អង្គការឃ្លាំមើលសិទ្ធិមនុស្សអន្តរជាតិ (Human Right Watch ឬ HRW) បានទទូចឱ្យទីប្រឹក្សាក្រសួងការបរទេសអាមេរិកលើកយកបញ្ហាសិទ្ធិមនុស្សជជែកជាមួយរដ្ឋាភិបាលកម្ពុជា អំឡុងពេលធ្វើទស្សនកិច្ចនៅកម្ពុជា។
យោងតាមការប្រកាសរបស់ក្រសួងការបរទេសអាមេរិក កាលពីថ្ងៃទី០៨ ខែធ្នូ បានឱ្យដឹងថា ទីប្រឹក្សាក្រសួងការបរទេសអាមេរិក លោក Derek Chollet នឹងធ្វើដំណើរមកកម្ពុជា និងឥណ្ឌូនេស៊ី ចាប់ពីថ្ងៃទី៨ ដល់ទី១៣ ខែធ្នូ ដើម្បីជួបពិភាក្សាជាមួយអ្នកពាក់ព័ន្ធនានាលើបញ្ហាសំខាន់ៗក្នុងតំបន់ ដែលបូករួមទាំងវិបត្តិនៅក្នុងប្រទេសភូមាផងដែរ។ លោក Derek Chollet បានមកដល់ប្រទេសកម្ពុជាហើយនៅថ្ងៃនេះ នឹងត្រៀមជួបពិភាក្សាជាមួយមន្ត្រីជាន់ខ្ពស់រដ្ឋាភិបាលកម្ពុជា។
ពាក់ព័ន្ធនឹងដំណើរទស្សនកិច្ចនៅកម្ពុជានេះ នាយករងអង្គការឃ្លាំមើលសិទ្ធិមនុស្សអន្តរជាតិ (Human Right Watch) ប្រចាំតំបន់អាស៊ី លោក Phil Robertson បានលើកឡើងនៅក្នុងសេចក្ដីថ្លែងការណ៍មួយនៅថ្ងៃសុក្រនេះថា ទីប្រឹក្សាក្រសួងការបរទេសអាមេរិក លោក Derek Chollet គួរតែលើកឡើងពីការព្រួយបារម្ភទាំងឡាយអំពីបញ្ហាសិទ្ធិមនុស្សនៅក្នុងកិច្ចប្រជុំទាំងអស់របស់ខ្លួនជាមួយរដ្ឋាភិបាលកម្ពុជា និងទាមទារឱ្យលោកនាយករដ្ឋមន្ត្រី ហ៊ុន សែន បញ្ឈប់ការបង្រ្កាបទៅលើដៃគូប្រកួតប្រជែងនយោបាយរបស់ខ្លួនតទៅទៀត។
លោក Phil Robertson បានបន្ថែមថា៖ «តាមរយៈដំណើរទស្សនកិច្ចនេះ លោក Derek Chollet ក៏គួរតែជំរុញលោក ហ៊ុន សែន ឱ្យឈប់ធ្វើទុក្ខបុកម្នេញលើសកម្មជនបក្សប្រឆាំង និងអ្នករិះគន់នានាដែលគ្រាន់តែបញ្ចេញទស្សនៈយល់ឃើញរបស់ពួកគេ។ អ្នកសារព័ត៌មានឯករាជ្យគួរតែត្រូវបានការពារ ខណៈដែលសេរីភាពសារព័ត៌មានក៏គួរតែត្រូវបានធានាផងដែរ។ ការធ្លាក់ចុះកាន់តែអាក្រក់ទៅនៃបទដ្ឋានប្រជាធិបតេយ្យ សេរីភាពប្រព័ន្ធផ្សព្វផ្សាយ និងសិទ្ធិមនុស្សនៅកម្ពុជា មិនអាចត្រូវបានព្រងើយកន្តើយនោះទេ»។
លោក Phil Robertson បានលើកឡើងទៀតថា ប្រវត្តិសាស្ត្រកម្ពុជា នាពេលថ្មីៗនេះ បង្ហាញឱ្យឃើញថា អំពើហិង្សាដែលបង្កឡើងដោយអាជ្ញាធររបស់រដ្ឋាភិបាលបានកើនឡើង ខណៈការបោះឆ្នោតខិតជិតមកដល់។
