តុលាការកំពូលសម្រេចច្រានចោលបណ្ដឹងរបស់ស្ថាបនិកគណបក្សបេះដូងជាតិ នៅថ្ងៃសុក្រនេះ ខណៈប្រធានគណបក្សនេះបានចាត់ទុកថា រឿងនេះគឺជារឿងនយោបាយ។
ការបដិសេធនេះធ្វើឡើងក្រោយពីចៅក្រមតុលាការកំពូល លោក គង់ ស្រ៊ីម បានបើកសវនាការនៅថ្ងៃសុក្រនេះ អស់រយៈពេលប្រមាណជាង៤ម៉ោង។
មេធាវីការពារក្ដីឱ្យក្រសួងមហាផ្ទៃ លោក ហាក់ សៀងលី ថ្លែងក្នុងសវនាការនេះដោយចោទប្រកាន់ថា គណបក្សបេះដូងជាតិ មិនបានស្ដាប់តាមការណែនាំរបស់ក្រសួងមហាផ្ទៃ ខណៈក្រសួងបានជូនដំណឹង៣លើកឱ្យកែតម្រូវចំណុចគោលៗរួចហើយ។ ក្នុងនោះ លោកលើកឡើងថា គណបក្សនេះបានផ្ដល់ស្នាមមេដៃមិនច្បាស់លាស់ បំប៉ោងតួលេខ និងផ្ដើមដំណើរការដោយភាពមិនត្រឹមត្រូវតាមលក្ខន្តិកៈរបស់ក្រសួងមហាផ្ទៃ។
ក្នុងសវនាការនេះ លោក ហាក់ សៀងលី បន្តចោទប្រកាន់ថា គណបក្សនេះបង្កើតកំហុស រួចសុំឱ្យលើកលែងទោស។ ដូច្នេះ ប្រសិនបើក្រសួងមហាផ្ទៃលើកលែងតាមសំណូមពរ នោះមានន័យថា ក្រសួងបានចូលរួមប្រព្រឹត្តបទឧក្រិដ្ឋផងដែរ។
សវនាការនេះបានធ្វើឡើងបន្ទាប់ពីមេធាវីការពារក្ដីឱ្យគណបក្សបេះដូងជាតិ លោក សំ សុគង់ បានដាក់ពាក្យបណ្ដឹងទៅតុលាការកំពូល កាលពីថ្ងៃទី២៦ ខែវិច្ឆិកា ដើម្បីសុំឱ្យតុលាការកំពូលទម្លាក់ចោលការចោទប្រកាន់របស់ក្រសួងមហាផ្ទៃ ហើយបើកផ្លូវឱ្យកូនក្ដីបានចុះបញ្ជីគណបក្សបេះដូងជាតិរបស់ខ្លួនឡើងវិញ ដើម្បីបានចូលរួមបោះឆ្នោតនៅឆ្នាំ២០២២ និង២០២៣ខាងមុខ តាមលក្ខខណ្ឌច្បាប់។
យ៉ាងណាក្ដី ស្ថាបនិកគណបក្សបេះដូងជាតិ លោក សៀម ភ្លុក បានច្រានចោលការចោទប្រកាន់នេះថា លោកមិនមានចេតនាទុច្ចរិតដូចការចោទប្រកាន់ឡើយ។ លោកថា ការស្រង់ស្នាមមេដៃនេះ លោកបានប្រគល់ការងារឱ្យមន្ត្រីថ្នាក់មូលដ្ឋានចុះស្រង់ ចំណែកមន្ត្រីក្នុងគណបក្សរបស់លោកក៏មិនមានសមត្ថភាពធ្វើកោសលវិច័យស្នាមមេដៃនោះដែរ។
យ៉ាងណា បន្ទាប់ពីសវនាការនេះ លោក សៀម ភ្លុក ប្រាប់អ្នកសារព័ត៌មានថា លោកមានការសោកស្ដាយចំពោះការសម្រេចរបស់តុលាការកំពូល។
