កម្ពុជាបន្តរកឃើញករណីអ្នកឆ្លងជំងឺកូវីដ-១៩ចំនួន ៥ នាក់បន្ថែមទៀត កាលពីថ្ងៃម្សិលមិញនេះ ខណៈមានអ្នកស្លាប់ម្នាក់។
យោងតាមសេចក្តីជូនព័ត៌មានរបស់ក្រសួងសុខាភិបាលកម្ពុជា ស្តីពី ការសរុបស្ថានភាពជំងឺកូវីដ-១៩ ក្នុងប្រទេសកម្ពុជា សម្រាប់ថ្ងៃទី២៤ ខែធ្នូ ឆ្នាំ២០២១ បានឱ្យដឹងថា ផ្អែកតាមលទ្ធផលដែលបញ្ជាក់ដោយម៉ាស៊ីនធ្វើតេស្ត PCR កម្ពុជាមានករណីឆ្លងជំងឺកូវីដ-១៩ថ្មីចំនួន ៥ នាក់ ករណីអ្នកជាសះស្បើយ ៨នាក់ និងករណីស្លាប់ ១ នាក់។ ករណីស្លាប់ម្នាក់នេះ ក្រសួងបញ្ជាក់ថា អ្នកជំងឺមិនបានចាក់វ៉ាក់សាំងការពារជំងឺកូវីដ-១៩ ឡើយ។
គិតត្រឹមថ្ងៃទី២៥ ខែធ្នូ ឆ្នាំ២០២១នេះ កម្ពុជាមានអ្នកឆ្លងជំងឺកូវីដ-១៩សរុប ១២០ ៤៤៥ នាក់ ក្នុងនោះករណីនាំចូលពីក្រៅប្រទេសចំនួន ១៩ ៨៧០នាក់, ស្លាប់ ៣ ០០៨ នាក់ និងកំពុងសម្រាកព្យាបាលចំនួន ៣ ៥៩២នាក់។
លោកនាយករដ្ឋមន្ត្រី ហ៊ុន សែន កាលពីថ្ងៃទី២០ ខែធ្នូ បានប្រកាសបិទបញ្ចប់ព្រឹត្តិការណ៍សហគមន៍ ២០ កុម្ភៈ បន្ទាប់ពីលោកអះអាងថា ស្ថានភាពជំងឺកូវីដ-១៩នៅកម្ពុជា បានធូរស្រាលឡើងវិញ៕