រដ្ឋមន្ត្រីក្រសួងការបរទេសសហរដ្ឋអាមេរិក លោក អេនតូនី ប្លីនខេន (Antony Blinken) បានឱ្យដឹងនៅថ្ងៃពុធនេះថា អាមេរិកកំពុងតែពិនិត្យមើលពីអ្វីដែលជាចំណាត់ការបន្ថែមទៀត ដើម្បីចាត់វិធានការប្រឆាំងនឹងរបបយោធាមីយ៉ាន់ម៉ា ដោយលោកបញ្ជាក់ថា មេដឹកនាំតំបន់អាស៊ីអាគ្នេយ៍ត្រូវបានអញ្ជើញឱ្យជួបពិភាក្សាក្នុងកិច្ចប្រជុំកំពូលជាមួយលោកប្រធានាធិបតី ចូ បៃឌិន។
ការថ្លែងរបស់រដ្ឋមន្ត្រីការបរទេសរូបនេះ ត្រូវបានធ្វើឡើងក្នុងអំឡុងដំណើរទៅកាន់ប្រទេសម៉ាឡេស៊ី ខណៈរដ្ឋមន្ត្រីការបរទេសម៉ាឡេស៊ី លោក Saifuddin Abdullah បានឱ្យដឹងថា ការអញ្ជើញសម្រាប់កិច្ចប្រជុំកំពូលនេះ នឹងត្រូវលើកយកមកពិភាក្សានៅពេលដែលសមភាគីនៃសមាគមប្រជាជាតិអាស៊ីអាគ្នេយ៍ (អាស៊ាន) ជួបប្រជុំគ្នានៅថ្ងៃទី១៩ ខែមករា ខាងមុខ។
ទីភ្នាក់ងារសារព័ត៌មាន Reuters បានស្រង់សម្ដីលោក អេនតូនី ប្លីនខេន ដែលបានថ្លែងថា៖ «យើងពិតជាមានបំណងក្នុងការមានកិច្ចប្រជុំកំពូលពិសេសមួយជាមួយអាស៊ាននៅឆ្នាំក្រោយនេះ»។
ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ និងបានផ្ដួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលជាង១ ០០០នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ។
ទាក់ទិននឹងករណីនេះ លោក អេនតូនី ប្លីនខេន ថ្លែងបន្ថែមថា៖ «វាពិតជាមានសារៈសំខាន់ខ្លាំងណាស់នាពេលខាងមុខ ដើម្បីពិនិត្យមើលថាតើជំហាននិងវិធានការអ្វីខ្លះដែលយើងអាចចាត់វិធានការ ដើម្បីដាក់សម្ពាធដល់របបនេះបន្ថែមទៀត ហើយដើម្បីឱ្យប្រទេសមួយនេះត្រលប់មកដើរលើគន្លងប្រជាធិបតេយ្យវិញ»។
គួរបញ្ជាក់ថា សហរដ្ឋអាមេរិក និងប្រទេសលោកខាងលិចផ្សេងទៀត កាលពីពេលកន្លងទៅ ក៏បានដាក់ទណ្ឌកម្មលើថ្នាក់ដឹកនាំ យោធា និងធុរកិច្ចនានារបស់មីយ៉ាន់ម៉ា ខណៈដែលអាស៊ានក៏ធ្លាប់បានសម្រេចដកវត្តមានមេដឹកនាំយោធាមីយ៉ាន់ម៉ាមិនឱ្យចូលរួមក្នុងកិច្ចប្រជុំកំពូលអាស៊ានផងដែរ៕
Good to meet with Malaysian Foreign Minister @SaifuddinABD. We discussed Burma, challenges to democracy and human rights, the U.S. commitment to peace and stability in the South China Sea, our support for Malaysia’s leadership in the region, and expanding our relationship. pic.twitter.com/Ti6iuMIQ9Z
— Secretary Antony Blinken (@SecBlinken) December 15, 2021
