សាលាដំបូងរាជធានីភ្នំពេញ បានសម្រេចឃុំខ្លួនមន្ត្រីជាន់ខ្ពស់នគរបាលខេត្តកំពង់ឆ្នាំង ២រូប នៅថ្ងៃអាទិត្យនេះ ក្នុងសំណុំរឿងរុករានកាប់ទន្ទ្រានព្រៃលិចទឹកក្នុងតំបន់ហាមឃាត់នៃភូមិសាស្ត្របឹងទន្លេសាប។
ក្នុងដីកាបង្គាប់ឱ្យឃុំខ្លួនពីរដាច់ដោយឡែកពីគ្នា ចេញដោយអនុប្រធានសាលាដំបូងរាជធានីភ្នំពេញ និងជាចៅក្រមស៊ើបសួរលោក កូយ សៅ នៅថ្ងៃទី១៩ ខែធ្នូ ឆ្នាំ២០២១ បានសម្រេចឱ្យកម្លាំងនគរបាលនាំខ្លួនស្នងការរងនគរបាលខេត្តកំពង់ឆ្នាំង លោកឧត្តមសេនីយ៍ត្រី ស៊ុំ សុជាតិ និងនាយការិយាល័យអន្ដរាគមន៍ នៃស្នងការដ្ឋាននគរបាលខេត្ដកំពង់ឆ្នាំង លោកវរសេនីយ៍ឯក កែវ ណារុន ទៅឃុំខ្លួននៅមណ្ឌលអប់រំកែប្រែទី១ឬ ពន្ធនាគារព្រៃសជាបណ្តោះអាសន្ន។
ការសម្រេចឃុំខ្លួនមន្ត្រីនគរបាលជាន់ខ្ពស់ខេត្តកំពង់ឆ្នាំង២រូបនេះ ដោយក្នុងដីកាបង្គាប់ឱ្យឃុំខ្លួនបញ្ជាក់ថា ពាក់ព័ន្ធការកាន់កាប់ព្រៃលិចទឹកនៅតំបន់ហាមឃាត់។
ក្នុងដីកាដដែលឱ្យដឹងដែរថា ឈ្មោះ ស៊ុំ សុជាតិ ឈ្មោះហៅក្រៅ ឈុយ និងលោក កែវ ណារុន ត្រូវបានតុលាការចោទប្រកាន់ពីបទប្រហាក់ប្រហែលគ្នា ដូចជាបំផ្លាញ និង គៃបំបាត់ បទហ៊ុមព័ទ្ធកាន់កាប់ដីព្រៃលិចទឹក បទមិនប្រកាសទ្រព្យសម្បត្តិ និងបំណុល និងបទសម្អាតប្រាក់ជាដើម ដែលប្រព្រឹត្តនៅចំណុចដែនព្រៃលិចទឹកតំបន់៣ នៃបឹងទន្លេសាបក្នុងភូមិសាស្ត្រភូមិកង្កែប និងភូមិធ្លក ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងឆ្នាំ២០១៧ ដល់ឆ្នាំ២០២១។
ប្រភពដដែលថា ពួកគេត្រូវបានផ្តន្ទាទោសតាមបញ្ញត្តិមួយចំនួនដូចជា មាត្រា ៦០៨ នៃក្រមព្រហ្មទណ្ឌ និងមាត្រា ៨៨,មាត្រា ៩៨ នៃច្បាប់ស្តីពីជលផល និងមាត្រា ៣២, មាត្រា ៣៨ នៃច្បាប់ស្តីពីការប្រឆាំងអំពើពុករលួយ និងមាត្រា ៣ថ្មី, មាត្រា ២៨ថ្មី១ នៃច្បាប់ស្តីពីវិសោធនកម្មច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
មន្ត្រីជាន់ខ្ពស់នគរបាលយុត្តិធម៌ខេត្តកំពង់ឆ្នាំងទាំងពីររូប ត្រូវបានឃាត់ខ្លួនដោយអង្គភាពប្រឆាំងអំពើពុករលួយ ឬACU បន្ទាប់ពីហៅទៅសួរនាំ កាលពីថ្ងៃទី១៦ ខែធ្នូ ឆ្នាំ២០២១ ពាក់ព័ន្ធការកាន់កាប់ព្រៃលិចទឹក នៅតំបន់៣ ក្នុងស្រុកកំពង់លែង ខេត្តកំពង់ឆ្នាំង ដែលជាតំបន់ហាមឃាត់ក្នុងភូមិសាស្ត្របឹងទន្លេសាប។
យ៉ាងណានេះ កាលពីថ្ងៃទី៣ ខែធ្នូនេះ រដ្ឋាភិបាលបានប្រគល់ភារកិច្ចឱ្យអង្គភាពប្រឆាំងអំពើពុករលួយ ធ្វើការស៊ើបអង្កេតស្រាវជ្រាវ និងចាត់វិធានការច្បាប់ ចំពោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន និងដកហូតដីជាង២ ០០០ហិកតា ទុកជាសម្បត្តិរដ្ឋវិញ ខណៈមនុស្ស១៣នាក់ទៀត ក្នុងនោះ មានមន្ត្រីនគរបាលផងបានចេញសារភាព និងព្រមប្រគល់ដីជូនរដ្ឋវិញ។
បើតាមកំណត់ហេតុកិច្ចប្រជុំក្រុមការងារអនុវត្តបទបញ្ជានាយករដ្ឋមន្ត្រីរបស់អាជ្ញាធរខេត្តកំពង់ឆ្នាំង កាលពីថ្ងៃទី២៩ ខែវិច្ឆិកា ឆ្នាំ២០២១ បានបញ្ជាក់ថា អ្នកកាន់កាប់អាស្រ័យផលដីព្រៃលិចទឹក ១៣នាក់ ដែលបានសារភាពនិងប្រគល់ដីជូនរដ្ឋវិញនោះ រួមមាន ស្នងការរងនគរបាលខេត្តកំពង់ឆ្នាំង លោក ស៊ុំ សុជាតិ មានដី៦៧៥ហិកតា, ប្រធានការិយាល័យអន្តរាគមន៍ នៃស្នងការនគរបាលខេត្តកំពង់ឆ្នាំង លោក កែវ ណារុន មានដី៣២ហិកតា, មេបញ្ជាការសឹករងស្រុកកំពង់លែង លោក យឹម សារ៉ាត់ មានដី៦០ហិកតា និងពលរដ្ឋផ្សេងទៀត ដែលមានផ្ទៃដីសរុប២ ០៥៨,៥ហិកតា៕