ប្រទេសនីការ៉ាហ្គា (Nicaragua) នៅថ្ងៃព្រហស្បតិ៍ម្សិលមិញ បានសម្រេចផ្ដាច់ទំនាក់ទំនងការទូតដ៏យូរអង្វែងរបស់ខ្លួនជាមួយកោះតៃវ៉ាន់ ហើយចាប់ផ្ដើមងាកទៅចាប់ចិនជំនួសវិញ ដែលជាការទទួលស្គាល់គោលការណ៍ចិនតែមួយ (One China) របស់បក្សកុម្មុយនីស្តចិន។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់ក្រសួងការបរទេសនីការ៉ាហ្គា ដែលបានឱ្យដឹងនៅក្នុងសេចក្ដីថ្លែងការណ៍មួយថា៖ «រដ្ឋាភិបាលនៃសាធារណរដ្ឋនីការ៉ាហ្គា នៅថ្ងៃនេះ [ថ្ងៃព្រហស្បតិ៍ម្សិលមិញ] បានផ្ដាច់ទំនាក់ទំនងការទូតជាមួយកោះតៃវ៉ាន់ ដោយឈប់មានទំនាក់ទំនង ឬការទាក់ទងផ្លូវការណាមួយតទៅទៀតហើយ»។
សេចក្ដីថ្លែងការណ៍ដដែលបន្ថែមថា៖ «សាធារណរដ្ឋប្រជាមានិតចិន គឺជារដ្ឋាភិបាលស្របច្បាប់តែមួយគត់ដែលតំណាងឱ្យប្រទេសចិនទាំងមូល ខណៈតៃវ៉ាន់គឺជាផ្នែកមួយដែលមិនអាចកាត់ផ្ដាច់បានពីទឹកដីចិន»។
យោងតាមប្រព័ន្ធផ្សព្វផ្សាយរដ្ឋចិន បានឱ្យដឹងថា តំណាងរដ្ឋាភិបាលមកពីប្រទេសចិន និងនីការ៉ាហ្គា ក៏នឹងជួបពិភាក្សាគ្នាទាក់ទងទៅនឹងការកសាងទំនាក់ទំនងការទូតឡើងវិញរបស់ពួកគេ នៅទីក្រុង Tianjin ភាគខាងជើងប្រទេសចិន នៅថ្ងៃសុក្រនេះផងដែរ។
គួរបញ្ជាក់ថា ភាពតានតឹងរវាងតៃវ៉ាន់ និងចិន បានកើនឡើងក្នុងរយៈពេលប៉ុន្មានខែថ្មីៗនេះ ខណៈដែលចិននៅតែបន្តអះអាងថា តៃវ៉ាន់គឺជាទឹកដីរបស់ខ្លួន។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួនដើម្បីធានាឱ្យបានថា គ្មាននរណាម្នាក់អាចបង្ខំឱ្យកោះនេះទទួលយកផ្លូវដែលចិនបានរៀបចំ ដោយមិនផ្ដល់សេរីភាព និងប្រជាធិបតេយ្យនោះទេ៕
