ប្រជាសហគមន៍រកឃើញថា មានសកម្មភាពកាប់និងដឹកជញ្ជូនឈើនៅក្នុងតំបន់ព្រៃឡង់ ក្នុងស្រុករវៀង ខេត្តព្រះវិហារ កើតឡើងថ្មីៗទៀតច្រើន ហាក់ដូចមិនមានការទប់ស្កាត់ពីមន្ត្រីមានសមត្ថកិច្ចនោះទេ។
ប្រជាសហគមន៍ព្រៃឡង់ លោក ស្រី ទីន ឱ្យដឹងថា ក្រុមរបស់លោកបានចុះល្បាតនៅអំឡុងពាក់កណ្ដាលខែធ្នូនេះ ហើយរកឃើញបទល្មើសមានច្រើន ដូចជា គល់ឈើដែលទើបកាត់ហើយថ្មីៗ មានមុខកាត់ចន្លោះពី៤០សង់ទីម៉ែត្រទៅ១១០សង់ទីម៉ែត្រ។ លោកបន្តថា ក្រៅពីឃើញគល់ឈើទើបកាត់ សហគមន៍បានកត់ត្រាឃើញថាមានគោយន្តដឹកឈើចំនួន២៨គ្រឿង និងរថយន្តបង្គង់ (អារ៉េវ) ចំនួន៤គ្រឿង នៅអំឡុងពេលចុះល្បាតពីថ្ងៃទី១៣ដល់ថ្ងៃទី១៦ ខែធ្នូ។
លោកបានអំពាវនាវឱ្យមានការជួយទប់ស្កាត់ពីមន្ត្រីពាក់ព័ន្ធ ដោយអះអាងថា បទល្មើសព្រៃឈើនេះកើតឡើងខ្លាំង ដោយមិនការថមថយទេ។
លោក ស្រី ទីន៖ «ករណីកាប់បំផ្លាញព្រៃឈើទាំងនេះមិនមែនមានតែត្រឹមសម័យវិបត្តិកូវីដ-១៩ផ្ទុះឡើងនោះទេ ការកាប់បំផ្លាញព្រៃឈើនៅតែបន្តមានរហូត»។
ស្រដៀងគ្នានេះដែរ បណ្ដាញសហគមន៍ព្រៃឡង់មា្នក់ទៀត លោក ស្រី ថី ថ្លែងថា អំឡុងពេលជំងឺកូវីដ-១៩ផ្ទុះខ្លាំង ក្រុមរបស់លោកត្រូវសមត្ថកិច្ចរារាំងមិនឱ្យចុះល្បាតទេ។ លោកបន្តថា ក្នុងពេលអវត្តមានក្រុមប្រជាសហគមន៍នេះ បទល្មើសព្រៃឈើហាក់មានការស្ទុះឡើងខ្លាំង។
លោកថា៖ «ចាប់តាំងពីខែ១ ឆ្នាំ២០២១ នៃវិបត្តិកូវីដ-១៩មកនេះ មានករណីបន្តជាប់រហូត! ហើយដោយសារតែកូវីដ-១៩ ក្រុមយើងមិនបានចូលព្រៃនិងល្បាតព្រៃផង ឃើញថាឱកាសទុកឱ្យជនល្មើស»។
ប្រជាសហគមន៍ទាំងនេះសម្ដែងការព្រួយបារម្ភថា បើសកម្មភាពរបៀបនេះនៅតែបន្ត ព្រៃឈើនៅតំបន់នោះនឹងអស់នៅត្រឹមឆ្នាំ២០២៤មិនខាន។
សកម្មជនបរិស្ថាននៃសមាគមបណ្ដាញយុវជនកម្ពុជា ហៅកាត់ថា CYN លោក សាន់ ម៉ាឡា មើលឃើញថា បទល្មើសព្រៃឈើនៅតែបន្តកើតឡើងមិនឈប់ឈរ បណ្ដាលមកពីមិនបើកសិទ្ធិឱ្យអ្នកពាក់ព័ន្ធចូលរួមការពារ និងឈ្មួញកាប់ឈើមានអ្នកធំការពារ។
