គណបក្សប្រជាជនកម្ពុជា នឹងរៀបចំធ្វើសន្និបាតគណៈកម្មាធិការកណ្ដាលគណបក្ស នៅថ្ងៃទី២៤ ខែធ្នូ ខាងមុខនេះ ដើម្បីជ្រើសរើសបេក្ខភាពនាយករដ្ឋមន្ត្រីបន្តវេនពីលោកនាយករដ្ឋមន្ត្រី ហ៊ុន សែន ខណៈបញ្ជីឈ្មោះគណៈរដ្ឋមន្ត្រីបម្រុងមួយត្រូវបានបង្កើតឡើង។
លោកនាយករដ្ឋមន្ត្រី ហ៊ុន សែន បានប្រកាសនៅពេលចុះទៅត្រួតពិនិត្យមើលការដ្ឋានសាងសង់ព្រលានយន្តហោះថ្មី នៅខេត្តកណ្ដាល នាព្រឹកថ្ងៃព្រហស្បតិ៍ថា សន្និបាតគណៈកម្មាធិការកណ្ដាលគណបក្សប្រជាជនកម្ពុជានឹងធ្វើនៅថ្ងៃទី២៤ ខែធ្នូ ខាងមុខនេះ ដើម្បីសម្រេចទៅលើបញ្ហាបេក្ខភាពអ្នកបន្តវេន [បេក្ខភាពនាយករដ្ឋមន្ត្រី] រួមទាំងការពិនិត្យនិងសម្រេចទៅលើកិច្ចការមួយចំនួនទៀតដែលគណៈកម្មាធិការកណ្ដាលត្រូវធ្វើ។
លោកនាយករដ្ឋមន្ត្រីបានគូសបញ្ជាក់ថា៖ «ថ្ងៃ២៤នេះប្រកាសឱ្យហើយ ថ្ងៃ២៤នេះសមាជិក-សមាជិការគណៈកម្មាធិការកណ្ដាលត្រៀមចូលរួមសន្និបាតគណៈកម្មាធិការកណ្ដាល។ ថ្ងៃ២៤នេះចំថ្ងៃសុក្រ ថ្ងៃ២៤ខាងមុខនេះ ដើម្បីសម្រេចទៅលើបញ្ហាបេក្ខភាព ទាំងបេក្ខភាពបន្តវេន ទាំងស្អីៗ! កន្លងទៅគ្រាន់តែថាប្រកាសប៉ុណ្ណោះទេ និយាយអ៊ីចឹងហ្មងឱ្យវាច្បាស់! ហើយនិងមានកិច្ចការងារមួយចំនួនដែលគណៈកម្មាធិការកណ្ដាលមានការចាំបាច់ត្រូវធ្វើ»។
បើតាមលោកនាយករដ្ឋមន្ត្រី ហ៊ុន សែន គណបក្សប្រជាជនកម្ពុជាក៏បានបោះមួយជំហានទៅមុខថែមទៀត គឺការបង្កើតគណៈរដ្ឋមន្ត្រីបម្រុងមួយដែលលោកថាជាក្រុមបន្តវេន។ ប៉ុន្តែមិនមែនសម្រាប់ឆ្នាំ២០២៣ ខាងមុខនេះទេ។
លោកនាយករដ្ឋមន្ត្រីបានបង្ហើបថា៖ «និយាយថែមមួយម៉ាត់ទៀតចុះ! ម្សិលមិញ ប្រជុំនៅផ្ទះខ្ញុំរួចស្រេចបាត់ទៅហើយ ខ្ញុំ [ហ៊ុន សែន] ខេង [ស ខេង] ឈុំ [សាយ ឈុំ] បាញ់ [ទៀ បាញ់] ម៉ែន សំអន ប្រាំនាក់ សម្រេចបញ្ជីគណៈរដ្ឋមន្ត្រីមួយបាត់ គណៈរដ្ឋមន្ត្រីបម្រុង ប៉ុន្តែមិនមែនឆ្នាំ២០២៣ទេ! ២០២៣ ខ្ញុំនៅតែជាបេក្ខជន ប៉ុន្តែនៅពេលណាមួយ អាហ្នឹងចាំមើលសភាពការជាក់ស្ដែង»។
គិតត្រឹមថ្ងៃទី៥ ខែវិច្ឆិកា ឆ្នាំ២០២១ គណបក្សប្រជាជនកម្ពុជាមានសមាជិកគណៈអចិន្ត្រៃយ៍ សមាជិកគណៈកម្មាធិការកណ្ដាលសរុបចំនួន៨៣៧នាក់។ ក្នុងនោះ លោកនាយករដ្ឋមន្ត្រី ហ៊ុន សែន ជាប្រធាន, លោក ហេង សំរិន ជាប្រធានកិត្តិយស, លោក ស ខេង និងលោក សាយ ឈុំ ជាអនុប្រធានគណបក្ស។
