់បំផុត ចង់និយាយថា ពេលពួកគាត់ត្រលប់មកវិញ គឺយើងត្រូវពិនិត្យសុខភាពគាត់អ៊ីចឹងទៅណា! យើងមានមន្រ្តីប្រចាំការនៅទីនោះ និងមន្រ្តីសុខាភិបាល មន្រ្តីព្រំដែន។ ហើយបើយើងពិនិត្យឃើញថាបានចាក់វ៉ាក់សាំងរួចរាល់បានគ្រប់ដូសអ៊ីចឹង តាមបទបញ្ជារបស់រាជរដ្ឋាភិបាល គឺថាអនុញ្ញាតឱ្យគាត់វិលត្រលប់ទៅស្រុកកំណើតគាត់វិញ។ ប៉ុន្តែបើយើងពិនិត្យឃើញពលករដែលគាត់ត្រលប់មកវិញ ហើយមិនទាន់បានចាក់វ៉ាក់សាំង គឺថាតម្រូវឱ្យគាត់ធ្វើចត្តាឡីស័កអ៊ីចឹងទៅណា»។
មន្រ្តីទទួលបន្ទុកផ្នែកពលករទេសន្តប្រវេសន៍នៃអង្គការសង់ត្រាល់ លោក ឌី ថេហូយ៉ា បានឱ្យដឹងថា នៅតាមព្រំដែន សកម្មភាពលករធ្វើការឆ្លងដែនមានចំនួនប្រហាក់ប្រហែល១០០នាក់ទៅ២០០នាក់ក្នុងមួយថ្ងៃ។ លោកថា ការចំណាកស្រុកអាចមកពីការបើកទូលាយនៃច្រកព្រំដែន។
លោកថា៖ «ការចំណាកស្រុកនេះប្រហែលតែដោយសារមានការបើកទូលំទូលាយនៅក្នុងស្រុកផង ប៉ុន្តែមិនទាន់បើកព្រំដែននៅឡើយ។ ក៏ប៉ុន្តែពួកគាត់មួយចំនួនច្រូតស្រូវ បានមានន័យថា បញ្ចប់រដូវច្រូតកាត់ស្រូវហ្នឹង យើងនឹងឃើញមាននិន្នាការចំណាកស្រុកច្រើនថែមទៀត»។
លោកក៏បានសម្ដែងក្ដីបារម្ភចំពោះពលករដែលធ្វើចំណាកស្រុកឬវិលត្រលប់មកវិញ ដោយសារតែនៅប្រទេសថែមានករណីរកឃើញវីរុសបំប្លែងថ្មី អូមីក្រុង ចំនួន២ទៅ ៣ករណីរួចហើយ។
លោកថា៖ «ប្រសិនបើជាវាមានភាពរីករាលដាលខ្លាំងទៀត វាអាចប្រឈមនឹងជាមួយពលករចំណាកស្រុកដែរ»៕