លោកថា៖ «ទី១ រដ្ឋមិនបានលើកទឹកចិត្តនិងបើកចំហសិទ្ធិសេរីភាពដល់ការចូលរួមចំណែកការពារព្រៃឈើរបស់សហគមន៍មូលដ្ឋាន សង្គមស៊ីវិល និងមហាជន។ ទី២ ដោយសារតែការអនុវត្តច្បាប់របស់មន្ត្រីនៅមានការខ្វះចន្លោះច្រើន និងកង្វះយន្តការតាមដានត្រួតពិនិត្យរបស់អាជ្ញាធរថ្នាក់ជាតិមកលើមន្ត្រីថ្នាក់ក្រោម។ ទី៣ គឺដោយសារអ្នកនៅពីក្រោយខ្នងនៃការកាប់បំផ្លាញ គឺជាមនុស្សមានឥទ្ធិពលនិងមានអំណាច»។
ប្រធានស្ដីទីនៃមន្ទីរបរិស្ថានខេត្តព្រះវិហារ លោក សុង ច័ន្ទសុជាតិ បដិសេធការលើកឡើងរបស់ប្រជាសហគមន៍នេះ ដោយថា របាយការណ៍នេះធ្វើឡើងដោយមិនមានការសហការជាមួយអាជ្ញាធរមិនអាចយកជាការបានទេ។
លោកថា៖ «ប្រសិនបើគាត់ជាសហគមន៍ស្របច្បាប់ យើងនឹងធ្វើការសហការជាមួយគាត់ យើងនឹងចុះរាល់ថ្ងៃជាមួយគាត់ ក៏ប៉ុន្តែបណ្ដាញសហគមន៍ពួកគាត់ គាត់លួចចុះរាប់គល់ឈើតែគ្នាគាត់ យើងអត់ដឹងផង។ អ៊ីចឹងរបាយការណ៍គាត់ គឺពួកគាត់បញ្ជាក់តែម្ខាងហ្នឹង យើងមិនយកជាការទេ»។
ដូចគ្នានេះដែរ អ្នកនាំពាក្យក្រសួងបរិស្ថាន លោក នេត្រ ភក្ត្រា មិនទទួលស្គាល់ថាមានការកាប់បំផ្លាញព្រៃឈើច្រើនដូចការលើកឡើងរបស់សហគមន៍នេះ ដោយលោកបញ្ជាក់ថា ក្រសួងបានដាក់មន្ត្រីបំពេញការងារតាមគោលដៅក្នុងព្រៃឡង់ មិនឱ្យមានបទល្មើសច្រើនកើតឡើងទេ។
លោក នេត្រ ភក្ត្រា ថ្លែងថា៖ «មន្រ្តីនៃក្រសួងបរិស្ថាននិងមន្រ្តីឧទ្យានុរក្សដែលប្រចាំការទាំង៤ខេត្ត បន្តកិច្ចការងាររបស់ខ្លួន អនុវត្តច្បាប់តាមតួនាទីភារកិច្ច ហើយនិងការទទួលខុសត្រូវនិងវិជ្ជាជីវៈ»។
ព្រៃឡង់ មានផ្ទៃដីប្រមាណ៥០ម៉ឺនហិកតា ដោយគ្របដណ្ដប់ខេត្តចំនួន៤ គឺខេត្តព្រះវិហារ កំពង់ធំ ក្រចេះ និងស្ទឹងត្រែង។ ព្រៃឡង់ ជាព្រៃធំជាងគេនៅកម្ពុជា ហើយត្រូវបានរដ្ឋាភិបាលកំណត់ជាតំបន់ការពារនៅក្នុងឆ្នាំ២០១៦។
បើទោះបីជារដ្ឋាភិបាលកំណត់ថាជាតំបន់ការពារក៏ដោយ ក៏ព្រៃនេះត្រូវបានអ្នកឃ្លាំមើលជាតិនិងអន្តរជាតិបានបង្ហាញរបាយការណ៍ថា មានការកាប់បំផ្លាញជាបន្តបន្ទាប់។
របាយការណ៍របស់អ្នកស្រាវជ្រាវនៃសាកលវិទ្យាល័យ Copenhagen ប្រទេសដាណឺម៉ាក បង្ហាញថា នៅក្នុងឆ្នាំ២០១៩ សកម្មភាពកាប់បំផ្លាញព្រៃឡង់កើនឡើងជាង៧០ភាគរយ បើប្រៀបធៀបជាមួយឆ្នាំមុនៗ។ ការសិក្សានេះឱ្យដឹងទៀតថា ចាប់ពីឆ្នាំ២០០០ ដល់ឆ្នាំ២០១៩ ព្រៃឡង់បាត់បង់អស់ប្រមាណ៤៧ ៤០០ហិកតា៕