លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាបានរកឃើញអ្នកឆ្លងជំងឺកូវីដ-១៩ បំប្លែងខ្លួនថ្មី «អូមីក្រុង»ចំនួន ១៥ករណីបន្ថែមទៀតនៅថ្ងៃអាទិត្យនេះ ដែលធ្វើឱ្យចំនួនអ្នកឆ្លងវីរុសប្រភេទថ្មីនេះកើនឡើងរហូតដល់ ៣១ករណីនៅកម្ពុជា។
ថ្លែងក្នុងពិធីទទួលវ៉ាក់សាំងប្រភេទ Pfizer ដែលជាជំនួយរបស់រដ្ឋាភិបាលអូស្រ្តាលីចំនួន ៧៨៣ ០០០ដូស នៃជំនួយសរុបចំនួន ២ ៣៥០ ៥៣០ដូស នៅព្រលានយន្តហោះអន្តរជាតិភ្នំពេញនៅយប់ថ្ងៃទី២៦ខែធ្នូនេះ លោក ហ៊ុន សែន មានប្រសាសន៍ថា ក្នុងរយៈពេលតែ១ថ្ងៃប៉ុណ្ណោះ ពោលគឺនៅថ្ងៃអាទិត្យនេះ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួនថ្មី ប្រភេទ «អូមីក្រុង» ចំនួន ១៥ករណី ដែលជាករណីនាំចូលពីក្រៅប្រទេសទាំងអស់។
លោកបញ្ជាក់ថា ចំនួនរកឃើញថ្មីនេះ បានធ្វើឱ្យអ្នកឆ្លងមេរោគប្រភេទថ្មី «អូមីក្រុង» នៅកម្ពុជាកើនឡើងដល់៣១ករណី ខណៈ ៣ករណី ឬ ៣នាក់ ក្នុងចំណោមអ្នកឆ្លងវីរុសប្រភេទថ្មីទាំងនោះ ត្រូវបានព្យាបាលជាសះស្បើយ។
លោកនាយករដ្ឋមន្ត្រី ហ៊ុន សែន ៖ «ដូច្នេះខ្ញុំសូមយកឱកាសនេះ ដើម្បីសូមឱ្យប្រជាពលរដ្ឋយើងមានការប្រុងប្រយត្ន ក៏ប៉ុន្តែក៏មិនត្រូវភ័យស្លន់ស្លោនោះទេ។ យើងត្រូវរួមគ្នាដើម្បីទប់ស្កាត់ជាមួយនិងការឆ្លងនូវមេរោគនេះ[អូមីក្រុង] ចូលទៅក្នុងសហគមន៍។ នៅលើពិភពលោកនេះមានការឆ្លងនូវជំងឺនេះ[អូមីក្រុង] នៅប្រទេសជាច្រើនរួចមកយហើយ ក៏ប៉ុន្តែជំងឺនេះមិនសាហាវដូចជា ដែលតា នោះទេ គឺនៅអាចព្យាបាលបាន។ ប៉ុន្តែអ្វីដែលសំខាន់នៅក្នុងប្រទេសរបស់យើងពេលនេះ គឺសុទ្ធសឹងតែចូលមកតាមច្រកព្រលានយន្តហោះ ទាំងនៅភ្នំពេញ ទាំងនៅសៀមរាប »។
ប្រមុខរដ្ឋាភិបាលរូបនេះអះអាងថា យ៉ាងណាកម្ពុជានៅអាចគ្រប់គ្រងការឆ្លងមេរោគបំប្លែងខ្លួនថ្មី «អូមីក្រុង» នេះ មិនឱ្យរីករាលដាលចូលទៅក្នុងសហគមន៍នោះឡើយ។
លោក ហ៊ុន សែន ក៏អំពាវនាវទៅប្រជាពលរដ្ឋទាំងអស់ឱ្យប្រុងប្រយត្នខ្ពស់ចំពោះការឆ្លងមេរោគបំប្លែងខ្លួនថ្មីនេះ ដោយត្រូវចូលរួមទប់ស្កាត់មិនឱ្យឆ្លងចូលទៅក្នុងសហគមន៍ ត្បិតវីរុសកូវីដ-១៩ បំប្លែងខ្លួនថ្មីនេះ មានលទ្ធភាពចម្លងលឿន ជាងប្រភេទបំប្លែងខ្លួនផ្សេងទៀត ដូចជា ដែលតា ឬ អាល់ហ្វា ជាដើម។
កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួន «អូមីក្រុង» ជាបន្តបន្ទាប់ ក្រោយពេលរដ្ឋាភិបាលតាមរយៈក្រសួងសុខាភិបាល បានសម្រេចដកបម្រាមចំពោះអ្នកដំណើរដែលមកពីប្រទេស ឬ ឆ្លងកាត់ប្រទេសចំនួន១០ ក្នុងតំបន់អាហ្វ្រិកមិនឱ្យចូលមកកម្ពុជា បន្ទាប់ពីតំបន់មួយនេះរកឃើញករណីឆ្លងវីរុសកូវីដ១៩ បំប្លែងខ្លួន«អូមីក្រុង» ដំបូងគេ។
កាលពីថ្ងៃទី២៩ ខែវិច្ឆិកា ក្រសួងសុខាភិបាលបានចេញសេចក្ដីសម្រេចហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន១០នៅទ្វីបអាហ្រ្វិក ឬអ្នកមានប្រវត្តិធ្វើដំណើរទៅប្រទេសទាំង១០ រួមមាន Botswana, Eswatini, Lesotho, Mozambique, Namibia, South Africa, Zimbabwe, Malawi, Angola, និង Zambia ក្នុងអំឡុងពេល៣សប្ដាហ៍ មុនពេលធ្វើដំណើរចូលប្រទេសកម្ពុជា។
យ៉ាងណា នៅថ្ងៃទី៥ ខែធ្នូ ឆ្នាំ២០២១ ក្រសួងសុខាភិបាលបានប្រកាសលុបចោលបម្រាមនេះវិញ ដោយលោក ហ៊ុន សែន ធ្លាប់អះអាងថាលោកជាអ្នកបញ្ជាឱ្យដកចោលបម្រាមនេះ ដើម្បីចូលរួមចំណែកក្នុងដំណើរការបើកប្រទេសកម្ពុជាឡើងវិញ៕