លោកថា៖ «ខ្ញុំគិតថា រឿងនេះជារឿងនយោបាយ ព្រោះបើអនុវត្តច្បាប់ បើគិតទៅតាមនីតិវិធី អង្គហេតុអង្គច្បាប់ ខ្ញុំនៅតែមិនអស់ចិត្ត ហើយក៏ខ្ញុំនៅតែមានអំណះអំណាង។ ការចោទរបស់តុលាការ និងការចោទរបស់ក្រសួងមហាផ្ទៃយ៉ាងនេះយ៉ាងនោះ អាហ្នឹងខ្ញុំនៅតែមិនអស់ចិត្ត។ យើងមានភស្តុតាងអីគ្រប់គ្រាន់ មានអំណះអំណាង មានឯកសារអីត្រឹមត្រូវហើយ ប៉ុន្តែក្រោយមក លោក [ចៅក្រម] សម្រេចបដិសេធ [ដោយឡែក] ទទួលយកការសម្រេចរបស់ក្រសួងមហាផ្ទៃ [និង] ចាត់ទុកជាបានការទៅវិញ អានោះហើយដែលខ្ញុំមិនអស់ចិត្ត»។
គណបក្សបេះដូងជាតិ នាពេលថ្មីៗនេះ ត្រូវបានក្រសួងមហាផ្ទៃគំរាមប្ដឹងទៅតុលាការដើម្បីចាត់វិធានការផ្លូវច្បាប់ និងបដិសេធការសុំចុះបញ្ជីគណបក្សនយោបាយ។ វិធានរបស់ក្រសួងមហាផ្ទៃ បានសម្អាងហេតុថា ស្ថាបនិកគណបក្សបេះដូងជាតិ មានចេតនា «ទុច្ចរិត» ក្លែងស្នាមមេដៃសមាជិក ក្នុងការបំពេញបែបបទសុំចុះបញ្ជីគណបក្សនយោបាយ។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងលិខិតមួយដាក់ជូនលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះថា តាមការធ្វើកោសលវិច័យទៅលើស្នាមមេដៃចំនួន៤ ៧៨១មេដៃ ដែលគណបក្សបេះដូងជាតិផ្ញើទៅក្រសួងដើម្បីសុំចុះបញ្ជីគណបក្ស បានរកឃើញមានភាពមិនប្រក្រតីមួយចំនួនដូចជា ស្នាមមេដៃខ្លះខុសទៅនឹងស្នាមមេដៃក្នុងអត្តសញ្ញាណបណ្ណ និងស្នាមមេដៃមួយចំនួនទៀតខូចគុណភាពមិនអាចធ្វើកោសលវិច័យបានជាដើម។
ពាក់ព័ន្ធនឹងករណីនេះ គណបក្សបេះដូងជាតិ ធ្លាប់បានលើកឡើងក្នុងសេចក្ដីថ្លែងការណ៍ចុះថ្ងៃទី២២ ខែវិច្ឆិកា ថាខ្លួនមានការសោកស្ដាយដែលក្រសួងមហាផ្ទៃបដិសេធការសុំចុះបញ្ជីគណបក្សរបស់ខ្លួន ហើយថែមទាំងចោទប្រកាន់យ៉ាងអយុត្តិធម៌។ គណបក្សនេះអះអាងថា ស្នាមមេដៃដែលខ្លួនបានដាក់ជូនទៅក្រសួងមហាផ្ទៃ មានចំនួនតែ៤ ៦១៨នាក់ មិនមែនចំនួន៤ ៧៨១នាក់ ដូចការអះអាងរបស់ក្រសួងមហាផ្ទៃនោះទេ។ មួយវិញទៀត គណបក្សនេះថា ការរកឃើញភាពមិនប្រក្រតីនៃស្នាមមេដៃ គួរតែក្រសួងណែនាំពីកំហុសឆ្គង ដើម្បីកែសម្រួលទៅតាមលក្ខន្តិកៈ៕