យ៉ាងហោចណាស់ មនុស្សម្នាក់ស្លាប់និងជាង១០នាក់ទៀតត្រូវបានសមត្ថកិច្ចឃាត់ខ្លួនពាក់ព័ន្ធសំណុំរឿង «លួចផលិត និងជួញដូរគ្រឿងញៀនទ្រង់ទ្រាយធំ» នៅខេត្តកំពង់ស្ពឺ និងបានដកហូតគ្រឿងញៀនបានជាង១ ៤០០គីឡូក្រាម។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ ប្រាប់ វីអូឌី នៅថ្ងៃចន្ទនេះថា កាលពីយប់រំលងអធ្រាត្រឈានចូលថ្ងៃទី១២ ខែធ្នូនេះ មន្ត្រីជំនាញនៅមន្ទីរប្រឆាំងគ្រឿងញៀននៃក្រសួងមហាផ្ទៃ និងអង្គភាពពាក់ព័ន្ធ ក្រោមការសម្របសម្រួលពីស្ថាប័នអយ្យការ បានចុះបង្ក្រាបករណីជនជាតិចិន២នាក់ដែលបើករថយន្តដឹកគ្រឿងញៀនចេញពីរោងចក្រផលិតដំណាំស្វាយមួយកន្លែងឈ្មោះ «ហ្វាមអេស៊ាង ឯ.ក» ស្ថិតនៅភូមិដំបងវេញ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដើម្បីយកទៅដាក់កប៉ាល់ដឹកឆ្លងសមុទ្រលក់នៅក្រៅប្រទេស។
លោកបញ្ជាក់ថា នៅពេលជនសង្ស័យទាំង២នាក់នោះបើករថយន្តដឹកគ្រឿងញៀនមកដល់ផ្លូវជាតិលេខ៤ ម្ដុំផ្លូវបំបែកស្រែអំបិល ត្រូវបានសមត្ថកិច្ចដាក់បារ៉ាស់ត្រៀមឃាត់រថយន្តនោះមិនឱ្យធ្វើដំណើរទៅមុខទៀត។ ប៉ុន្តែនៅពេលនោះ លោកថា ក្រុមជនសង្ស័យមិនព្រមឈប់នោះទេ ហើយថែមទាំងបើករថយន្តបុកបារ៉ាស់ និងបាញ់រះមកលើសមត្ថកិច្ច ទើបសមត្ថកិច្ចបាញ់តបទៅវិញ បណ្ដាលឱ្យជនជាតិចិនម្នាក់ឈ្មោះ LEE TSUNG HAN ស្លាប់នៅកន្លែងកើតហេតុ និងឃាត់ខ្លួនម្នាក់ផងដែរ។
លោក ម៉ក់ ជីតូ ឱ្យដឹងទៀតថា ក្រោយពីឃាត់ខ្លួនជនសង្ស័យម្នាក់រួចមក សមត្ថកិច្ចបានសួរនាំរហូតដល់ឃាត់ខ្លួនបានមនុស្សជាង១០នាក់ទៀតនៅកន្លែងរោងចក្រ រួមទាំងរឹបអូសវត្ថុតាងមួយចំនួន ដូចជា ម្សៅស កេតាមីន (KE- TAMIN) ចំនួន៧៤ការ៉ុង ដោយក្នុង១ការ៉ុងមាន២០កញ្ចប់ធំ ស្មើប្រមាណ១ ៤៨០គីឡូក្រាមទាំងសំបក។ លើសពីនេះ សមត្ថកិច្ចក៏បានរកឃើញអាវុធខ្លីម៉ាក K៥៤ ១ដើម រថយន្ត២គ្រឿង និងសារធាតុគីមី និងឧបករណ៍កែច្នៃគ្រឿងញៀនមួយចំនួនទៀត។
ករណីនេះ លោក ម៉ក់ ជីតូ អះអាងថា សមត្ថកិច្ចជំនាញកំពុងស្រាវជ្រាវរកមេខ្លោងពាក់ព័ន្ធមួយចំនួនទៀត ខណៈជនសង្ស័យជាង១០នាក់ដែលសមត្ថកិច្ចឃាត់ខ្លួនបាននោះ មន្ត្រីជំនាញកំពុងសួរចម្លើយនិងបញ្ជូនទៅតុលាការដើម្បីចាត់វិធានការតាមច្បាប់។
