លោកនាយករដ្ឋមន្ត្រី ហ៊ុន សែន បានអំពាវនាវជាថ្មីឱ្យប្រជាពលរដ្ឋប្រុងប្រយ័ត្នចំពោះមេរោគបំប្លែងថ្មី «អូមីក្រុង» តែមិនត្រូវស្លន់ស្លោ ខណៈកម្ពុជាទើបរកឃើញកូវីដ-១៩បំប្លែងថ្មីនេះ១ករណីប៉ុណ្ណោះ។
ក្នុងពិធីសម្ពោធដាក់ឱ្យប្រើប្រាស់សណ្ឋាគារមួយនៅរាជធានីភ្នំពេញ នាព្រឹកថ្ងៃពុធនេះ លោកនាយករដ្ឋមន្ត្រី ហ៊ុន សែន ថ្លែងថា លោកមិនសប្បាយចិត្តចំពោះការប្រកាសអាសន្នរបស់អ្នកនាំពាក្យអង្គការសុខភាពពិភពលោកនិងប្រទេសខ្លះ ដែលលោកថា ហាក់ដូចជាកូវីដ-១៩ «អូមីក្រុង» ជាជំងឺមហន្តរាយខ្ពស់ បើទោះបីជំងឺនេះមិនទាន់បង្កឱ្យមានអ្នកស្លាប់ច្រើនដូចជំងឺកូវីដ-១៩ប្រភេទ «ដែលតា» និង «អាល់ហ្វា» នៅឡើយ។
លើសពីនេះ លោកថា នៅទ្វីបអាហ្វ្រិកដែលរកឃើញជំងឺកូវីដ-១៩បំប្លែងថ្មីប្រភេទ អូមីក្រុង មិនទាន់មានអ្នកស្លាប់ ខណៈប្រទេសអង់គ្លេសទើបស្លាប់ម្នាក់ប៉ុណ្ណោះ ផ្ទុយពីជំងឺកូវីដ-១៩ប្រភេទ ដែលតា និង អាល់ហ្វា ដែលបានសម្លាប់មនុស្សអស់ជាច្រើន។ ករណីនេះ លោកអំពាវនាវកុំឱ្យប្រជាពលរដ្ឋស្លន់ស្លោ ប៉ុន្តែត្រូវប្រុងប្រយ័ត្ន ដោយអនុវត្តទៅតាមវិធានសុខាភិបាល និងបន្តចាក់វ៉ាក់សាំងកូវីដ-១៩ ឱ្យបានគ្រប់ដូស។
លោកនាយករដ្ឋមន្ត្រី ហ៊ុន សែន គូសបញ្ជាក់ថា៖ «អូមីក្រុង ទើបរកឃើញមួយ! អ៊ីចឹងយើងត្រូវគ្រប់គ្រងសភាពការណ៍នេះ។ ខ្ញុំនិយាយនេះ ក្នុងគោលដៅឱ្យយើងទាំងអស់គ្នាកុំស្លន់ស្លា ហើយខ្ញុំក៏គ្មានសិទ្ធិដើម្បីទូនា្មនអង្គការសុខភាពពិភពលោកនិងប្រទេសមួយចំនួននោះទេ ប៉ុន្តែជួនកាលការភ័យខ្លាចជ្រុលនាំធ្វើឱ្យយើងបង្វែរទិស វាយតម្លៃខុស ចេញពីអាដែលតាដែលវាយលុកទៅរកអាអូមីក្រុងទៅវិញហ្នឹង។ អ៊ីចឹងវត្តមាន អូមីក្រុង មាននៅកម្ពុជាពីយប់មិញរួចទៅហើយ ប៉ុន្តែអត់មានអ្វីគួរឱ្យភ័យខ្លាចទេ នៅពេលដែលយើងអនុវត្តតាមវិធានការសុខាភិបាលបានត្រឹមត្រូវ»។
លោកនាយករដ្ឋមន្ត្រី ហ៊ុន សែន បានលើកឡើងបន្តថា លោកជាអ្នកសម្រេចឱ្យលុបចោលការដាក់បម្រាមប្រទេសចំនួន១០វិញ ដោយមកពង្រឹងវិធានការសុខាពិបាលនៅក្នុងប្រទេស ជាជាងបិទប្រទេសទាំង១០មិនឱ្យចូលកម្ពុជា។
អគ្គនាយកបច្ចេកទេសនៃក្រសួងសុខាភិបាលកម្ពុជា លោកវេជ្ជបណ្ឌិត ហុក គឹមចេង មានប្រសាសន៍ថា ក្រសួងបានដាក់ចេញវិធានការរឹងបន្តឹងអ្នកធ្វើដំណើរពីប្រទេសមានហានិភ័យ ដោយការធ្វើតេស្ត រួមទាំងធ្វើចត្តាឡីស័កឱ្យបានត្រឹមត្រូវ នៅពេលដែលពួកគាត់មកដល់កម្ពុជា ជាដើម។
លោកថា៖ «អ៊ីចឹងយើងនៅតែបន្តតាមដាននៅប្រទេសទាំងឡាយនៅលើពិភពលោក ថាតើប្រទេសណាដែលមានការព្រួយបារម្ភ អ៊ីចឹងយើងនៅតែបន្តអនុវត្តចំពោះវិធានការដែលបានដាក់ក្នុងពេលកន្លងមក»។