ទោះយ៉ាងណា អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា លោក កុយ គួង សុំមិនបកស្រាយពាក់ព័ន្ធលទ្ធផលនៃកិច្ចប្រជុំរវាងមន្ត្រីការបរទេសរបស់អាមេរិកនិងកម្ពុជាទេ ដោយលោកគ្រាន់តែបញ្ជាក់ថា មន្ត្រីការបរទេសរបស់អាមេរិកបានជួបជាមួយរដ្ឋមន្ត្រីការបរទេសកម្ពុជា លោក ប្រាក់ សុខុន នៅថ្ងៃនេះ។
លោកថា៖ «សេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំនឹងចេញក្នុងពេលឆាប់ៗនេះ។ [មន្ត្រីការបរទេសរបស់អាមេរិកជួបជាមួយថ្នាក់ដឹកនាំកម្ពុជា?] មែន! ជួបជាមួយឯឧត្ដម ប្រាក់ សុខុន»។
ទាក់ទងបញ្ហាភូមាវិញ នាយករងអង្គការឃ្លាំមើលសិទ្ធិមនុស្សអន្តរជាតិ (Human Right Watch) ប្រចាំតំបន់អាស៊ីរូបនេះ បានលើកឡើងថា តាមរយៈការអញ្ជើញនិងការជួបជាមួយរដ្ឋមន្ត្រីការបរទេសមីយ៉ាន់ម៉ា លោក Wunna Maung Lwin នៅរាជធានីភ្នំពេញ កាលពីពេលថ្មីៗនេះ និងគម្រោងធ្វើទស្សនកិច្ចទៅកាន់ទីក្រុង Naypyitaw ប្រទេសមីយ៉ាន់ម៉ារបស់លោកនាយករដ្ឋមន្ត្រី ហ៊ុន សែន នៅថ្ងៃទី៧-៨ ខែមករា ឆ្នាំ២០២២ បង្ហាញឱ្យឃើញថា វាជាផ្នែកមួយនៃបញ្ហាជាជាងការស្វែងរកផ្លូវឆ្ពោះទៅកាន់ដំណោះស្រាយ។
លោកបានសរសេរថា៖ «ប្រសិនបើលោក ហ៊ុន សែន ពិតជាចង់ដើរតួនាទីជាអ្នកបង្កើតសន្តិភាពក្នុងតំបន់អាស៊ានមែននោះ លោកច្បាស់ជានឹងទៅជួបពិភាក្សាជាមួយរដ្ឋាភិបាលបង្រួបបង្រួមជាតិមីយ៉ាន់ម៉ា [NUG] ដែលមានការគាំទ្រពីសមាជិកសភាភាគច្រើនដែលជាប់ឆ្នោតក្នុងការបោះឆ្នោតកាលពីខែវិច្ឆិកា ឆ្នាំ២០២០។ ប្រជាជនមីយ៉ាន់ម៉ា ចង់បានការស្ដារលទ្ធិប្រជាធិបតេយ្យរបស់ពួកគេឡើងវិញ និងសិទ្ធិរបស់ពួកគេត្រូវបានគោរព ខណៈដែលពួកគេនឹងមិនទទួលយកផ្លូវកាត់ណាមួយរបស់លោក ហ៊ុន សែន ឡើយ»៕
Counselor Chollet should raise rights concerns in all meetings w/the #Cambodia government, & demand PM Hun Sen end the rapidly expanding crackdown on political opponents that’s resulted in widespread arrests, mass show trials, & aggressive pursuit of recognized refugees overseas pic.twitter.com/sPqqlKn2Xw
— Phil Robertson (@Reaproy) December 10, 2021