លោកមានប្រសាសន៍ថា៖ «សមត្ថកិច្ចកំពុងធ្វើការ យើងទើបធ្វើបានតែមួយថ្ងៃហ្នឹង។ យើងមិនមែនចេះតែចោទគេបានណា! វាត្រូវមើលឱ្យច្បាស់ពីភស្តុតាង ពីសាក្សី! [មិនទាន់បាន]បញ្ជូនទៅណាទេ មិនទាន់គ្រប់ម៉ោងគេផង បានអីបញ្ជូន! ៤៨ម៉ោង ឬក៏៧២ម៉ោង បានយើងបញ្ជូន»។
ចំណែកអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ មានប្រសាសន៍ថា បទល្មើសគ្រឿងញៀនទ្រង់ទ្រាយធំនេះមានអ្នកជាប់ពាក់ព័ន្ធច្រើន។
លោកមានប្រសាសន៍ថា៖ «ក្នុងចំណោមទាំង៣នាក់ មិនទាន់មានមេខ្លោងធំទេ គឺអ្នកធ្វើសកម្មភាពពាក់ព័ន្ធទៅនឹងការផលិតខ្លះ ការដឹកជញ្ជូនខ្លះ ក៏ប៉ុន្តែនៅមានមនុស្សច្រើនទៀត សមត្ថកិច្ចកំពុងធ្វើការតាមដាន ហើយប្រមូលយកភស្តុតាងបន្ថែម ដើម្បីដាក់បន្ទុកធ្វើការចោទប្រកាន់ឈានដល់ការឃាត់ខ្លួន»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ជំរុញដល់អាជ្ញាធរប្រយុទ្ធប្រឆាំងគ្រឿងញៀន ត្រូវស្រាវជ្រាវរកភស្តុតាង អ្នកពាក់ព័ន្ធ និងមេខ្លោងឱ្យខានតែបាន ចំពោះសំណុំរឿងគ្រឿងញៀនដែលកើតឡើងទ្រង់ទ្រាយធំៗនាប៉ុន្មានខែចុងក្រោយនេះ។
លោកថា ប្រសិនបើរកឃើញមេខ្លោង ឬអ្នកផ្សេងទៀតជាប់ពាក់ព័ន្ធ ឬគប់គិតគ្នាជាប្រព័ន្ធប្រព្រឹត្តអំពើពុករលួយ ឬជួយលាក់បាំងតម្រុយនិងជនល្មើស ក្រសួងសាម៉ីត្រូវសហការជាមួយអង្គភាពប្រឆាំងអំពើពុករលួយ ស៊ើបអង្កេតលើបញ្ហានេះ ទើបអាចទប់ស្កាត់បទល្មើសទាំងនោះមានប្រសិទ្ធភាព។
លោកមានប្រសាសន៍ថា៖ «អាជ្ញាធរដែលមានសមត្ថកិច្ច គាត់ត្រូវធ្វើការស្រាវជ្រាវលម្អិត ស្រាវជ្រាវជាប្រព័ន្ធ ដើម្បីរកថា ការផលិតគ្រឿងញៀននិងការចែកចាយគ្រឿងញៀននៅកម្ពុជា អាចមានពាក់ព័ន្ធជាបណ្ដាញ ជាសំណាញ់ទៅកន្លែងណាផ្សេងឬអត់។ អ៊ីចឹងគាត់ត្រូវធ្វើការស៊ើបអង្កេតបឋម ប្រសិនជាធ្វើការស៊ើបអង្កេតមានការពាក់ព័ន្ធទៅលើរឿងពុករលួយ អាហ្នឹងគាត់គ្រាន់តែធ្វើកិច្ចសហការជាមួយអង្គភាពប្រឆាំងអំពើពុករលួយ ដើម្បីធ្វើការស៊ើបអង្កេតបន្ត ដើម្បីស្វែងរកអ្នកពាក់ព័ន្ធនៅក្នុងហ្នឹង»។
អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ បញ្ជាក់ថា ក្នុងរយៈពេល១១ខែ ឆ្នាំ២០២១នេះ ការចាប់យកសារធាតុញៀនមានការកើនឡើងទ្វេដង បើធៀបនឹងរយៈពេលដូចគ្នាកាលពី១១ខែ ឆ្នាំ២០២០។ លោកថា ចំនួនករណីប្រព្រឹត្តបទល្មើសមានតិចជាងឆ្នាំមុន ប៉ុន្តែករណីធំៗកើតឡើងច្រើនជាងឆ្នាំមុនទៅវិញ។ យ៉ាងណា លោកមិនបានចាំតួលេខលម្អិតទាំងនោះឡើយ៕