អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជូនជនសង្ស័យជាជនជាតិចិន (តៃវ៉ាន់) និងជនជាតិខ្មែរជាង១០នាក់ ទៅសាលាដំបូងរាជធានីភ្នំពេញ នៅថ្ងៃនេះ ដើម្បីចាត់វិធានការច្បាប់ ពាក់ព័ន្ធសំណុំរឿង «លួចផលិត និងជួញដូរគ្រឿងញៀនទ្រង់ទ្រាយធំ» នៅខេត្តកំពង់ស្ពឺ។
កាលពីថ្ងៃទី១២ ខែធ្នូ រំលងអធ្រាត្រ សមត្ថកិច្ចចម្រុះបានចាប់ខ្លួនជនសង្ស័យ២នាក់ដែលបានបើករថយន្តដឹកគ្រឿងញៀនចេញពីរោងចក្រផលិតដំណាប់ស្វាយមួយកន្លែងឈ្មោះ «ហ្វាមអេស៊ាង ឯ.ក» ស្ថិតនៅស្រុកឱរ៉ាល់ ខេត្តកំពង់ស្ពឺ ដើម្បីយកទៅដាក់កប៉ាល់ដឹកឆ្លងសមុទ្រលក់នៅក្រៅប្រទេស។ ក្នុងប្រតិបត្តិការបង្ក្រាបដែលធ្វើឡើងនៅចំណុចផ្លូវជាតិលេខ៤ ម្ដុំផ្លូវបំបែកស្រែអំបិលនោះ ក្រុមជនសង្ស័យបានបាញ់តដៃមកលើសមត្ថកិច្ច ទើបសមត្ថកិច្ចបាញ់តបទៅវិញ បណ្ដាលឱ្យជនជាតិចិនម្នាក់ក្នុងចំណោម២នាក់ ដែលមានឈ្មោះ LEE TSUNG HAN ស្លាប់នៅកន្លែងកើតហេតុ។ នេះបើតាមការបញ្ជាក់របស់អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ។
ក្រោយមក អាជ្ញាធរគ្រឿងញៀនបានធ្វើការស្រាវជ្រាវបន្តរហូតដល់ថ្ងៃទី១៥ ខែធ្នូ ឈានដល់ការឃាត់ខ្លួនមេខ្លោងនិងគូកនសរុបជាង១០នាក់ និងរឹបអូសគ្រឿងញៀនបានសរុប២ ២០១គីឡូក្រាម បញ្ជូនទៅតុលាការចាត់វិធានការច្បាប់បន្តផងដែរ។
ជុំវិញករណីបង្ក្រាបការដឹកជញ្ជូននិងជួញដូរគ្រឿងញៀននេះ លោក មាស វីរិទ្ធ បញ្ជាក់នៅថ្ងៃពុធនេះថា ក្រោយការសាកសួរជនសង្ស័យទាំង១០នាក់នោះរួច សមត្ថកិច្ចជំនាញបានបញ្ជូនខ្លួនជនសង្ស័យ និងសំណុំរឿងទៅតុលាការ ដើម្បីចាត់ការបន្តតាមនីតិវិធីច្បាប់។
លោកមានប្រសាសន៍ថា៖ «ទៅដល់តុលាការ គេចាត់ចៅក្រមស៊ើប គឺចៅក្រមស៊ើបគាត់បន្តនីតិវិធី គាត់ចាត់នគរបាលយុត្តិធម៌ឱ្យស៊ើបជំនួសទៀតទៅ យើងចាប់មេខ្លោងមុន វាអាចមានមេខ្លោងបន្តបន្ទាប់ ពីព្រោះវាជាឧក្រិដ្ឋជន មានអង្គការចាត់តាំងច្បាស់លាស់»។
លោក មាស វីរិទ្ធ មានប្រសាសន៍បន្ថែមថា បើសិនជាមេខ្លោងនិងគូកនពិតជាបាន «លួចផលិត និងជួញដូរគ្រឿងញៀនទ្រង់ទ្រាយធំ» ប្រាកដមែន ពួកគេអាចប្រឈមជាប់ពន្ធនាគារអស់មួយជីវិត។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅរសៀលថ្ងៃពុធនេះ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង ជំរុញទៅអាជ្ញាធរពាក់ព័ន្ធ ជាពិសេសអាជ្ញាធរប្រយុទ្ធប្រឆាំងគ្រឿងញៀន ត្រូវទប់ស្កាត់បទល្មើសគ្រឿងញៀនឱ្យដូចភ្លៀងរលឹម និងដាក់ទោសទណ្ឌធ្ងន់ធ្ងរលើជនល្មើស ដោយមិនប្រកាន់អ្នកមានឬអ្នកក្រ ទើបអាចទប់ស្កាត់បទល្មើសនេះបានប្រសិទ្ធភាពខ្ពស់។
លោកជំរុញដូច្នេះថា៖ «ត្រូវបង្ក្រាបកន្លែងជួញដូរធំៗឱ្យបានច្រើនបំផុត ហើយធ្វើយ៉ាងម៉េចឱ្យបញ្ហាគ្រឿងញៀនមានការថមថយនៅកម្ពុជា ហើយក្នុងនោះ ក៏ត្រូវដាក់ទោសទណ្ឌឱ្យបានធ្ងន់ធ្ងរចំពោះជនល្មើសក្នុងការជួញដូរគ្រឿងញៀន ក្នុងការបង្កផលប៉ះពាល់ខ្លាំងដល់សង្គម ហើយធ្វើឱ្យប៉ះពាល់ខ្លាំងជាងគេគឺយុវជន»។
បើតាមរបាយការណ៍យុទ្ធនាការប្រឆាំងគ្រឿងញៀន កាលពីខែតុលា ឆ្នាំ២០២១ បានឱ្យដឹងថា រយៈពេល៩ខែ ឆ្នាំ២០២១នេះ កម្លាំងសមត្ថកិច្ចជំនាញទាំងនគរបាលនិងអាវុធហត្ថបានបង្ក្រាបបទល្មើសគ្រឿងញៀនបាន៤ ៤៦១ករណី ឃាត់មនុស្ស៩ ៨២៨នាក់។
របាយការណ៍ដដែលបន្តថា ប្រតិបត្តិការបង្ក្រាបរយៈពេល៩ខែនេះ សមត្ថកិច្ចចាប់បានសារធាតុញៀនគ្រប់ប្រភេទជាង១ ០៤៩គីឡូក្រាម, កញ្ឆាជាង៥ម៉ឺនដើម និងកញ្ឆាស្ងួត ជាង៩៩គីឡូក្រាម។ ចំណែកសម្ភារចាប់បាន រួមមាន រថយន្ដ៧២គ្រឿង, ម៉ូតូ១៤៤គ្រឿង, ទូរសព្ទ៣ ៦៨១គ្រឿង, ជញ្ជីង១៨៨គ្រឿង និងអាវុធខ្លី៣០ដើម អាវុធវែង១៩ដើម (កែច្នៃ១៨ដើម) រួមទាំងលុយជាច្រើនពាន់ដុល្លារផងដែរ៕