អ្នកនាំពាក្យគណបក្សប្រជាជនកម្ពុជា លោក សុខ ឥសាន នៅមិនទាន់អាចបញ្ជាក់អំពីកម្មវិធីជាក់លាក់នៃការធ្វើសន្និបាតគណៈកម្មាធិការកណ្ដាលគណបក្សប្រជាជនកម្ពុជានេះនៅឡើយទេ។ ចំណែកឯការបង្កើតគណៈរដ្ឋមន្ត្រីបម្រុងរបស់គណបក្សប្រជាជនកម្ពុជាវិញ លោក សុខ ឥសាន បានគូសបញ្ជាក់ថា គឺគ្រាន់តែជាការលើកមុខសញ្ញាព្រាងទុកមុនតែប៉ុណ្ណោះ។
លោក សុខ ឥសាន គូសបញ្ជាក់ថា៖ «អានេះជាការអនុវត្តវប្បធម៌ធម្មតារបស់គណបក្សប្រជាជន។ រឿងអីក៏ដោយត្រូវត្រៀមមុនជានិច្ច មិនឱ្យបាត់ម្ចាស់ការទេ ហើយជាពិសេសរឿងធនធានមនុស្សសម្រាប់បន្តវេន។ ដូចដែលយើងដឹងស្រាប់ហើយ កន្លងទៅ គណបក្សប្រជាជនមិនដែលបាត់ម្ចាស់ការ និងមានត្រៀមលក្ខណៈសម្បត្តិ ហើយលក្ខណៈសម្បត្តិដែលត្រៀមនេះគឺត្រៀមរយៈពេលវែង រយៈពេលមធ្យមក៏មានដែរ។ ធ្វើម៉េចគឺការកសាងធនធានមនុស្សនេះ មិនមែនធ្វើភ្លាមបានភ្លាមនោះទេ»។
ប្រធានអង្គការឃ្លាំមើលការបោះឆ្នោតនិចហ្វិក លោក សំ គន្ធាមី នៅមិនទាន់ហ៊ានអត្ថាធិប្បាយយ៉ាងណានៅឡើយទេ ចំពោះការធ្វើសន្និបាតគណៈកម្មាធិការកណ្ដាលគណបក្សប្រជាជនកម្ពុជាយ៉ាងតក់ក្រហល់ និងការបង្កើតគណៈរដ្ឋមន្ត្រីបម្រុងនេះ។ តែលោកយល់ថា វាជាការល្អប្រសើរដែរ ដើម្បីត្រៀមបម្រុងក្រុមអ្នកបន្តវេនរបស់គណបក្សកាន់អំណាច នៅពេលដែលអ្នកជំនាន់មុនចូលនិវត្តន៍។
លោកមានប្រសាសន៍ថា៖ «បាទ! គ្រោងទុកហ្នឹងក្នុងករណីវាមានបញ្ហាអ្វី ឬក៏មានអ្វីក្នុងក្រុមសមាជិកគណៈរដ្ឋមន្រ្តីបច្ចុប្បន្នហ្នឹង គេអាចដាក់បញ្ចូលដាក់ជំនួស បាទ! អ៊ីចឹងមានន័យថា បើសិនជាមាន បញ្ហាអ្វីយ៉ាងមិច មានសមាជិកគណៈរដ្ឋមន្រ្តីគ្រោងទុកហ្នឹង បម្រុងហ្នឹង ដែលគេអាចរៀបចំធ្វើការបាន»។
ការកំណត់ថ្ងៃធ្វើសន្និបាតគណៈកម្មាធិការកណ្ដាលគណបក្សប្រជាជនកម្ពុជានៅពេលនេះ បានធ្វើឡើងនៅពីរថ្ងៃក្រោយលោកឧបនាយករដ្ឋមន្ត្រី ស ខេង បានចេញសារបញ្ជាក់ពីជំហររបស់លោកកាលពីថ្ងៃទី០៧ ខែធ្នូ។ លោកបញ្ជាក់ថា នឹងគោរពតាមការសម្រេចរបស់គណបក្សប្រជាជនកម្ពុជា ដែលមានលោកនាយករដ្ឋមន្ត្រី ហ៊ុន សែន ជាប្រធានបក្ស ចំពោះការជ្រើសរើសបេក្ខភាពនាយករដ្ឋមន្ត្រីនាពេលអនាគត។ បេក្ខភាពនាយករដ្ឋមន្ត្រីនាពេលអនាគតដែលលោកនាយករដ្ឋមន្ត្រី ហ៊ុន សែន បានប្រកាសគាំទ្រជាចំហនោះជាកូនប្រុសច្បងរបស់លោក គឺលោក ហ៊ុន ម៉ាណែត៕
