ក្រសួងសុខាភិបាលបានរកឃើញអ្នកឆ្លងជំងឺកូវីដ-១៩ដែលជាប្រភេទបំប្លែងខ្លួន «អូមីក្រុង» ចំនួន២ករណីបន្ថែមទៀត ដែលជាករណីនាំចូលពីក្រៅប្រទេស ក្នុងចំណោមអ្នកឆ្លងកូវីដ-១៩ ទាំងអស់៥នាក់ ដែលបានរកឃើញកាលពីម្សិលមិញ។
សេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី២៨ ខែធ្នូ ឆ្នាំ២០២១ បានឱ្យដឹងថា អ្នកឆ្លងជំងឺកូវីដ-១៩ ចំនួន៥នាក់ថ្មី ដែលបានរកឃើញកាលពីម្សិលមិញនោះ រួមមាន ប្រភេទបំប្លែងខ្លួន អូមីក្រុង ២នាក់ ដែលជាករណីនាំចូល និង៣នាក់ទៀតជាកូវីដ-១៩ ធម្មតា។ ប្រភពដដែលបញ្ជាក់ថា ជាមួយគ្នានោះក៏មានករណីអ្នកជំងឺស្លាប់ម្នាក់ ខណៈជាសះស្បើយថ្មីមានចំនួន១១នាក់ផងដែរ។
បើតាមក្រសួងសុខាភិបាល គិតត្រឹមព្រឹកថ្ងៃអង្គារនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៤៦៩នាក់ ក្នុងនោះ អ្នកជំងឺព្យាបាលជាសះស្បើយសរុបមានចំនួន១១៦ ៨៨៥នាក់ អ្នកស្លាប់សរុប៣ ០១០នាក់ និងករណីនាំចូលពីក្រៅប្រទេសសរុប១៩ ៨៩០នាក់។
គិតមកត្រឹមព្រឹកថ្ងៃទី២៨ ខែធ្នូនេះ កម្ពុជាបានរកឃើញអ្នកឆ្លងវីរុសកូវីដ-១៩ បំប្លែងខ្លួនប្រភេទ អូមីក្រុង ចំនួន៣៣ករណីហើយ ខណៈ៣ករណីឬ៣នាក់ត្រូវបានព្យាបាលជាសះស្បើយ។
កាលពីយប់ថ្ងៃទី២៦ ខែធ្នូ លោកនាយករដ្ឋមន្ត្រី ហ៊ុន សែន បានអំពាវនាវទៅកាន់ប្រជាពលរដ្ឋទាំងអស់ឱ្យប្រុងប្រយ័ត្នខ្ពស់ចំពោះការឆ្លងមេរោគបំប្លែងខ្លួនថ្មីនេះ ដោយត្រូវចូលរួមទប់ស្កាត់មិនឱ្យឆ្លងចូលទៅក្នុងសហគមន៍ ត្បិតវីរុសកូវីដ-១៩បំប្លែងខ្លួនថ្មីនេះមានលទ្ធភាពចម្លងលឿនជាងប្រភេទបំប្លែងខ្លួនផ្សេងទៀត ដូចជា ដែលតា ឬ អាល់ហ្វា៕
