អាជ្ញាធរខេត្តជាប់ព្រំដែនបានអះអាងថា អាជ្ញាធរថៃបានស្នើសុំពន្យារពេលបើកច្រកព្រំដែនជាមួយកម្ពុជាបន្តទៀត ក្រោយពីមានករណីឆ្លងជំងឺកូវីដ-១៩បំប្លែងខ្លួនប្រភេទ «អូមីក្រុង (Omicron)» ក្នុងប្រទេសរបស់ខ្លួនកាន់ច្រើន។
ច្រកព្រំដែនអន្តរជាតិប៉ោយប៉ែត ខេត្តបន្ទាយមានជ័យ និងច្រកព្រំដែនមួយចំនួនទៀតនៅខេត្តបាត់ដំបងជាប់ជាមួយខេត្តស្រះកែវ គ្រោងនឹងបើកដំណើរការឡើងវិញនាចុងខែធ្នូ ឆ្នាំ២០២១នេះ ក្រោយពីភាគីទាំងពីរបានពិនិត្យឃើញថា អត្រាការឆ្លងមេរោគកូវីដ-១៩នៅក្នុងខេត្តនៅតាមច្រកព្រំដែនមានសភាពធូរស្រាលជាងមុន។
យ៉ាងណា អភិបាលរងខេត្តបន្ទាយមានជ័យ លោក ងោ ម៉េងជ្រួន បានប្រាប់ វីអូឌី នៅថ្ងៃចន្ទនេះថា គម្រោងបើកច្រកព្រំដែនកម្ពុជា-ថៃត្រូវបានពន្យារពេលវិញ ក្រោយក្រសួងសុខាភិបាលថៃប្រកាសឱ្យរឹតត្បិតព្រំដែនឡើងវិញ រហូតដល់ថ្ងៃទី៤ ខែមករា ឆ្នាំ២០២២ ទើបភាគីទាំងពីរ កម្ពុជា-ថៃ នឹងជួបពិភាក្សាគ្នាជាថ្មីម្ដងទៀត។
លោកបន្ថែមថា៖ «ការពន្យារឡើងវិញនេះ ដោយសារតែរដ្ឋមន្ត្រីក្រសួងសុខាភិបាល និងសុខភាពនៅប្រទេសថៃ គាត់បានប្រកាសអំពីការរឹតបន្តឹងឡើងវិញ។ អ៊ីចឹងហើយអភិបាលខេត្តស្រះកែវដែលបានពិភាក្សាជាមួយអាជ្ញាធរខេត្តបន្ទាយមានជ័យយើង ដែលថាគ្រោងនឹងបើកច្រកព្រំដែននៅចុងធ្នូ ឆ្នាំ២០២១នេះ នឹងត្រូវបានពន្យារឡើងវិញ»។
បើតាមលោក ងោ ម៉េងជ្រួន គម្រោងបើកច្រកព្រំដែនឱ្យដំណើរការឡើងវិញនោះ គឺដើម្បីការដោះដូរទំនិញ ការធ្វើពាណិជ្ជកម្ម ការចេញចូលរបស់ពលរដ្ឋរវាងប្រទេសទាំងពីរឱ្យមានភាពងាយស្រួល ជាពិសេសមិនប្រឈមការឆ្លងដែនខុសច្បាប់ថែមទៀត។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជា លោក ឌិន ពុទ្ធី មានប្រសាសន៍ថា ការបិទច្រកព្រំដែនកម្ពុជា-ថៃ រយៈពេលជិត២ឆ្នាំមកនេះ បានធ្វើឱ្យប៉ះពាល់ដល់សេដ្ឋកិច្ចគ្រួសារពលរដ្ឋនៅជាប់ព្រំដែនជាខ្លាំង ដោយពួកគេបានជួបបញ្ហាលំបាកក្នុងជីវភាព ជំពាក់បំណុលធនាគារច្រើន ដោយសាររកចំណូលមិនបាន និងការបាត់បង់មុខរបរជាដើម។
ប្រធានសមាគមរូបនេះបន្តថា ការពន្យារពេលបើកច្រកព្រំដែននេះនឹងធ្វើឱ្យប្រជាពលរដ្ឋជួបការលំបាកក្នុងជីវភាពកាន់តែខ្លាំងថែមទៀត។ លោកថា ការបិទច្រកព្រំដែននេះទៀត គឺពុំមានតម្លាភាពឡើយ ដោយភាគីថៃអាចដឹកទំនិញចូលមកកម្ពុជាដោយសេរី ខណៈទំនិញរបស់ប្រជាពលរដ្ឋកម្ពុជាត្រូវបានបិទខ្ទប់ជិតតែម្តង។
លោកបន្ថែមថា៖ «ពេលគេបិទច្រក [ព្រំដែន] អ៊ីចឹងទាំងអាជីវករនិងប្រជាពលរដ្ឋដែលរស់នៅតាមបន្ទាត់ព្រំដែន គាត់បាត់បង់មុខរបរ គាត់រកប្រាក់ចំណូលមិនបាន គាត់ជំពាក់បំណុលគេច្រើន។ អ្នកខ្លះឈឺគ្មានលុយមើល ដេកស្លាប់! អ្នកខ្លះមានដីមានធ្លី គាត់លក់ឡាយឡុងចាយបណ្ដោះអាសន្ន។ ចំណែកជនជាតិថៃ គេមិនសូវជាពិបាកទេ ព្រោះគេអាចដឹកទំនិញចេញមកកម្ពុជាបាន»។
លោក ឌិន ពុទ្ធី បានទាមទារឱ្យពន្លឿនបើកច្រកព្រំដែនកម្ពុជា-ថៃទាំងអស់ឡើងវិញ ដើម្បីជួយដល់ប្រជាពលរដ្ឋកម្ពុជារស់នៅជាប់ព្រំដែនដែលកំពុងជួបការលំបាកជាខ្លាំងក្នុងជីវភាពនោះ។
កាលពីអំឡុងឆ្នាំ២០២០ អាជ្ញាធរថៃបានប្រកាសបិទច្រកឆ្លងកាត់ព្រំដែនទាំងអស់ជាមួយកម្ពុជា ក្រោមហេតុផលទប់ស្កាត់ការរីករាលដាលនៃជំងឺកូវីដ-១៩។
បើយោងតាមសារព័ត៌មានបាងកកប៉ុស្តិ៍ នៅថ្ងៃទី២៧ ខែធ្នូនេះ ឱ្យដឹងថា ករណីឆ្លងវីរុសកូវីដ-១៩នៅក្នុងប្រទេសថៃសរុបមានចំនួនជាង២លាននាក់ ដែលបណ្ដាលឱ្យមានមនុស្សស្លាប់ជាង២ម៉ឺននាក់ (២១ ៥៩៨) ហើយអ្នកឆ្លងថ្មីនៅថ្ងៃនេះមានចំនួន២ ៤៣៧នាក់ និងស្លាប់ថ្មីចំនួន១៨នាក់បន្ថែមទៀត។
ប្រភពដដែលបន្តថា ប្រទេសថៃបានរាយការណ៍ពីការរកឃើញមេរោគបំប្លែងខ្លួនថ្មីប្រភេទ អូមីក្រុង (Omicron) លើកដំបូងនៅដើមខែធ្នូនេះ ហើយការឆ្លងបន្ថែមទៀតត្រូវបានគេរកឃើញនៅក្នុងខេត្តជាង១០ រួមទាំងទីក្រុងបាងកកផងដែរ៕