សាលាដំបូងរាជធានីភ្នំពេញ នឹងចុះអនុវត្តដីកាសម្រេចបង្គាប់ឱ្យស្រាវជ្រាវពីស្ថានភាពបច្ចុប្បន្ននៃអចលនវត្ថុរបស់លោក សម រង្ស៊ី ដែលជាអគារស្នាក់ការកណ្ដាលអតីតគណបក្សសង្គ្រោះជាតិ ស្ថិតនៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ នៅដើមសប្ដាហ៍ក្រោយ។
ការសម្រេចនេះបានធ្វើឡើងតាមរយៈលិខិតជូនដំណឹងរបស់អាជ្ញាសាលាដំបូងរាជធានីភ្នំពេញ លោក ទៀង សោភ័ណ ចុះថ្ងៃទី១៣ ខែធ្នូ ឆ្នាំ២០២១ ផ្ញើជូនលោក សម រង្ស៊ី ប្រធានអតីតគណបក្សសង្គ្រោះជាតិ និងភរិយារបស់លោក គឺលោកស្រី ជូឡុង សូមូរ៉ា ដែលជាសហកូនបំណុលនៃការអនុវត្តក្នុងសំណុំរឿងអនុវត្តដោយបង្ខំ ចុះថ្ងៃទី២៨ ខែតុលា ឆ្នាំ២០២១ របស់សាលាដំបូងរាជធានីភ្នំពេញ។
លិខិតដដែលនោះបានបញ្ជាក់ពីការចុះអនុវត្តដីកាសម្រេចបង្គាប់ឱ្យស្រាវជ្រាវស្ថានភាពបច្ចុប្បន្ននៃអចលនវត្ថុរបស់លោក សម រង្ស៊ី និងភរិយា នៅថ្ងៃទី២០ ខែធ្នូ ឆ្នាំ២០២១ វេលាម៉ោង៨កន្លះព្រឹក នៅផ្ទះលេខ៥៧៦ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ។
កាលពីថ្ងៃទី១៥ ខែវិច្ឆិកា ឆ្នាំ២០២១ សមត្ថកិច្ចបានយកដីកាដែលសាលាដំបូងរាជធានីភ្នំពេញសម្រេចលក់ដោយបង្ខំនូវអចលនវត្ថុដែលជាផ្ទះរបស់លោក សម រង្ស៊ី និងជាស្នាក់ការកណ្ដាលរបស់អតីតគណបក្សសង្គ្រោះជាតិ ទៅបិទនៅមុខអគារនោះ។
បើតាមកម្មវត្ថុក្នុងដីកានោះ ការសម្រេចដាក់លក់ដោយបង្ខំនូវផ្ទះរបស់លោក សម រង្ស៉ី នេះ គឺអនុវត្តតាមអំណាចសាលក្រមនៃសាលដីកាស្ថាពរ ដើម្បីយកទៅសងសំណងផ្នែករដ្ឋប្បវេណី និងប្រាក់ពិន័យតាមច្បាប់របស់ភាគីដើមបណ្ដឹងរដ្ឋប្បវេណីចំនួន៤។ ដើមបណ្ដឹងរដ្ឋប្បវេណីដែលលោក សម រង្ស៊ី ត្រូវសងជំងឺចិត្តពីបទ «បរិហារកេរ្តិ៍» រួមមាន លោកនាយករដ្ឋមន្ត្រី ហ៊ុន សែន ចំនួន៤ ០០០លានរៀល, លោក ហេង សំរិន ប្រធានរដ្ឋសភា ចំនួន៤ ០០០លានរៀល, លោក ស ខេង រដ្ឋមន្ត្រីក្រសួងមហាផ្ទៃ ចំនួន២ ០០០លានរៀល និងរដ្ឋាភិបាលចំនួន១ ៨០០លានរៀល៕