បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) ជាង ១៣០០ នាក់ បានធ្វើកូដកម្មនៅមុខកាស៊ីណូណាហ្គាវើលដ៍នៅសៅរ៍នេះ ដើម្បីទាមទារឱ្យក្រុមហ៊ុនបញ្ឈប់ការរើសអើងសហជីព និងទទួលយកបុគ្គលិក ៣៦៥ នាក់ឱ្យចូលធ្វើការងារឡើងវិញ។
កូដកម្មនេះ បានកើតឡើង បន្ទាប់ពីវិវាទការងារនៅក្នុងក្រុមហ៊ុនកាស៊ីណូណាហ្គាវើលដ៍នេះ បានកើតឡើងអស់រយៈពេល ៨ខែ មកហើយ ក្រោយពីក្រុមហ៊ុននេះ បានប្រកាសបញ្ឈប់បុគ្គលិក ១ ៣២៩ នាក់ ក្នុងចំណោមបុគ្គលិកសរុបជាង ៨ ០០០នាក់ ដោយលើកហេតុផលថា ក្រុមហ៊ុនជួបវិបត្តិហិរញ្ញវត្ថុដោយសារតែវិបត្តិជំងឺកូវីដ-១៩។ ក៏ប៉ុន្តែតំណាងសហជីពប្រចាំនៅក្នុងកាស៊ីណូយល់ថា ផែនការបញ្ឈប់បុគ្គលិកទ្រង់ទ្រាយធំនេះ គឺជាការគាស់រំលើងសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូណាហ្គាវើលដ៍ ចេញពីក្រុមហ៊ុននេះ ព្រោះបុគ្គលិកដែលបញ្ឈប់ភាគច្រើន គឺជាសមាជិក និងថ្នាក់ដឹកនាំសហជីព។
កូដកម្មរបស់បុគ្គលិកណាហ្គាវើលដ៍ធ្វើឡើងដោយបានទាមទារចំណុចសំខាន់ៗចំនួន ៩ ក្នុងនោះ រួមមាន ទាមទារឱ្យក្រុមហ៊ុនទទួលយកថ្នាក់ដឹកនាំសហជីព សមាជិកប្រតិភូបុគ្គលិក និងកម្មករនិយោជិតចំនួន ៣៦៥ នាក់ដែលមិនព្រមទទួលយកសំណងបញ្ចប់កិច្ចសន្យាការងារ ចូលបម្រើការងារឡើងវិញ, ទាមទារឱ្យក្រុមហ៊ុន គិតប្រាក់បំណាច់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវសម្រាប់កម្មករនិយោជិតដែលត្រូវបានកាត់ចេញតាមគម្រោងកាត់បន្ថយបុគ្គលិក, ទាមទារឱ្យក្រុមហ៊ុនអនុវត្តសេចក្តីបង្គាប់របស់ក្រុមប្រឹក្សាអាជ្ញាកណ្តាលកាលពីថ្ងៃទី១០ ខែកញ្ញា ឆ្នាំ២០២១ ត្រង់ចំណុចទី៣ ដោយគិតប្រាក់បញ្ចប់កិច្ចសន្យាការងារបង្គ្រប់បន្ថែមឱ្យបានត្រឹមត្រូវ, ទាមទារឱ្យក្រុមហ៊ុនផ្តល់ប្រាក់បំណាច់អតីតភាពការងារ និងប្រាក់រំលឹកអតីតភាពការងារឱ្យបានត្រឹមត្រូវតាមច្បាប់សម្រាប់ឆ្នាំ២០២០ និង ២០២១, ទាមទារឱ្យក្រុមហ៊ុនផ្តល់ប្រាក់បន្ថែមស្មើនឹង ៧% លើប្រាក់ឈ្នួលគោលបច្ចុប្បន្នឱ្យកម្មករនិយោជិតទាំងអស់ ដើម្បីបំពេញអតិផរណាតម្លៃទំនិញលើទីផ្សារ ទាមទារឱ្យក្រុមហ៊ុនបញ្ឈប់ការកេងប្រវ័ញ្ចតាមរយៈការប្រើប្រាស់កម្មករនិយោជិតក្រោមស្លាកកម្មសិក្សា រួមនិងចំណុចសំខាន់ៗមួយចំនួនទៀត។
