កម្មការិនីកាត់ដេរម្នាក់ដែលមានកូនតូច២នាក់ បានប្រាប់សាលាឧទ្ធរណ៍ថា ខ្លួនមិនបានដឹងថាប្ដីរបស់ខ្លួនជួញដូរគ្រឿងញៀនទេ បន្ទាប់ពីប្ដីប្រពន្ធមួយគូនេះត្រូវបានឃាត់ខ្លួនជាមួយនឹងថ្នាំញៀនប្រភេទមេតំហ្វេតាមីនជិត៥០០ក្រាម នៅពេលកំពុងជិះម៉ូតូចេញពីធ្វើការត្រលប់ទៅផ្ទះ។
កាលពីខែកុម្ភៈ នៅឆ្នាំ២០២១ សាលាដំបូងរាជធានីភ្នំពេញ បានកាត់ទោសស្ត្រីម្នាក់ឈ្មោះ គង់ ចិន្ដា អាយុ៣០ឆ្នាំ ឱ្យជាប់ពន្ធនាគាររយៈពេល២២ឆ្នាំ ខណៈប្ដីរបស់គាត់ឈ្មោះ សុខ ធឿន ត្រូវបានតុលាការផ្ដន្ទាទោសជាប់ពន្ធនាគាររយៈពេល២៥ឆ្នាំ ក្រោយពីពួកគេត្រូវបានសមត្ថកិច្ចចាប់ខ្លួនកាលពីខែឧសភា ឆ្នាំមុន។ នៅថ្ងៃចន្ទម្សិលមិញ អ្នកស្រី ចិន្ដា បានចូលរួមសវនាការនៅសាលាឧទ្ធរណ៍ ដើម្បីស្នើសុំនៅក្រៅឃុំបណ្ដោះអាសន្ន ខណៈបន្តប្ដឹងឧទ្ធរណ៍ចំពោះការផ្ដន្ទាទោសមកលើអ្នកស្រីផងដែរ។
ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ស៊ិន វិសាល មានប្រសាសន៍ថា ប្ដីប្រពន្ធទាំងពីរនាក់ត្រូវបានចាប់ខ្លួននៅសង្កាត់បឹងកក់ទី១ ខណ្ឌទួលគោក ជាមួយនឹងថ្នាំញៀនប្រភេទ មេតំហ្វេតាមីន ចំនួន៤៩៧,៩៥ក្រាម។ លោកបានបន្ថែមថា សាលាដំបូងក៏បានពិន័យអ្នកទាំង២ ក្នុងម្នាក់ៗ៤០លានរៀល ឬប្រហែល១០ ០០០ដុល្លារផងដែរ។
ស្ថិតក្រោមការសាកសួររបស់ចៅក្រម ចិន្ដា បានប្រាប់តុលាការថា ខ្លួនស្នើសុំនៅក្រៅឃុំដោយសារខ្លួនមិនជាប់ពាក់ព័ន្ធនឹងគ្រឿងញៀននេះទេ ហើយម្យ៉ាងទៀត ដោយសារតែកូនពីរនាក់របស់នាងអាយុជាង៣ឆ្នាំ និងជាង១ឆ្នាំ កំពុងរស់នៅ និងមើលថែដោយម្ដាយចាស់ជរាដែលមានជំងឺទៀតផង។
លោកចៅក្រម ស៊ិន វិសាល បានសួរថា៖ «នៅពេលគេចាប់ខ្លួន ប្អូននៅជាមួយគ្រួសារ ម៉េចក៏ឆ្លើយថាមិនដឹង?»
ចិន្ដា បានឆ្លើយតបថា៖ «ខ្ញុំអត់ដឹងទេ! គាត់មកទទួលខ្ញុំចេញពីធ្វើការ។ ខ្ញុំសុំឱ្យដោះលែង [នៅក្រៅឃុំ] ព្រោះអត់មានអ្នកណាមើលកូនខ្ញុំ ហើយម្ដាយខ្ញុំចាស់ហើយឈឺ»។
មេធាវីការពារក្ដីរបស់ ចិន្ដា មានប្រសាសន៍ថា ចិន្ដា គឺជាកម្មករកាត់ដេរនៅរោងចក្រមួយក្បែរផ្សារព្រែកព្នៅ ។ ហើយនៅថ្ងៃនោះ ប្ដីរបស់ ចិន្ដា បានមកទទួលដូចរាល់ដង ប៉ុន្តែបានបង្ហួសយកអីវ៉ាន់ទៅឱ្យគេ។
មេធាវីរូបនេះបន្តថា ប្ដីរបស់ចិន្ដាបានឆ្លើយនៅតុលាការជាន់ទាប អំឡុងពេលជម្រះថា ប្រពន្ធរបស់ខ្លួនមិនបានដឹងថាខ្លួនដឹកគ្រឿងញៀននោះទេ។
មេធាវីការពារក្ដីឱ្យចិន្ដា មានប្រសាសន៍ថា៖ «កូនក្ដីរបស់ខ្ញុំមានកូនពីរនាក់ដែលត្រូវចិញ្ចឹម។ ពេលនេះជាប់ទាំងពីរនាក់ ហើយកូនគាត់គឺជាអនីតិជនដែលត្រូវការមើលថែពីឪពុកម្ដាយ។ ដូច្នេះ វាមានភាពចាំបាច់ណាស់ដែលតុលាការសម្រេចឱ្យគាត់នៅក្រៅឃុំ»។
ទោះបីជាយ៉ាងណា ក្រុមប្រឹក្សាជំនុំជម្រះបានសម្រេចបដិសេធសំណើសុំនៅក្រៅឃុំនេះ ដោយអះអាងថា ចិន្ដា ជាប់ចោទបទឧក្រិដ្ឋធ្ងន់ធ្ងរ។ ក្រុមប្រឹក្សាជំនុំជម្រះបានបន្ថែមថា ការបន្តឃុំខ្លួន គឺដើម្បីកុំឱ្យមានបទល្មើសជាថ្មី ហើយជនជាប់ចោទរូបនេះនឹងបង្ហាញខ្លួនម្ដងទៀតនៅសាលាឧទ្ធរណ៍សម្រាប់សវនាការលើបណ្ដឹងឧទ្ធរណ៍របស់ខ្លួននៅថ្ងៃទី១៧ ខែធ្នូ៕
បកប្រែនិងសម្រួលពីអត្ថបទដើមជាភាសាអង់គ្លេសដោយលោក អ៊ូច សូនី