ដោយឡែក ចំពោះអ្នកដំណើររួមតាមយន្តហោះជាមួយស្ត្រីខ្មែរម្នាក់ដែលរកឃើញមានជំងឺកូវីដ-១៩ ប្រភេទអូមីក្រុងនោះ លោកថា មានចំនួនជាង១០០នាក់ ដោយអ្នកទាំងនោះក្រសួងបាននិងកំពុងធ្វើការទំនាក់ទំនងពួកគាត់ ដើម្បីឱ្យប្រុងប្រយ័ត្ននិងតាមដានសុខភាពរបស់ខ្លួន។
កាលពីថ្ងៃទី១៤ ខែធ្នូ ឆ្នាំ២០២១ ក្រសួងសុខាភិបាលប្រកាសរកឃើញជំងឺកូវីដ-១៩បំប្លែងថ្មី អូមីក្រុង លើស្ត្រីជនជាតិខ្មែរម្នាក់ដែលបានធ្វើដំណើរតាមជើងហោះហើរចេញពីប្រទេសហ្គាណា ឆ្លងកាត់តាមឌូបៃ និងថៃ រួចបន្តដំណើរមកដល់ប្រទេសកម្ពុជា នៅថ្ងៃទី១២ ខែធ្នូ ឆ្នាំ២០២១។ ហើយបច្ចុប្បន្ន អ្នកជំងឺរូបនេះកំពុងសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន ក្នុងរាជធានីភ្នំពេញ។
ប្រធានសមាគមគ្រូពេទ្យគុណធម៌ លោកវេជ្ជបណ្ឌិត អ៊ួច វុទ្ធី មានប្រសាសន៍ថា ត្បិតតែជំងឺកូវីដ-១៩បម្លែងថ្មី «អូមីក្រុង» ត្រូវរកឃើញចេញពីប្រទេសនៅតំបន់អាហ្វ្រិកក៏ដោយ ប៉ុន្តែទាំងប្រទេសទាំងនោះ និងអង្គការសុខភាពពិភពលោក នៅមិនទាន់បង្ហាញឱ្យច្បាស់អំពីរូបរាងនៃវីរុសប្រភេទថ្មីនេះនៅឡើយ។
លោកថា៖ «រូបរាងវីរុសអូមីក្រុងដែលកើតឡើងក្រោយហ្នឹង តើវាមានរូបរាងយ៉ាងម៉េច? តើវាឆ្លងរហ័សយ៉ាងម៉េច? វាអាចបំផ្លាញទៅដល់ផ្លូវដង្ហើមមនុស្សយើងយ៉ាងម៉េចដែលលឿនធ្វើឱ្យមានហានិភ័យហ្នឹង? អ៊ីចឹងទេ យើងកុំអាលទាន់ភ័យស្លន់ស្លោ! សូមឱ្យបងប្អូនប្រជាពលរដ្ឋទាំងក្នុងនិងក្រៅប្រទេស កុំអាលភ័យស្លន់ស្លោ! តាមដានរឿងហ្នឹងឱ្យបានច្បាស់ ព្រោះរឿងហ្នឹងជានយោបាយសេដ្ឋកិច្ចរបស់ប្រទេសទាំង៧ ដែលគេកំពុងប្រឡងប្រជែងជាមួយគ្នា។ អ៊ីចឹងទេ យើងប្រទេសតូចតាចមិនទាន់ដឹងអូមីក្រុងមកពីណា ហើយរូបរាងយ៉ាងម៉េចទេ យើងមិនទាន់ស្លាប់ដោយជំងឺកូវីដ-១៩នៅប្រទេសយើងនៅឡើយទេ»។
អ្នកស្រាវជ្រាវការអភិវឌ្ឍសង្គម លោកបណ្ឌិត មាស នី កត់សម្គាល់ថា ជំងឺកូវីដ-១៩ អូមីក្រុង មិនទាន់មានសញ្ញាធ្ងន់ធ្ងរ ទោះបីជាជំងឺនេះកំពុងឆ្លងរាលដាលនៅបណ្ដាប្រទេសមួយចំនួនក៏ដោយ។
លោកថា៖ «អូមីងក្រុង មិនទាន់មានសញ្ញាណាមួយដែលធ្វើឱ្យយើងមានការព្រួយបារម្ភទេ។ ហើយរបាយការណ៍ថ្មីៗនេះក៏មើលឃើញថា ក៏មានថ្នាំដែលអាចយកព្យាបាលជំងឺថ្មីហ្នឹងបានដែរ។ នេះជាការតាមដានប្រចាំថ្ងៃរបស់ខ្ញុំ ប៉ុន្តែទោះបីជាយ៉ាងណា ក៏ការប្រុងប្រយ័ត្ននៅតែត្រូវបន្តទៀត»។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៣៩០នាក់ ក្នុងនោះ អ្នកជំងឺព្យាបាលជាសះស្បើយចំនួន១១៦ ៧៤៦នាក់ អ្នកស្លាប់កើនដល់ចំនួន២ ៩៩៥នាក់ និងករណីនាំចូលពីក្រៅប្រទេសចំនួន១៩ ៨៥៣នាក់៕