ការធ្វើកូដកម្មរបស់បុគ្គលិកក្រុមហ៊ុនកាស៊ីណូណាហ្គាវើលដ៍នៅព្រឹកមិញនេះ បានបន្តរហូតដល់រសៀលថ្ងៃសៅរ៍នេះ ខណៈអភិបាលរាជធានីភ្នំពេញ លោក ឃួង ស្រេង បានចេញលិខិតព្រមានមួយច្បាប់នៅថ្ងៃនេះ ឱ្យបញ្ឈប់ការធ្វើបាតុកម្មនេះជាបន្ទាន់។ អាជ្ញាធររាជធានីភ្នំពេញបានចាត់ទុកកូដកម្មនេះ ថាជាបាតុកម្មខុសច្បាប់ដោយប្រើប្រាស់សួនច្បារសាធារណៈ ដែលផ្ទុយពីការឯកភាពគ្នានៅក្នុងកំណត់ហេតុ កាលពីថ្ងៃទី១៧ ខែធ្នូ រវាងតំណាងសហជីព និងរដ្ឋបាលរាជធានីភ្នំពេញ។
គួរជម្រាបជូនដែរថា ស្របពេលដែលបុគ្គលិកក្រុមហ៊ុនកាស៊ីណូណាហ្គាវើលដ៍ធ្វើកូដកម្មនៅថ្ងៃនេះ សាលាដំបូងរាជធានីភ្នំពេញក៏បានចេញដីការក្សាការពារមួយ ដោយបានចាត់ទុកកូដកម្មនេះ ថាជាកូដកម្មខុសច្បាប់។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស សង់ត្រាល់ លោក ឃុន ថារ៉ូ បានសំដែងការសោកស្តាយចំពោះតុលាការក្រុងភ្នំពេញដែលបានចេញដីការក្សាការពារ ទៅតាមបណ្តឹងរបស់ក្រុមហ៊ុន។
លោក ឃុន ថារ៉ូ បន្ថែមថា៖ «មានន័យថា [ដីការក្សាការពារ] កាលណាតុលាការប្រកាសចឹង មានន័យថា តុលាការបង្គាប់ឱ្យកូដករហ្នឹងគាត់ចូលធ្វើការងារក្នុងរយៈពេល ៤៨ម៉ោង ចឹងក្នុងករណីដែលកូដករគាត់មិនចូលធ្វើការងារក្នុងរយៈពេល ៤៨ ម៉ោងនេះ គឺចាត់ទុកថាកូដករហ្នឹង បុគ្គលិកហ្នឹង គាត់បានប្រព្រឹត្តកំហុសធ្ងន់ធ្ងរ»។
លោកបានបន្តថា៖ «ចឹងអាហ្នឹងវាជារឿងអយុត្តិធម៌បំផុត សម្រាប់កម្មករនិយោជិត ដែលគាត់ប្រើប្រាស់សិទ្ធិជាមូលដ្ឋានដែលធានាដោយច្បាប់ស្តីពីការងារ ដែលធានាដោយអនុសញ្ញាស្នូលនៃអង្គការពលកម្មអន្តរជាតិ ស្តីពីសិទ្ធិនៅក្នុងការអនុវត្តសេរីភាពខាងផ្នែកសមាគមដែលកម្ពុជាយើងបានផ្តល់សច្ចាប័ណ»។
កាលពីដើមខែធ្នូនេះ អង្គការ សមាគម និងសហជីពចំនួន ២៥ បានចេញសេចក្តីថ្លែងការណ៍មួយសំដែងការខកចិត្ត ចំពោះការបញ្ឈប់បុគ្គលិកកាស៊ីណូណាហ្គាវើលដ៍នេះ។ សេចក្តីថ្លែងការណ៍បានចាត់ទុកថា ក្រុមហ៊ុនមានចេតនារំលាយរចនាសម្ព័ន្ធថ្នាក់ដឹកនាំសហជីព ដោយថា ការធ្វើបែបនេះមិនសមហេតុផល និងមិនអាចទទួលយកបានឡើយ៕
